អតីតមន្ដ្រីជាន់ខ្ពស់មួយរូបរបស់គណបក្សសង្គ្រោះជាតិ លោក មាជ សុវណ្ណារ៉ា បានប្រកាសថា លោកគ្រោងត្រឡប់មកកាន់ប្រទេសកំណើតវិញនាពាក់កណ្ដាលខែក្រោយនេះ ដើម្បីលើកទឹកចិត្តដល់មេដឹកនាំបក្សប្រឆាំងកំពុងជាប់ឃុំក្នុងផ្ទះ លោក កឹម សុខា។
លោក មាជ សុវណ្ណារ៉ា ប្រាប់ VOD នៅថ្ងៃនេះថា លោកនឹងត្រឡប់មកកម្ពុជានៅថ្ងៃទី១៧ ខែមិថុនា ឆ្នាំ២០១៩ ដោយថា ការវិលត្រឡប់មកកម្ពុជានេះ គឺធ្វើក្នុងនាមជាពលរដ្ឋសាមញ្ញ និងក្រោយទទួលបានការលើកលែងទោសពីព្រះមហាក្សត្រ។
លោកអះអាងថា លោកមិនមានបំណងបង្កើតគណបក្សនយោបាយថ្មីណាមួយនោះទេ និងថា លោកក៏មិនបារម្ភចំពោះការចាប់ខ្លួនណាមួយដែរ។ ប៉ុន្ដែ លោករំពឹងថា ស្ថានការណ៍នយោបាយនៅកម្ពុជានឹងអាចធូរស្រាលឡើងវិញ។
លោកបន្ដថា លោកក៏មានបំណងចង់ទៅលើកទឹកចិត្តអតីតប្រធានគណបក្សសង្គ្រោះជាតិលោក កឹម សុខា ផងដែរ បន្ទាប់ពីលោកបានបាត់បង់សេរីភាពអស់រយៈពេលជាង ១៩ខែមកហើយនោះ។
លោកបន្ដថា៖ «ការទៅនេះ ជាមនុស្សសាមញ្ញ ទៅក្នុងនាមជាអ្នកអប់រំផ្នែកសិទ្ធិមនុស្ស ផ្នែកលទ្ធិប្រជាធិបតេយ្យ និងសេរីភាព គឺថា សាបព្រួសតែអ្វីជាការពង្រីកធនធានមនុស្ស។ […] ហើយការចរចាររវាងគណបក្សប្រជាជនកម្ពុជា និងគណបក្សសង្គ្រោះជាតិ យើងមិនអាចថា គ្មានការជជែកគ្នាទេ ប៉ុន្ដែ ក្នុងកម្រិតណា យើងនៅតែសង្ឃឹមថា សហភាពអឺរ៉ុប សហរដ្ឋអាមេរិក ជប៉ុន គេកំពុងតែធ្វើនយោបាយការទូត លក្ខណៈមួយដំណាក់កាលរបស់គេហ្នឹង»។
កាលពីថ្ងៃទី២០ ខែកក្កដា ឆ្នាំ២០១៥ សាលាដំបូងរាជធានីភ្នំពេញបានកាត់ទោស លោក មាជ សុវណ្ណារ៉ា ដាក់ពន្ធនាគាររយៈពេល២០ឆ្នាំ ក្រោមការចោទប្រកាន់ពីបទដឹកនាំ និងចូលរួមចលនាបាតុកម្មហិង្សា បន្ទាប់ពីការតវ៉ាឲ្យបើកទីលានប្រជាធិបតេយ្យចាស់ កាលពីថ្ងៃទី១៥ កក្កដា ឆ្នាំ២០១៤។
ប៉ុន្ដែ លោក មាជ សុវណ្ណារ៉ា និងអតីតសកម្មជន ១២នាក់ទៀតរបស់គណបក្សសង្គ្រោះជាតិ ដែលជាប់ឃុំ ត្រូវតុលាការដោះលែងឲ្យមានសេរីភាព កាលពីចុងខែសីហា ឆ្នាំ២០១៨កន្លងទៅនេះ ក្រោយលោកនាយករដ្ឋមន្ត្រី ហ៊ុន សែន ស្នើសុំព្រះមហាក្សត្រលើកលែងទោស៕
