សមត្ថកិច្ចខេត្តកំពង់ធំចុះបង្រ្កាបទីតាំងលាក់ទុករំសេវជាតិផ្ទុះមួយកន្លែងរបស់ក្រុមហ៊ុនចិនដែលបានធ្វើអាជីវកម្មរុករករ៉ែមាសស្ថិតនៅក្នុងឃុំសុចិត្រ ស្រុកសណ្តាន់។
អធិការស្រុកសណ្តាន់ លោក អ៊ួង ម៉ូលី ប្រាប់ វី.អូ.ឌី ថាក្រុមហ៊ុនចិនមួយបានលាក់ទុករំសេវចំនួនច្រើនសម្រាប់ទុកបំបែកថ្មី និងប្រើប្រាស់ក្នុងទម្រង់ផ្សេងៗទៀតដើម្បីទាញយករ៉ែ។
អធិការស្រុករូបនេះបញ្ជាក់ថា រំសេវដែលសមត្ថកិច្ចចុះបង្រ្កាបកាលពីម្សិលមិញនេះ គឺជារំសេវជាតិផ្ទុះដែលសេសសល់ក្រោយចុះបង្រ្កាបកាលពីលើកមុនតែប៉ុណ្ណោះ។
លោកបន្ថែមថា៖ «រំសេវនេះជាម្សៅដែលជាកាកសំណល់សល់អាចាស់ពីមុន ដែលតុលាការគេដឹកនាំចុះបង្ក្រាបម្តង ហើយនៅសល់កាក់សំណស់ទេ។ វាជាកាកសំណស់របស់ក្រុមហ៊ុនចិន ដែលវាយកមកប្រើសម្រាប់រកមាស សម្រាប់ចុចរ៉ែ សម្រាប់ចុចបំបែកថ្មី»។
លោក អ៊ួង ម៉ូលី ឲ្យដឹងថា ពេលនេះរំសេវដែលសេសសល់នោះត្រូវសមត្ថកិច្ចដឹកទៅរក្សាទុកនៅស្នងការដ្ឋានខេត្តកំពង់ធំដើម្បីចាត់ការតាមនីតិវិធីបន្ត។
អ្នកសម្របសម្រួលបណ្តាញព្រៃឡង់ប្រចាំខេត្តកំពង់ធំ លោក ហឿន សុភាព មានប្រសាសន៍ថា អាជីវកម្មរុករករ៉ែមាស ស្រុកសណ្តាន់ ខេត្តកំពង់ធំ គឺមានជាច្រើនកន្លែង ដោយមានម្ចាស់អាជីវកម្មបានប្រើប្រាស់គ្រឿងផ្ទុះ និងសាធាតុគីមីម្យ៉ាងសម្រាប់បម្រើដល់ការជីក និងកែច្នៃរ៉ែមាស។
សកម្មជនបរិស្ថានរូបនេះឲ្យដឹងថា សារធាតុគីមី ប៉ូតាត្យូមសាយយ៉ាណាយ និងគ្រឿងផ្ទុះដែលប្រើសម្រាប់យករ៉ែមាសនោះ បានធ្វើឲ្យប៉ះពាល់ដល់បរិស្ថាន ជាពិសេសធនធានទឹក ព្រៃឈើ និងអាចប៉ះពាល់ទៅដល់អាយុវជីវិតប្រជាពលរដ្ឋដែលប្រើប្រាស់ទឹកអូរនៅភាគខាងក្រោមផងដែរ ប្រសិនបើអាជ្ញាធរទប់ស្កាត់មិនទាន់ពេលវេលា។
លោកបន្ថែមថា៖ «គេខួងដាក់គ្រាប់រំសេវហ្នឹង ហើយគេចុចឲ្យផ្ទុះ ដល់ផ្ទុះហើយ គេយកថ្មមកវ៉ៃរែងយកមាស ហើយគេដាក់សារធាតុគីមីបង្កាត់ដើម្បីយកតែមាសសុទ្ធ គេមានដាក់អាស៊ីតដើម្បីបង្កាត់។ បើនិយាយពីការខូចខាតបរិស្ថាន វាខូចច្រើនណាស់នៅតំបន់នោះ តាមរយៈការប្រើប្រាស់សារធាតុគីមី ធ្វើប៉ះពាល់ដល់ការរស់នៅរបស់ប្រជាជននៅភាគខាងក្រោមហ្នឹង ដែលគេថា ស្ទឹងជានិត នោះ ហើយហូរចាក់ទៅតាមអូរ តាមព្រែកផ្សេងៗទៀត វាធ្វើប៉ះពាល់ដល់ពលរដ្ឋដែលប្រើប្រាស់ទឹកទាំងនោះ»។
កាលពីខែមេសា កម្លាំងអាវុធហត្ថខេត្តកំពង់ធំ សហការជាមួយអាជ្ញាធរពាក់ព័ន្ធ បានចុះបង្ក្រាបទីតាំងធ្វើសិប្បកម្មរុករករ៉ែនៅចំនួន៣គោលដៅ ស្ថិតនៅក្នុងឃុំសុចិត្រ ស្រុកសណ្តាន់ ខេត្តកំពង់ធំ ដោយឃាត់ខ្លួនជនជាតិចិនបានចំនួន១០នាក់ និងរឹបអូសសម្ភារបម្រើឱ្យការជីកយករ៉ែមួយចំនួនទៀត៕
