ម្ចាស់ម៉ាក និងអ្នកបញ្ជាទិញចំនួន២០ស្ថាប័នបានបន្តលើកឡើងពីក្ដីបារម្ភរបស់ពួកគេពីផលប៉ះពាល់នៃការផ្ដាច់ប្រព័ន្ធអនុគ្រោះពន្ធ EBA និងGSP ហើយស្នើដល់លោកហ៊ុន សែន ឲ្យងាកមកគោរពសិទ្ធិមនុស្សនៅក្នុងប្រទេស។
ក្នុងលិខិតចុះថ្ងៃទី២ ឧសភា ដែលVOD ទទួលបានម្ចាស់ម៉ាក់ធំៗចំនួន២០ ដែលរួមមានAdidas Gap Nike New balance ជាដើមបានស្នើទៅលោកហ៊ុន សែន បង្ហាញពីឆន្ទៈពិតប្រាកដក្នុងការគោរពសិទ្ធិមនុស្ស សិទ្ធិសហជីព និងសង្គមស៊ីវិលក្នុងប្រទេសកម្ពុជា និងធ្វើយ៉ាងណារក្សាប្រព័ន្ធអនុគ្រោះពន្ធនេះឲ្យបាន។
ពួកគេសរសេរថា៖ « ពួកយើងព្រួយបារម្ភពីបញ្ហាការងារ និងស្ថានភាពសិទ្ធិមនុស្សនៅកម្ពុជា បានបង្កហានិភ័យទៅដល់ប្រព័ន្ធអនុគ្រោះពន្ធសម្រាប់កម្ពុជានេះ » ។
ឆ្លើយទៅនឹងសំណួរ VOD តាមសារអេឡិចត្រូនិក WhatsApp អ្នកនាំពាក្យក្រសួងការងារលោក ហេង សួរ អរគុណចំពោះក្ដីបារម្ភរបស់ម្ចាស់ម៉ាក់ តែធាតុពិតកម្ពុជាបានដើរលើសពីអ្វីដែលម្ចាស់ម៉ាកចង់បានរួចទៅហើយ។
លោកថា៖ « យើងជូនម្ចាស់ម៉ាកនានាជាថ្មីម្តងទៀតនូវរបាយការណ៍បច្ចុប្បន្នភាពរបស់កម្ពុជា និងបានផ្ទៀតផ្ទាត់ជាមួយរបាយការណ៍ប្រចាំឆ្នាំរបស់គំរោងរោងចក្រ់កានតែប្រសើរនៅកម្ពុជារបស់អង្គការ ILO-BFC ក៏ដូចជាផែនការសកម្មភាពដែលមាននៅក្នុងផែនទីចង្អុលផ្លូវរបស់បេសកម្មផ្ទាល់របស់អង្គការ ILO។ អ្វីដែលមាននៅក្នុងឯកសារទាំង៣នេះគឺឆ្លើយតបនឹងអ្វីដែលម្ចាស់ម៉ាកចងឃើញទាំងអស់ហើយ។ យើងមានសុទិដ្ឋិនិយមនិងជឿជាក់លើវិជ្ជាជីវៈ និងបច្ចេកទេសប្រៀបធៀបរបស់ម្ចាស់ម៉ាកនានា » ។
កាលពីដើមឆ្នាំ២០១៩នេះលោក ហ៊ុន សែន បានប្រកាសពីយុទ្ធនាការពង្រឹងឯករាជ្យភាពរបស់កម្ពុជាតាមរយៈវិធានការជួយដល់ធុរកិច្ចមួយចំនួន ដែលលោកថាបើទោះបីជាគ្មានឬមានប្រព័ន្ធអនុគ្រោះពន្ធក៏កម្ពុជានៅតែទៅមុខ។
ក្នុងវេទិការដ្ឋាភិបាលនិងវិស័យឯកជន កាលពីថ្ងៃទី២៩ មីនាកន្លងទៅ លោកនាយករដ្ឋមន្ត្រី ហ៊ុន សែន បានបញ្ជាក់នៅចំពោះមុខអ្នករកស៊ីនៅស្រុកខ្មែរទាំងអស់ថា កម្ពុជានឹងសម្រេចគោលដៅ ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ខាងមុខ ទោះគ្មានប្រព័ន្ធអនុគ្រោះពន្ធរបស់សហភាពអឺរ៉ុបក៏ដោយ ។
លោកថា៖ «បើទោះបីជាត្រូវរឹតក្រមានឹងចង្គេះ ដើម្បីស៊ីឲ្យតិចក៏ត្រូវតែធ្វើដែរ ក៏ត្រូវតែរឹតដែរ ដើម្បីការពារឯករាជ្យរបស់ប្រទេស។ បើនរណាមួយហ៊ានឱនក្បាលលិឍជើងគេ ដើម្បីទទួលបានភាពអនុគ្រោះមិនបាច់ធ្វើមេដឹកនាំគេទេ»។
EBAគឺជាប្រព័ន្ធអនុគ្រោះពន្ធរបស់សហភាពអឺរ៉ុប ចំណែកGSP គឺជាប្រព័ន្ធអនុគ្រោះពន្ធរបស់សហរដ្ឋអាមេរិក។ កម្ពុជាទទួលបានប្រព័ន្ធអនុគ្រោះពន្ធទាំងពីរដែលតម្រូវឱ្យគោរពលក្ខខណ្ឌ គោរពសិទ្ធិមនុស្ស និងអនុវត្តន៍ការដឹកនាំតាមបែបប្រជាធិបតេយ្យ។ ប៉ុន្តែក្រោយកម្ពុជាមានជម្លោះនយោបាយមួយរយៈចុងក្រោយនេះ ទាំងអាមេរិក និងអឺរ៉ុប ប្រកាសពីវិធានការដកប្រពន្ធអនុគ្រោះពន្ធវិញ។
សហភាពអឺរ៉ុប កាលពីខែកុម្ភៈ ឆ្នាំ២០១៩នេះ បានប្រកាសរាប់ថ្ងៃថយក្រោយលើវិធានការព្យួរជាបណ្តោះអាសន្នប្រព័ន្ធអនុគ្រោះពន្ធពាណិជ្ជកម្ម EBA ពីកម្ពុជា ក្រោយពីប្លុកលោកសេរីមួយនេះរកឃើញថា រដ្ឋាភិបាលបានបរាជ័យក្នុងការស្តារស្ថានភាពសិទ្ធិមនុស្ស និងលទ្ធិប្រជាធិបតេយ្យ។
កាលពីថ្ងៃទី៤ មេសា ក្រុមអ្នកបញ្ជាទិញធំៗចំនួន៨ ក៏បានដាក់លិខិតទៅនាយករដ្ឋមន្ត្រីដោយបង្ហាញពីក្ដីបារម្ភរបស់ពួកគេចំពោះការបាត់បង់ប្រព័ន្ធអនុគ្រោះពន្ធនេះផងដែរ ដោយថាវានឹងធ្វើឲ្យប៉ះពាល់ធ្ងន់ធ្ងរដល់ឧស្សាហកម្មកាត់ដេរ និងប្រជាពលរដ្ឋខ្មែររាប់លាននាក់៕
