ក្រុមហ៊ុនធំៗមួយចំនួនរបស់ជប៉ុន មានគម្រោងផ្លាស់ប្តូរទីតាំងផលិតកម្មរបស់ពួកគេពីប្រទេសចិនទៅកាន់ប្រទេសផ្សេង ដើម្បីកាត់បន្ថយការចំណាយពន្ធនៅពេលនាំចូលសហរដ្ឋអាមេរិក។
កាលពីថ្ងៃទី១០ ខែឧសភា ខណៈដែលក្រុមអ្នកចរចារបស់អាមេរិក និងចិនកំពុងពិភាក្សាស្វែងរកដំណោះស្រាយបញ្ហាជម្លោះពាណិជ្ជកម្ម លោក ដូណាល់ ត្រាំ បានប្រកាសស្នើដំឡើងពន្ធទំនិញនាំចូលពីចិនរហូតដល់ ២៥ភាគរយ។ ការដំឡើងពន្ធដំណាក់កាលទី៤របស់សហរដ្ឋអាមេរិកនេះ នឹងប៉ះពាល់ដល់ទំនិញដែលផលិតនៅក្នុងប្រទេសចិនជាច្រើនដែលក្នុងនោះក៏មានផលិតផលរបស់ក្រុមហ៊ុនជប៉ុនផងដែរ។ នៅពេលដែលមានការដំឡើងពន្ធចូលជាធរមាន ទំនិញរបស់ជប៉ុនផលិតនៅប្រទេសចិននឹងឡើងថ្លៃក្នុងទីផ្សារសហរដ្ឋអាមេរិក ដែលនាំឲ្យការលក់មានការធ្លាក់ចុះ។ ដោយសារតែមូលហេតុនេះហើយ ទើបក្រុមហ៊ុនជប៉ុនមួយចំនួនសម្រេចចិត្តចាកចេញពីប្រទេសចិន។
តាមការចុះផ្សាយរបស់សារព័ត៌មាន Straits Times ក្រុមហ៊ុនជប៉ុនភាគច្រើនបានផ្លាស់ប្តូរទីតាំងទៅប្រទេសក្នុងតំបន់អាស៊ីអាគ្នេយ៍មួយចំនួនដូចជា ថៃ វៀតណាម និងម៉ាឡេស៊ី ជាដើម។
ការដំឡើងពន្ធរបស់សហរដ្ឋអាមេរិកដំណាក់កាលទី៤នេះ ប៉ះពាល់ទំនិញដែលប្រើប្រាស់ជាច្រើនប្រភេទដែលផលិតដោយក្រុមហ៊ុនជប៉ុន ដូចជា ទូរសព្ទ កុំព្យូទ័រ នាឡិកាដៃ និងសម្លៀកបំពាក់ជាដើម។
ប្រភពដដែលឲ្យដឹងថា ក្រុមហ៊ុនផលិតសម្ភារអេឡិចត្រូនិក Casio Computer កំពុងតែធ្វើការលើគម្រោងក្នុងការផ្ទេរទីតាំងផលិតនាឡិកាដៃ និងឧបករណ៍តន្រ្តីទៅប្រទេសថៃ និងជប៉ុនវិញ។ ក្រុមហ៊ុននេះ បញ្ជាក់ថា ការដំឡើងពន្ធរបស់អាមេរិកអាចធ្វើឲ្យពួកគេខាតបង់ប្រហែលជា ៩លានដុល្លារ។
ចំណែកឯក្រុមហ៊ុន Ricoh ដែលផលិតម៉ាស៊ីនបោះពុម្ពលក់ឲ្យសហរដ្ឋអាមេរិកវិញ កំពុងរៀបចំរើទីតាំងរបស់ខ្លួនទៅកាន់ប្រទេសថៃដែរ។
ប្រភពពី Straits Times ដដែល ឲ្យដឹងបន្តថា ក្រុមហ៊ុនសម្លៀកបំពាក់ដ៏ធំរបស់ជប៉ុនគឺ Uniqlo ក៏បានពិភាក្សាពីការផ្លាស់ប្តូរទីតាំងរោងចក្រទៅកាន់ប្រទេសបង់ក្លាដេស និងវៀតណាមផងដែរ។ ជាមួយគ្នានេះ ក្រុមហ៊ុន Panasonic បានដូរទីតាំងរោងចក្រមួយចំនួនរបស់ខ្លួនមកប្រទេសថៃ និងម៉ាឡេស៊ីរូចស្រេចហើយ។
ទោះយ៉ាងណាក៏ដោយ ក្រុមហ៊ុនមួយចំនួនរបស់ជប៉ុនដូចជា Nintendo Switch ជាដើម នៅតែស្ទាក់ស្ទើរក្នុងការចាកចេញពីប្រទេសចិន ដោយសារតែពួកគេព្រួយបារម្ភពីថ្លៃចំណាយក្នុងការសាងសង់នៅលើទីតាំងថ្មី៕
