លោក ប្រាយុទ្ធ ចាន់អូចា ត្រូវបានសមាជិកសភាទាំងពីរថ្នាក់ កាលពីម្សិលមិញ បានបោះឆ្នោតឲ្យលោកក្លាយជានាយករដ្ឋមន្រ្តីទី២៩របស់ថៃ ក្រោមការរិះគន់ពីក្រុមបក្សប្រឆាំងថា មានការទិញទឹកចិត្តតំណាងរាស្រ្តមកពីបក្សផ្សេង។
តាមការចុះផ្សាយរបស់សារព័ត៌មាន The Nation របស់ថៃ លោក ប្រាយុទ្ធ ចាន់អូចា ត្រូវបានសមាជិករដ្ឋសភា និងព្រឹទ្ធសភា ៥០០នាក់ ក្នុងចំណោម ៧៥០នាក់ បោះឆ្នោតគាំទ្រ ខណៈគូប្រកួតរបស់លោកគឺ Thanathorn Juangroongruangkit ទទូលបានតែ ២៤៤សំឡេង ប៉ុណ្ណោះ។ ជ័យជំនះរបស់លោក ប្រាយុទ្ធ ចាន់អូចា នៅពេលនេះ មិនមានអ្វីភ្ញាក់ផ្អើលនោះទេ ព្រោះថា សមាជិកព្រឹទ្ធសភាទាំង ២៥០នាក់សុទ្ធតែត្រូវបានលោក ប្រាយុទ្ធ ចាន់អូចា តែងតាំងទាំងអស់។ ចំណែកឯសមាជិករដ្ឋសភា ២៥០នាក់ទៀត គឺមកពីបក្ស Palang Pracharat របស់លោក និងមកពីបក្សជាសម្ព័ន្ធមិត្តជិត ២០ផ្សេងទៀត ដែលក្នុងនោះក៏មានបក្សប្រជាធិតេយ្យរបស់អតីតនាយករដ្ឋមន្ត្រី អាប់ភីស៊ីត ផងដែរ។
កាលពីម្សិលមិញនេះ អតីតប្រធានបក្សប្រជាធិបតេយ្យ លោក អាប់ភីស៊ីត បានប្រកាសលាលែងចេញពីសមាជិករដ្ឋសភា បន្ទាប់ពីសមាជិកបក្សរបស់លោកប្រកាសចងសម្ព័ន្ធមិត្តជាមួយបក្សរបស់លោក ប្រាយុទ្ធ ចាន់អូចា។ លោក អាប់ភីស៊ីត បានលើកឡើងថា លោកមិនអាចក្បត់ឆន្ទៈរបស់ខ្លួន ហើយចូលទៅបោះឆ្នោតនៅក្នុងសភាគាំទ្រលោក ប្រាយុទ្ធ ចាន់អូចា ជានាយករដ្ឋមន្រ្តី ហើយក៏មិនអាចចូលទៅបោះឆ្នោតរើសអ្នកផ្សេងដែលផ្ទុយពីការសម្រេចរបស់បក្សលោកដែរ។ លោក បន្ថែមថា ជម្រើសមានតែមួយគត់សម្រាប់លោកនៅពេលនេះ គឺការលាលែងពីសមាជិកភាពសភា។
ចំណែកឯ Thanathorn ក៏មិនបានចូលរូមបោះឆ្នោតដែរ ព្រោះថា តំណែងជាតំណាងរាស្រ្តរបស់លោកត្រូវបានព្យួរ។
ក្រុមសមាជិករដ្ឋសភាមកពីបក្ស Future Forward របស់លោក Thanathorn និងបក្សដែលជាសម្ព័នមិត្ត ១៣ផ្សេងទៀត បានអះអាងថា ពួកគេត្រូវបានគេទាក់ទងដោយសន្យាផ្ដល់ជាប្រាក់រាប់លានបាតជាថ្នូរនឹងការបោះឆ្នោតឲ្យលោក ប្រាយុទ្ធ ចាន់អូចា។
អ្នកនាំពាក្យបក្ស Future Forward កញ្ញា Pannika Wanich ថា បក្សលោក ប្រាយុទ្ធ ដឹងច្បាស់ថា ចំនួនអាសនៈដែលមាននៅរដ្ឋសភាដែលមានតែ១៥០ និងអាសនៈព្រឹទ្ធសភា២៥០ មិនគ្រប់សម្រាប់បង្កើតរដ្ឋាភិបាលទេ។ បេក្ខជននាយករដ្ឋមន្រ្តីថ្មីត្រូវការសំឡេងយ៉ាងហោចណាស់ ៣៧៦ ពីសមាជិកសភាទាំងពីរថ្នាក់។ កញ្ញា បន្តថា ដោយសារតែមូលហេតុនេះហើយ ទើបក្រុមលោក ប្រាយុទ្ធ ចាន់អូចា ផ្ដល់ប្រាក់រាប់លានបាតដល់តំណាងរាស្រ្តដែលមកពីបក្សផ្សេងៗដើម្បីជាការដោះដូរ។
កញ្ញា Pannika Wanich អះអាងថា សមាជិករដ្ឋសភាមួយចំនួនត្រូវបានគេគំរាមកំហែងពីសុវត្ថិភាពទៀតផង ប្រសិនបើពួកគេមិនបោះឆ្នោតគាំទ្រលោក ប្រាយុទ្ធ ចាន់អូចា នោះទេ។
លោក ប្រាយុទ្ធ ចាន់អូចា បានឡើងកាន់អំណាចជានាយករដ្ឋមន្រ្តីថៃ នៅឆ្នាំ២០១៤ ក្រោយពីក្រុមយោធារបស់លោក បានធ្វើរដ្ឋប្រហារទម្លាក់លោកស្រី យីងឡាក់៕
