ស្នងការនគរបាលខេត្តកំពង់ចាម បានលើកឡើងថា សមត្ថកិច្ចមិនដែលព្រងើយកន្តើយចំពោះករណីស្លាប់កូនអតីតមន្ត្រីមូលដ្ឋានបក្សប្រឆាំង លោក ទិត្យ រ៉ន នោះឡើយ ដោយថា ការស៊ើបអង្កេតនោះ ធ្វើឡើងមុនពេលមានការជំរុញពីមជ្ឈដ្ឋានមួយចំនួនទៀតផង។
ស្នងការរងទទួលបន្ទុកផ្នែកព្រហ្មទណ្ឌនៃស្នងការដ្ឋាននគរបាលខេត្តកំពង់ចាម លោក ហេង វុទ្ធី អះអាងថា សមត្ថកិច្ចបានបើកការស៊ើបអង្កេតករណីស្លាប់លោក ទិត្យ រ៉ន ហើយក៏ត្រៀមបញ្ជូនឯកសារភស្តុតាងទាំងអស់ទៅគណៈកម្មការក្រសួងមហាផ្ទៃនៅថ្ងៃស្អែកនេះ។
យ៉ាងនេះក្តី ស្នងការរងដដែល មិនទាន់អាចបង្ហាញអំពីលទ្ធផលនៃការស៊ើបអង្កេតនោះបាននៅឡើយទេ។
លោកបន្តថា៖ «តាមពិតយើងចំណាត់ការរឿងហ្នឹងតាំងពីមុនម្លេះ មិនមែនចាំដល់ពេលគេប្តឹងហើយបានចេញធ្វើទេ។ យើងបានធ្វើរួចទៅហើយ យើងបានចេញរួចទៅហើយ ហើយឥឡូវនេះ យើងបានធ្វើចេញឱ្យអស់ ដោយប្រមូលភស្តុតាងទាំងអស់ បង្ហាញទៅគាត់ (ក្រសួងមហាផ្ទៃ) ដើម្បីឱ្យបានដឹងរឿងហ្នឹងបណ្តាលមកពីយ៉ាងម៉េច។ អ៊ីចឹង ស្អែកនេះគឺគណៈកម្មការទាំងអស់ដែលមានក្រសួងមហាផ្ទៃដឹកនាំមកហ្នឹងគឺអនុវត្តហើយ។ អនុវត្តជាក់ស្តែងឱ្យឃើញតែម្តង។ អ៊ីចឹងលទ្ធផលនឹងចេញស្អែកទាំងអស់ »។
លោក ទិត្យ រ៉ន មានអាយុ ៣៧ឆ្នាំ ជាអតីតមន្ត្រីសង្កេតការណ៍បោះឆ្នោតក្រុមប្រឹក្សាជ្រើសរើសឃុំ-សង្កាត់ ឆ្នាំ២០១៧ មកពីគណបក្សសង្រ្គោះជាតិ។
ឪពុករបស់លោក ទិត្យ រ៉ន គឺលោក អៀម ទិត្យ ជាអតីតសមាជិកគណៈកម្មការប្រតិបត្តិគណបក្សសង្រ្គោះជាតិ ឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម ។
លោក ទិត្យ រ៉ន ត្រូវបានសមត្ថកិច្ចខេត្តកំពង់ចាម ចាប់ខ្លួនកាលពីថ្ងៃទី១៦ ខែមេសា ពាក់ព័ន្ធសំណុំរឿងបង្ករបួសស្នាមកាលពីជាង១០ឆ្នាំមុន។
ប៉ុន្តែពីរថ្ងៃ ក្រោយចាប់ខ្លួន ពោលគឺនៅថ្ងៃទី១៨ ខែមេសា មន្ត្រីពន្ធនាគារប្រាប់សាច់ញាតិឱ្យមកយកសពលោក ទិត្យ រ៉ន តែម្តង ដោយគ្រួសារធ្លាប់អះអាងថា សពមានស្នាមរបួសជាំជាច្រើនកន្លែង និងបាក់កថែមទៀតផង។
