គណៈកម្មាធិការជាតិរៀបចំការបោះឆ្នោត រៀបចំបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ នៅថ្ងៃអាទិត្យទី២៦ ខែឧសភានេះ ដែលមានគណបក្សនយោបាយចំនួន៧ចូលរួមប្រកួតប្រជែង។
គណបក្សនយោបាយចំនួន៧ដែលចូលរួមប្រកួតប្រជែងការបោះឆ្នោតនេះ រួមមាន គណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សខ្មែររួបរួមជាតិ គណបក្សខ្មែរសាធារណរដ្ឋ គណបក្សយុវជនកម្ពុជា គណបក្សឆន្ទៈខ្មែរ និងគណបក្សសញ្ជាតិកម្ពុជា។
ប៉ុន្តែ ក្នុងចំណោមគណបក្សទាំង៧នេះ មានតែគណបក្សចំនួន៣ដែលដាក់ភ្នាក់ងារសង្កេតការណ៍ការបោះឆ្នោតគឺ គណបក្សប្រជាជនកម្ពុជា មានភ្នាក់ងារចំនួន ១ ០៨៤នាក់ គណបក្សហ្វ៊ុនស៊ិនប៉ិច ចំនួន ៣០នាក់ និងគណបក្សខ្មែររួបរួមជាតិ ចំនួន ៣៨នាក់។
បើតាមសេចក្ដីប្រកាសព័ត៌មានរបស់ គ.ជ.ប ការបោះឆ្នោតក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ អាណត្តិទី៣ ប្រព្រឹត្តទៅនៅថ្ងៃអាទិត្យ ទី២៦ ខែឧសភានេះ ធ្វើឡើងជាអសកល ដែលបោះឆ្នោតដោយអង្គបោះឆ្នោតចំនួន ១១ ៥៧២នាក់នៅទូទាំងប្រទេស។
ការបោះឆ្នោតនេះធ្វើឡើងខុសពីការបោះឆ្នោតផ្សេងៗទៀត ដោយសារអ្នកបោះឆ្នោតត្រូវបោះពីរសន្លឹក ដើម្បីជ្រើសរើសក្រុមប្រឹក្សា ២ប្រភេទផ្សេងគ្នាក្នុងការិយាល័យបោះឆ្នោតតែមួយ ហើយមានហិបឆ្នោតចំនួន២ បន្ទប់សម្ងាត់ចំនួន២ និងត្រាសម្ងាត់ចំនួន២ផងដែរ។
