សមត្ថកិច្ចកម្ពុជា បញ្ជាក់ថាខ្លួននៅតែបន្តសហការ និងស៊ើបអង្កេតលើជនជាតិចិនជាង២០នាក់ដែលបង្ហោះសារគំរាមបង្កអសន្តិសុខនៅក្នុងខេត្តព្រះសីហនុ ទោះបីជាស្ថានទូតចិនថា វីដេអូដែលបុរសទាំងនោះធ្វើឡើងគ្រាន់ជាការលេងសើចប៉ុណ្ណោះ។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បានអះអាងប្រាប់ វី.អូ.ឌី បែបនេះនៅព្រឹកថ្ងៃចន្ទនេះ។
លោក ថា៖ «គ្រាន់តែឱ្យចំណុចមួយម៉ាត់ មិនដែលចោរ វាថាចង់លួចហើយ ស្រែកថា ទៅលួចឥឡូវទេ។ ហើយគាត់ចង់មកបំផ្លាញសន្តិសុខខេត្តព្រះសីហនុ ហើយស្រែកអ៊ីចឹង។ នេះជាបញ្ហា ប្រហែលជាស្អីនៅពីក្រោយខ្នងទៀត អ៊ីចឹងសុំទុកពេល ភាគីទាំងពីរសហការស្រាវជ្រាវបន្តទៀតទៅ»។
កាលពីថ្ងៃទី១៧ ខែឧសភា ឆ្នាំ ២០១៩ ស្ថានទូតចិនប្រចាំកម្ពុជា សរសេរនៅលើទំព័រហ្វេសប៊ុកថា ករណីជនជាតិចិនជាង ២០នាក់ បានបង្ហោះវីដេអូនឹងបង្កភាពវឹកវរនៅខេត្តព្រះសីហនុ ក្នុងរយៈពេល ៣ឆ្នាំខាងមុខនោះ ស្ថានទូតចិនថា ពួកគេមិនមែនជាក្រុមសង្គមងងឹតបង្កបទឧក្រិដ្ឋអ្វីនោះទេ។
ស្ថានទូតចិន អះអាងថា វីដេអូដែលក្រុមជនជាតិចិនថតបង្ហោះព្រមានអុកឡុកនៅក្រុងព្រះសីហនុ ដោយសារ ពួកគេស្រវឹងស្រា ហើយការថតរបស់ពួកគេ គឺក្នុងគោលបំណងដើម្បីលេងសើចតែប៉ុណ្ណោះ។
ស្ថានទូត ចិន៖ «ក្រោយការស៊ើបអង្កេតយ៉ាងហ្មត់ចត់របស់សមត្ថកិច្ចចិន រកឃើញថា វីដេអូនេះត្រូវបានថតដោយជនជាតិចិនមកពីទីក្រុង Chongqing ដែលបានមកធ្វើការនៅប្រទេសកម្ពុជាកាលពីខែមីនា ឆ្នាំនេះ ហើយក្រោយពីស្រវឹងស្រារួច ពួកគេបានថតវីដេអូមិនល្អបែបនេះ ដោយគ្រាន់ជាការលេងសើចប៉ុណ្ណោះ។ បុគ្គលទាំងឡាយនៅក្នុងវីដេអូនេះ មិនមានជាប់ពាក់ព័ន្ធនឹងសង្គមងងឹតណាមួយទេ»។
យ៉ាងណាក៏ដោយ ស្ថានទូតចិនមិនបានបញ្ជាក់ថា ក្រុមជនជាតិចិនដែលថតវីដេអូបង្ហោះថានឹងបង្កអសន្តិសុខនៅខេត្តព្រះសីហនុ កាលពីពេលថ្មីៗនេះ ថា ពួកគេនៅក្នុងប្រទេសកម្ពុជា ឬក៏ត្រឡប់ទៅប្រទេសចិនវិញនោះទេ ។
