លោកនាយករដ្ឋមន្ត្រី ហ៊ុន សែន ជំរុញលើកទឹកចិត្តដល់អ្នកមានទ្រព្យធនច្រើន ចែករំលែកដល់ជនដែលងាយរងគ្រោះ ឬអ្នកក្រីក្រ ដើម្បីធានាពីសេចក្តីសុខក្នុងសង្គម។
ក្នុងពិធីប្រារព្ធទិវាពិភពលោកកាកបាទក្រហម ក្រោមប្រធានបទ «ខ្ញុំស្រឡាញ់កាកបាទក្រហមកម្ពុជា» នៅរាជធានីភ្នំពេញ នាថ្ងៃ៨ ខែឧសភានេះ លោក ហ៊ុន សែន ថ្លែងថា សិល្បៈនៃការចែករំលែកជំរុញឱ្យប្រទេសជាតិមានសុខដុមរមនាមានតាំងពីអតីតកាលមក។
មេដឹកនាំរូបនេះ អះអាងថា មុនឆ្នាំ១៩៧០ សមទ្ធផលជាតិ ដូចជា សាលារៀន ជាដើម លោកថា ៩០ភាគរយកើតចេញពីការចែករំលែករបស់សហគមន៍។ លោកបន្តថា បច្ចុប្បន្ន ៥០ភាគរយចេញពីរដ្ឋាភិបាល និង៥០ភាគរយទៀតកើតចេញពីការចែករំលែក។
លោក ហ៊ុន សែន អំពាវនាវឲ្យចលនានេះជាសកម្មភាពថ្នាក់ជាតិ តាមពាក្យស្លោកនេះ នូវអ្វីដែលលោកហៅថា ដើម្បីបន្តលើកកម្ពស់សិល្បៈចែករំលែក ជួយដល់ពលរដ្ឋដែលងាយរងគ្រោះ ធានាសុខដុមរមនាសង្គម។
លោកថា៖ «ទាក់ទិនទៅនឹងជំនួយមនុស្សធម៌ទាំងនេះ ខ្ញុំជឿជាក់ថា ប្រជាពលរដ្ឋរបស់យើងអាចធ្វើបានទៅនឹងទ្រឹស្តីមួយនេះ ហើយទ្រឹស្តីមួយនេះ វាអាចបង្កើតនូវភាពសុខដុមរមនា រវាងអ្នកដែលមានលទ្ធភាព និងអ្នកដែលគ្មានលទ្ធភាព ដើម្បីឆ្លើយតបទៅនឹងតម្រូវការរបស់ប្រជាពលរដ្ឋរបស់យើង»។
ក្នុងទិវានេះដែរ ក្រុមហ៊ុនមួយចំនួន និងមន្ត្រីរាជការ បានចូលរួមឧបត្ថម្ភទឹកប្រាក់សុទ្ធ ក្នុងនោះមានក្រុមពីរគឺ ក្រុមហ៊ុន ណាហ្គេវើល និងក្រុមហ៊ុនចិន ញូញៀន ដែលទទួលបានដីសម្បទាននៅខេត្តកោះកុង ឧបត្ថម្ភប្រាក់ ១លានដុល្លារដូចគ្នា ទៅកាកបាទក្រហមកម្ពុជា ។
អ្នកវិភាគវ័យក្មេង កញ្ញា លី ស្រីស្រស់ និយាយថា ការចែករំលែក ដើម្បីជួយអ្នកងាយរងគ្រោះ ដូចជា គ្រោះធម្មជាតិ ជាដើម កញ្ញាថា ជាគុណធម៌ដ៏ប្រសើរក្នុងសង្គម។ ប៉ុន្តែ ថា បើច្បាប់មិនរឹងមាំ អ្នកឧត្ថម្ភមួយចំនួននឹងជ្រកក្រោមរូបភាពនេះ ទៅបំពានសិទ្ធិអ្នកងាយរងគ្រោះកាន់តែខ្លាំង ដើម្បីពង្រីកមុខរបររបស់ពួកគេ ។
អ្នកវិភាគវ័យក្មេងរូបនេះ ផ្តល់ជាយោបល់ថា រដ្ឋាភិបាលគួរបង្កើតកម្មវិធីនយោបាយ ធ្វើយ៉ាងណាកុំឱ្យអ្នកមាន និងអ្នកក្រមានគម្លាតគ្នាឆ្ងាយពេក ដើម្បីទប់ស្កាត់វិបត្តិសង្គម។
កញ្ញាថា៖ «បើសិនជាអ្នកមាន មានខ្លាំងពេក គាត់បរិច្ចាគទៅ វាធ្វើឱ្យអ្នកមានហ្នឹងមានគុណនៅក្នុងប្រទេសហ្នឹងវិញ។ តាមពិត វាមិនមែនអ៊ីចឹងទេ តែដោយសារតែភាពខ្វះខាតនៃគោលនយោបាយ ជាហេតុធ្វើឱ្យអ្នកក្រៗខ្លាំងពេក អ៊ីចឹងទៅបែរជាលើកស្ទួយថា អ្នកមានហ្នឹងបានជួយអ៊ីចឹងទៅ។ អ៊ីចឹង សង្គមហ្នឹងមិនមែនបង្កើតឡើងដើម្បីឱ្យអ្នកមានមានគុណទៅលើអ្នកក្រទេ តែត្រូវធ្វើយ៉ាងណាកុំឱ្យ [អ្នកមាន និងអ្នកក្រ] វាឃ្លាតពីគ្នាឆ្ងាយពេក»។
តាមរបាយការណ៍ក្នុងឆ្នាំ២០១៨កន្លងទៅ កាកបាទក្រហមកម្ពុជា បានផ្តល់អំណោយមនុស្សធម៌ដល់ប្រជាពលរដ្ឋរងគ្រោះ និងងាយរងគ្រោះបំផុតជាង១៣ម៉ឺនគ្រួសារ ( ១៣៩ ១១៣) ជួយប្រជាពលរដ្ឋ ដែលទទួលសេវាកម្មមនុស្សធម៌ផ្សេងទៀតជាង ១០ម៉ឺនគ្រួសារ និងផ្តល់ផ្ទះដល់ចាស់ជរាគ្មានទីពឹង និងស្ត្រីមេម៉ាយកូនច្រើនបានចំនួន ១៦៧ខ្នងផ្ទះ ជាដើម។