មូលនិធិរូបិយប័ណ្ណពិភពលោក ហៅកាត់ថា IMF បានព្យាករណ៍ថា កំណើនសេដ្ឋកិច្ចកម្ពុជានៅតែរឹងមាំដដែល ជាមួយកំណើនក្នុងរង្វង់ ៧ភាគរយក្នុងរយៈពេលប៉ុន្មានឆ្នាំខាងមុខទៀត ប៉ុន្តែ ក៏បានព្រមានផងដែរអំពីការធ្លាក់ចុះបន្តិចមកវិញ នៅរយៈពេល ៥ឆ្នាំខាងមុខ ដោយសារតែការថយចុះកំណើនក្នុងវិស័យមួយចំនួន។
ក្នុងសេចក្ដីប្រកាសព័ត៌មានកាលពីថ្ងៃទី០២ តុលា IMF បានលើកឡើងថា សេដ្ឋកិច្ចកម្ពុជាមានកំណើនខ្លាំងឆ្ពោះទៅរកស្ថេរភាព ខណៈកំណើនប្រាក់ចំណូលបានកើនខ្ពស់ ភាពក្រីក្របានធ្លាក់ចុះ ហើយសេដ្ឋកិច្ចចាប់ផ្ដើមធ្វើពិពិធកម្មជាសន្សឹមៗ ឬមានចាប់ផ្ដើមងបង្កើតមានភាពចម្រុះបែប។
IMF បានលើកឡើងបន្ថែមថា កំណើនខ្ពស់បែបនេះ ដោយសារតែកំណើនតម្រូវការខាងក្រៅ និងការពង្រីកគោលនយោបាយសារពើពន្ធរបស់រដ្ឋាភិបាលកម្ពុជា។
ទោះជាយ៉ាងណា IMF បានព្រមានផងដែរថា កំណើនសេដ្ឋកិច្ចកម្ពុជា អាចថយចុះជាង ១ភាគរយ ឬមានកំណើនត្រឹម ៦ភាគរយវិញ ដោយសារការថយចុះនៃកំណើនផលិតភាព ភាពចាស់ទុំនៃឥណទាន និងអចលនទ្រព្យ។
វិស័យអចលនទ្រព្យនៅកម្ពុជា ត្រូវបានរដ្ឋាភិបាលកម្ពុជាកត់ត្រាថា មានកំណើនយ៉ាងឆាប់រហ័សនៅក្នុងរយៈពេលប៉ុន្មានចុងក្រោយនេះ។
របាយការណ៍ឆ្នាំ២០១៧ របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា រដ្ឋាភិបាលកម្ពុជាអនុម័តលើគម្រោងសាងសង់សរុបចំនួន ៣ ៤១៨គម្រោង ឬទំហំវិនិយោគក្នុងវិស័យសំណង់ បានកើនឡើងរហូតដល់ ៦.៨ពាន់លានដុល្លារកាលពីឆ្នាំមុននេះ៕
