ក្រុមហ៊ុន Google សម្រេចផ្អាកការផ្ទេរបច្ចេកវិទ្យាទាំង Software, Hardware និងសេវាកម្ម ដល់ក្រុមហ៊ុន Huawei ក្រោយពីសហរដ្ឋអាមេរិកបានដាក់បញ្ចូលក្រុមហ៊ុនចិនមួយនេះទៅក្នុងបញ្ជីខ្មៅ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ការផ្អាកនេះ នឹងរារាំងមិនឲ្យអ្នកប្រើប្រាស់ទូរសព្ទ Huawei ធ្វើបច្ចុប្បន្នភាពប្រព័ន្ធ Android បាននោះទេ។ សម្រាប់អតិថិជននាពេលអនាគតរបស់ក្រុមហ៊ុនទូសព្ទ Huawei ក៏មិនអាចប្រើប្រាស់សេវាកម្មរបស់ Google ដូចជា Google Play, Gmail, YouTube និងកម្មវិធីមួយចំនួនទៀតផងដែរ។
ទោះយ៉ាងណាក៏ដោយ អ្នកនាំពាក្យក្រុមហ៊ុន Google បានប្រាប់សារព័ត៌មានរ៉យទ័រ ថា ចំពោះអ្នកដែលកំពុងប្រើប្រាស់មុនពេលការផ្អាកនេះ នៅតែអាចធ្វើបច្ចុប្បន្នភាពកម្មវិធីនៅក្នុងទូរសព្ទរបស់ពួកគេបានដដែល។
ក្រុមហ៊ុន Google បានបញ្ជាក់ថា អ្វីដែលខ្លួនធ្វើឡើងនៅពេលនេះចំពោះក្រុមហ៊ុន Huawei គឺធ្វើតាមការកំណត់របស់សហរដ្ឋអាមេរិក។
តំណាងក្រុមហ៊ុន Huawei បានប្រាប់អ្នកសារព័ត៌មានកាលពីខែមីនា ថា ក្រុមហ៊ុនខ្លួនមានផែនការរួចរាល់ហើយក្នុងការប្រើប្រាស់ប្រព័ន្ធថ្មីមួយជំនួសប្រព័ន្ធ Android របស់ក្រុមហ៊ុនGoogle។ ប៉ុន្តែ បើតាមតំណាងក្រុមហ៊ុន Huawei នៅតែអះអាងថា ប្រព័ន្ធ Android និងWindow នៅតែជាជម្រើសដំបូងទី១ សម្រាប់ពួកគេ។
ក្រសួងពាណិជ្ជកម្មសហរដ្ឋអាមេរិក កាលពីថ្ងៃទី១៦ ខែឧសភា បានសម្រេចដាក់បញ្ចូលក្រុមហ៊ុន Huawei ទៅក្នុងបញ្ជីខ្មៅរបស់ខ្លួន។ ការសម្រេចបែបនេះ បានធ្វើឲ្យក្រុមហ៊ុនបច្ចេកវិទ្យាដ៏ធំរបស់ចិនមួយនេះ ពិបាកក្នុងការធ្វើការរកស៊ីជាមួយក្រុមហ៊ុននានារបស់អាមេរិក។ ក្រុមហ៊ុនរបស់អាមេរិក មិនអាចលក់បច្ចេកវិទ្យាទៅឲ្យក្រុមហ៊ុន Huawei បានទៀតនោះទេ ប្រសិនបើមិនមានចុះអាជ្ញាបណ្ណត្រឹមត្រូវដែលទទួលស្គាល់ដោយអាមេរិកនោះ។
ទោះយ៉ាងណាក៏ដោយ អ្នកប្រើប្រាស់ទូរសព្ទដៃនៅក្នុងប្រទេសចិននៅតែអាចធ្វើបច្ចុប្បន្នភាពកម្មវិធីរបស់ខ្លូនបាន ព្រោះថា ទូរសព្ទទាំងនោះមិនបានប្រើប្រាស់ប្រព័ន្ធ Android នោះទេ។ ប្រព័ន្ធដែលដំឡើងនោះ ត្រូវបានផលិតដោយក្រុមហ៊ុនក្នុងស្រុក។
បច្ចុប្បន្នកម្មវិធី Android របស់ក្រុមហ៊ុន Google មានអ្នកប្រើប្រាស់លើទូរសព្ទ Smartphones និងឧបករណ៍ដទៃទៀតចំនួនជាង ២ពាន់លាននាក់៕