កាលពីថ្ងៃទី៣០ ខែមេសា ស្នងការនគរបាលខេត្តកំពង់ចាម លោក ឯម កុសល បានចេញរបាយការណ៍បំភ្លឺម្តងរួចមកហើយ ថាការស្លាប់របស់លោក ទិត្យ រ៉ន បណ្តាលមកពីរអិលដួលបោកក្បាលទៅនឹងជ្រុងអាងទឹកក្នុងបន្ទប់ឃុំខ្លួនបណ្តោះអាសន្ន នៅស្នងការដ្ឋាននគរបាលខេត្តនេះ កាលពីថ្ងៃទី១៧ ខែមេសា។
របាយការណ៍ដដែល អះអាងថា ក្នុងពេលឃុំខ្លួននៅបន្ទប់ស្នងការដ្ឋាននគរបាលខេត្ត សមត្ថកិច្ចមិនបានប្រើអំពើហិង្សា ឬធ្វើទារុណកម្មលើជនសង្ស័យឈ្មោះ ទិត្យ រ៉ន នោះឡើយ។
ប្អូនប្រុសបង្កើតរបស់លោក ទិត្យ រ៉ន គឺលោក ទិត្យ ចាន់ បានអះអាងថា ហេតុផលដួលបោកក្បាលនៅបន្ទប់ទឹកស្លាប់នោះ គឺជាហេតុផលមិនអាចទទួលយកបាន។ លោកស្នើជាថ្មីទៀត ឱ្យស្ថាប័នជំនាញស៊ើបអង្កេតឱ្យបានច្បាស់លាស់ ដើម្បីផ្តល់យុត្តិធម៌ដល់សពបងប្រុសរបស់លោក។
លោកបន្តថា៖ «ដួលណាស្លាប់? ដួលមិនស្លាប់ទេ គេដួលម៉ូតូ គេមិនងាប់ផង គ្រាន់តែបាក់ដៃបាក់ជើង។ ហើយនេះ គ្រាន់តែបន្ទប់ទឹកសោះ ទៅឱ្យដួលស្លាប់ឯណា? រួចដៃខ្លួន ភ្នែក ឡើងជាំអស់រលីងហើយ ដួលណាអ៊ីចឹង? បងខ្ញុំនៅឯណេះរកត្រី រកអី រាល់តែថ្ងៃសោះហ្នឹង រួចដល់ចាប់ពីរបីថ្ងៃ ស្លាប់ទៅអ៊ីចឹង»។
ប្រធានការិយាល័យផ្នែកអង្កេតរបស់អង្គការលីកាដូ លោក អំ សំអាត លើកឡើងថា ប្រសិនបើករណីនេះ ស្ថាប័នពាក់ព័ន្ធមិនអាចផ្តល់យុត្តិធម៌ដល់គ្រួសារ និងជនរងគ្រោះទេ គឺបង្ហាញអំពីការរំលោភសិទ្ធិមនុស្សនៅកម្ពុជាបន្តទៀត។
លោកបន្តថា៖ «ហើយបើសិនករណីនេះ យើងមិនបានបង្ហាញពីការវិវត្តទេ អាហ្នឹងគឺចាត់ទុកថា វាមានរឿងរំលោភសិទ្ធិមនុស្សហ្នឹងបន្តទៀត ដែលធ្វើឱ្យផលមិនចំណេញសម្រាប់កម្ពុជាយើងផងដែរ»។
កាលពីថ្ងៃទី១៨ ខែឧសភា សហរដ្ឋអាមេរិក បានចេញសេចក្តីថ្លែងការណ៍មួយ អះអាងថា ខ្លួនបារម្ភយ៉ាងខ្លាំងចំពោះការស្លាប់របស់ ទិត្យ រ៉ន ដែលជាសមាជិកគណបក្សសង្គ្រោះជាតិ ក្នុងពេលលោកស្ថិតក្រោមការឃុំឃាំងរបស់នគរបាល។
សហរដ្ឋអាមេរិក ក៏បានអំពាវនាវឲ្យមានការស៊ើបអង្កេតឯករាជ្យជាបន្ទាន់មួយ ចំពោះហេតុការណ៍ដែលឈានទៅដល់ការចាប់ខ្លួន និងការស្លាប់សមាជិកគណបក្សប្រឆាំងរូបនេះផងដែរ៕