លោកនាយករដ្ឋមន្ត្រីបានថ្លែងប្រាប់អ្នកវិនិយោគបរទេសថា កម្ពុជាជាប្រទេសដែលមាន សក្តានុពលខ្ពស់សម្រាប់ចាប់ផ្តើម ឬពង្រីកអាជីវកម្មរបស់ពួកគេ។
ថ្លែងនៅក្នុងពិធីជួបជាមួយនាយករដ្ឋមន្ត្រីនេប៉ាល់ កាលពីម្សិលមិញ លោក ហ៊ុន សែន លើកឡើងថា លោកស្វាគមន៍អ្នកវិនិយោគបរទេសដែលមានភាពវ័យឆ្លាតក្នុងការវិនិយោគនៅកម្ពុជា។
លោក ហ៊ុន សែន បានលើកឡើងចំណុចសំខាន់ៗចំនួន៤ ដែលលោកថា ជាឱកាសល្អសម្រាប់វិនិយោគ ដូចជា មានសន្តិសុខគ្មានសង្គ្រាម បើកឱ្យបរទេសវិនិយោគស្មើមុខដូចអ្នកក្នុងស្រុក សំបូរកម្លាំងពលកម្ម និងចុងក្រោយ កម្ពុជាស្ថិតនៅក្នុងទីតាំងយុទ្ធសាស្ត្រនៃទីផ្សារអាស៊ាន។
ក្នុងឱកាសនោះ លោកនាយករដ្ឋមន្ត្រីក៏បានធានាដល់ការបង្កបរិយាកាសល្អសម្រាប់អ្នកវិនិយោគបរទេសទាំងអស់។
របាយការណ៍ក្រុមប្រឹក្សាអភិវឌ្ឍន៍កម្ពុជាដែលលោក ហ៊ុន សែន លើកឡើងក្នុងពិធីនេះបញ្ជាក់ថា រយៈពេល៥ឆ្នាំ ពីឆ្នាំ២០១៤ ដល់២០១៨ កម្ពុជាអនុម័តគម្រោងវិនិយោគ ៩៥៩គម្រោង ក្នុងទឹកប្រាក់ ២៣ប៊ីលានដុល្លារអាមេរិកដែលអាចបង្កើតការងារ១លានកន្លែង។ របាយការណ៍ដដែលបញ្ជាក់ថា ក្នុងរយៈពេល៤ខែដើមឆ្នាំ២០១៩ គម្រោងវិនិយោគដែលបានអនុម័ត មាន ១១៥គម្រោង ក្នុងទុនវិនិយោគ ៤ប៊ីលានដុល្លារអាមេរិក។