អតីតមេឃុំ៣រូប និងជំទប់ទីមួយម្នាក់របស់គណបក្សសង្រ្គោះជាតិ ចូលបំភ្លឺនៅសាលាដំបូងខេត្តបាត់ដំបងនៅថ្ងៃនេះ តាមដីការកោះពាក់ព័ន្ធនឹងការចោទថា បានបំពានសាលដីកាតុលាការកំពូលចុះថ្ងៃទី១៦ ខែវិច្ឆិកា ឆ្នាំ២០១៧ ។
តុលាការកំពូល កាលពីពេលនោះ បានប្រកាសសាលដីការំលាយគណបក្សសង្គ្រោះជាតិ និងបង្គាប់មិនឲ្យមន្ត្រីបក្សនេះ ១១៨នាក់ធ្វើនយោបាយរយៈពេល៥ឆ្នាំ។
មេធាវី លោក សំ សុគង់ ដែលការពាក្តី ឱ្យ VOD ដឹងក្រោយចេញពីតុលាការថា អ្នកទាំង៤នាក់នេះ មានអតីតមេឃុំពាមឯក លោក ស៊ុន ចំរើន អតីតមេឃុំសំរោងក្នុង លោក ភឿក ឡុំ អតីតមេឃុំព្រែកហ្លួង អ្នកស្រី នី រំដួល និងជំទប់ទី១ ឃុំព្រែកនរិន្ទ លោក សុខ សុភ័ក្រ្ត ។
មេធាវីរូបនេះបន្តថា ក្នុងដំណាក់កាលទាញយកចម្លើយពីកូនក្តីនេះ តុលាការបានចោទសួរករណីកូនក្តីថតលើកដៃឡើងលើរួមគ្នាអំឡុងពិសាអាហារជុំគ្នា នៅផ្ទះអតីតប្រធានប្រតិបត្តិខេត្ត លោក ជា ជីវ និងអតីតចៅសង្កាត់អូចា កញ្ញា ស៊ិនចាន់ពៅ រ៉ូហ្សេត អំឡុងខែកក្កដា ឆ្នាំ២០១៨ មុនបោះឆ្នោតជាតិ។
លោកថា៖ «ខ្ញុំជាមេធាវីការពារពួកគាត់ ខ្ញុំយល់ឃើញថា ធាតុផ្សំនៃបទល្មើសទាក់ទិននឹងផ្លូវច្បាប់ វាមិនមែនជាការបំពានទេ។ វាជាការកម្រិតសិទ្ធិក្នុងការជួបជុំ សិទ្ធិបញ្ចេញមតិ និងសិទ្ធិចូលរួមសកម្មភាពក្នុងជីវិតនយោបាយ ដែលសិទ្ធិនេះ មានពីកំណើតដែលភ្ជាប់នឹងសិទ្ធិមនុស្សម្នាក់ៗ មានការការពារដោយច្បាប់ជាតិ និងអន្តរជាតិផងដែរ»។
បើតាមមេធាវីការពារក្តី គិតត្រឹមថ្ងៃអង្គារនេះ មន្ត្រីជាប់ឆ្នោតរបស់អតីតគណបក្សសង្គ្រោះជាតិ ៣៥នាក់ ត្រូវបានតំណាងអយ្យការអមសាលាដំបូងខេត្តបាត់ដំបង លោក គឺ ប៊ុណ្ណារ៉ា ចេញដីកាកោះហៅ។ លោកថា ២៦ចូលបំភ្លឺហើយ នៅ ៩នាក់ទៀត ត្រូវចូលបំភ្លឺនៅថ្ងៃទី២៤ សប្តាហ៍នេះ។
ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាបានចេញសេចក្តីថ្លែងការណ៍នៅថ្ងៃទី២១ ខែឧសភានេះ បញ្ជាក់ថា ខ្លួនកំពុងតាមដានដោយកង្វល់អំពីស្ថានភាពអតីតគណបក្សសង្គ្រោះជាតិដែលត្រូវបានកោះហៅ ឬឃុំខ្លួនដោយមន្ត្រីនគរបាល ឬតុលាការ។
សេចក្តីថ្លែងការណ៍ក៏បានយោងទៅលើការផ្តល់អនុសាសន៍ និងការព្រួយបារម្ភរបស់អ្នករាយការណ៍ពិសេស លោកស្រី រ៉ូណា ស្មីត ពីការយាយីទៅលើអតីតមន្ត្រីបក្សប្រឆាំងនេះដែរ។
លោកស្រី រ៉ូណា ស្មីត៖ «មានតម្រូវការផ្លាស់ប្តូរវប្បធម៌នយោបាយតែមួយ ដែលផ្តោតទៅលើបញ្ហាជាជាងផ្តោតតែលើបុគ្គល។ ករណីនេះរួមជាមួយការការពារដោយច្បាប់នៃសេរីភាពបញ្ចេញមតិ អាចជួយឱ្យមានភាពជោគជ័យលើបញ្ហាប្រឈមនានានៃស្ថានភាពនយោបាយបច្ចុប្បន្ន សម្រាប់ផលប្រយោជន៍ដល់ប្រជាពលរដ្ឋកម្ពុជាទាំងមូល»។
