នាវាចម្បាំងរបស់សហរដ្ឋអាមេរិកចូលទៅក្នុងដែនទឹកកំពុងមានជម្លោះនៅសមុទ្រចិនខាងត្បូងជាថ្មីទៀត ស្របពេលដែលសង្គ្រាមពាណិជ្ជកម្មរវាងប្រទេសទាំងពីរកាន់តែរាលដាលខ្លាំងឡើងពីមួយថ្ងៃទៅមួយថ្ងៃ។
កាលពីថ្ងៃចន្ទម្សិលមិញ នាវាចម្បាំងរបស់សហរដ្ឋអាមេរិកបានទៅដល់តំបន់ Scarborough Shoal ជាទីតាំងដែលចិនអះអាងថា ជាកម្មសិទ្ធិរបស់ខ្លួន។ ចិនប្រតិកម្មខ្លាំងចំពោះករណីនេះ ហើយថា អាមេរិកកំពុងតែឈ្លានពានដែនអធិបតេយ្យភាពរបស់ខ្លួន។ នេះបើតាមទីភ្នាក់ងារព័ត៌មាន រ៉យទ័រ។
បច្ចុប្បន្ន ចិន និងសហរដ្ឋអាមេរិក កំពុងតែប្រឈមលើបញ្ហាសមុទ្រចិនខាងត្បូង បញ្ហាសង្គ្រាមពាណិជ្ជកម្ម និងបញ្ហាអាមេរិកមានទំនាក់ទំនងជាមួយដែនដីតៃវ៉ាន់។
អ្នកនាំពាក្យកងទ័ពប្រជាជនចិន លោក Li Huamin បានព្រមានឱ្យនាវាចម្បាំងរបស់សហរដ្ឋអាមេរិកត្រូវប្រញាប់ចាកចេញពីទីតាំងនេះ។ លោកបន្តថា ការចាកចេញនាវាចម្បាំងរបស់អាមេរិកអាចនាំឱ្យមានសុវត្ថិភាពទាំងភាគីចិន និងសហរដ្ឋអាមេរិក។
ស្ថានភាពតានតឹងប្រទេសទាំងពីរគឺចាប់តាំងដើមខែនេះ ប្រធានាធិបតីអាមេរិក លោក ដូណាល់ ត្រាំ បានដំឡើងពន្ធទំនិញនាំចូលពីចិនរហូតដល់ ២០០ប៊ីលានដុល្លារ ចំណែកចិនវិញចាប់ផ្តើមដំឡើងពន្ធនាំចូលពីអាមេរិកដល់ ៦០ប៊ីលានដុល្លារ។ ចំណាត់ការនេះចាប់ផ្តើមនៅថ្ងៃទី១ ខែមិថុនា។
ជម្លោះពាណិជ្ជកម្មកើតឡើងតាំងពីខែកក្កដា ឆ្នាំ២០១៨មក។ ទោះជាថ្នាក់ដឹកនាំប្រទេសទាំងពីរខិតខំចរចាស្វែងរកដំណោះស្រាយញឹកញាប់ក៏ដោយ ក៏នៅតែមិនអាចស្វែងរកច្រកចេញបាន។
ថ្មីៗនេះ លោក ត្រាំ ក៏បានបញ្ជាឱ្យក្រុមហ៊ុនទូរគមនាគមន៍អាមេរិកទាំងអស់បញ្ឈប់ការរកស៊ីជាមួយក្រុមហ៊ុនបរទេស ដែលអាចនាំឱ្យប៉ះពាល់ដល់សន្តិសុខជាតិ។ ក្នុងស្ថានភាពនេះ ធ្វើឱ្យក្រុមហ៊ុនចិន និង ក្រុមហ៊ុនអាមេរិក កាន់តែពិបាកក្នុងការសហការគ្នា។
បើនិយាយពីស្ថានភាពសមុទ្រចិនខាងត្បូង គឺចិនបានកសាងមូលដ្ឋានទ័ពជាច្រើនកន្លែងនៅសមុទ្រចិនខាងត្បូង ក្នុងនោះរួមមានទាំងនៅកោះស្ព្រាតលី ជាកន្លែងកំពុងមានជម្លោះ។
ចំណែកនាវាចម្បាំងរបស់សហរដ្ឋអាមេរិកតែងតែធ្វើដំណើរទៅកាន់ទីតាំងសមុទ្រចិនខាងត្បូងនេះជាបន្តបន្ទាប់ ដោយអះអាងថា នេះជាដែនលំហសមុទ្រអន្តរជាតិ។ អាមេរិកបញ្ជាក់ថា ការធ្វើនាវាចរណ៍នេះ គឺដើម្បីលើកកម្ពស់សិទ្ធិសេរីភាពក្នុងការបើកនាវាជាអន្តរជាតិ។
អ្នកនាំពាក្យក្រសួងការបរទេសរបស់ចិន លោក Lu Kang ថ្លែងថា អាមេរិកត្រូវបញ្ឈប់សកម្មភាពនេះជាបន្ទាន់។ លោកបញ្ជាក់ថា សកម្មភាពរបស់អាមេរិកនេះអាចធ្វើឲ្យប្រទេសទាំងពីរមានការឈឺចាប់ដូចគ្នា។
មិនទាន់មានការបកស្រាយជាផ្លូវការសារជាថ្មីទៀតរបស់សហរដ្ឋអាមេរិកលើសកម្មភាពនេះនៅឡើយទេ។
កាលពីពេលថ្មីៗនេះ នាវាចម្បាំងរបស់បារាំងជាសម្ព័ន្ធមិត្តរបស់អាមេរិកក៏បានចូលទៅដែនទឹកមានជម្លោះនៅសមុទ្រចិនខាងត្បូងនេះដែរ គឺក្នុងគោលបំណងដូចអាមេរិកដែរ ដើម្បីធានាសេរីភាពការធ្វើនាវាចរណ៍លើច្រកអន្តរជាតិ។