ប្រធានផ្នែកស៊ើបអង្កេតរបស់អង្គការលីកាដូ លោក អំ សំអាត មានប្រសាសន៍ថា វីដេអូនៃក្រុមជនជាតិចិនទាំងនោះ បានបង្កភាពភ័យខ្លាចទៅដល់ប្រជាពលរដ្ឋ ហើយលោកជំរុញទៅរដ្ឋាភិបាលកម្ពុជាចាត់វិធានការឱ្យបានតឹងរ៉ឹងទៅលើលំហូរចូលនៃជនជាតិចិនចូលមកក្នុងប្រទេសកម្ពុជា។
លោក ថា៖ «កន្លងមក យើងជនជាតិចិនក៏មានប្រព្រឹត្តបទល្មើសច្រើនដែរ បើយើងនិយាយពីជនបរទេសដែលជាជនជាតិចិនហ្នឹង ហើយអ្នកដែលប្រព្រឹត្តបទល្មើសច្រើនជាងគេនៅកម្ពុជាទាំងប្រព័ន្ធឧក្រិដ្ឋអ៊ីនធឺណិត ក៏ដូចជា បទល្មើសផ្សេងៗហ្នឹង។ អ៊ីចឹង ទន្ទឹមនឹងការអភិវឌ្ឍដែលសំបូរដោយជនជាតិចិនចូលមកហ្នឹង អាជ្ញាធរគួរតែរឹតបន្តឹងបន្ថែមទៀត ចំពោះការរក្សាសន្តិសុខ សណ្ដាប់ធ្នាប់ ក៏ដូចជា ការចូលមកស្រុកខ្មែររបស់ជនជាតិចិន»។
ក្នុងវីដេអូឃ្លីបរយៈពេលប្រហែល១០វិនាទី ដែលត្រូវបានចែកចាយជាបន្តបន្ទាប់នៅលើបណ្ដាញសង្គម បុរសម្នាក់ស្ថិតក្នុងចំណោមក្រុមបុរសជនជាតិចិនជាង ២០នាក់ បាននិយាយជាភាសាចិន ដែលត្រូវបានបកប្រែមកជាភាសាខ្មែរថា ពួកគេជាជនជាតិចិនមកពីទីក្រុងឆុងជីង នឹងបង្កភាពវឹកវរនៅខេត្តព្រះសីហនុ ក្នុងរយៈពេល ៣ឆ្នាំខាងមុខនេះ ។
របាយការណ៍របស់អគ្គនាយកដ្ឋានអន្តោប្រវេសន៍ ក៏បង្ហាញផងដែរថា គិតត្រឹមខែតុលាឆ្នាំ២០១៨ ជនជាតិចិនដែលប្រព្រឹត្តខុសច្បាប់នៅកម្ពុជាមានចំនួន ៣៧៣នាក់ ក្នុងនោះមានស្រី ៦៦នាក់ ភាគច្រើនប្រព្រឹត្តបទល្មើស ២ប្រភេទ គឺបទល្មើសគំរាមជំរិត និងឆបោកតាមប្រព័ន្ធទូរគមនាគមន៍ (VOIP)។
ក្នុងពិធីជួបជាមួយពលរដ្ឋខ្មែរនៅក្នុងប្រទេសស្វីស កាលពីថ្ងៃទី២៤ ខែតុលា លោកនាយករដ្ឋមន្ត្រី ហ៊ុន សែន បានអំពាវនាវកុំឲ្យពលរដ្ឋព្រួយបារម្ភពីចំនួនជនជាតិចិននេះ។ លោក ហ៊ុន សែន អះអាងថា ចិនកំពុងតែបោះលុយវិនិយោគមកជួយសេដ្ឋកិច្ចរបស់កម្ពុជា ហើយថា ពលរដ្ឋចិននឹងត្រឡប់ទៅប្រទេសពួកគេវិញ ក្រោយពេលចប់ការងារ៕