ការសិក្សាស្រាវជ្រាវមួយ បានរកឃើញថា ចំនួនសត្វ«ទ្រមាក់អណ្ដើក»នៅកម្ពុជា ដែលត្រូវបានចាត់ថ្នាក់ជាប្រភេទសត្វបក្សីជិតផុតពូជនៅលើពិភពលោកនោះ បានធ្លាក់ដល់ទៅជាង ៥០ភាគរយ នៅក្នុងរយៈពេល ៥ឆ្នាំចុងក្រោយមកនេះ។
ក្នុងសេចក្ដីប្រកាសព័ត៌មានចេញនៅថ្ងៃនេះ ក្រសួងបរិស្ថាន និងអង្គការអភិរក្សសត្វព្រៃកម្ពុជា (WCS) បានឲ្យដឹងថា ការសិក្សាស្រាវជ្រាវបានរកឃើញថា ចំនួន«សត្វទ្រមាក់អណ្ដើក ឬសត្វខ្សឹបឈ្មោល» បានថយចុះពីចំនួន ២១៦ក្បាលនៅឆ្នាំ២០១២ មកនៅត្រឹមចំនួន ១០៤ក្បាលប៉ុណ្ណោះកាលពីឆ្នាំ២០១៨កន្លងមក។
ការស្រាវជ្រាវនោះបានរកឃើញទៀតថា ចំនួនសត្វខ្សឹបនៅទូទាំងតំបន់អាស៊ីអាគ្នេយ៍ បានធ្លាក់ចុះដល់ទៅ ៥៥ភាគរយ ចាប់តាំងពីឆ្នាំ២០១២មក ហើយតំបន់សត្វខ្សឹបរស់នៅ ក៏បានធ្លាក់ចុះពីចំនួន ១០តំបន់នៅឆ្នាំ២០១២ មកនៅត្រឹមចំនួន ៤តំបន់កាលពីឆ្នាំមុន។
បើតាមសេចក្ដីប្រកាសព័ត៌មានដដែលនេះ ក្រសួងបរិស្ថាន និងអង្គការអភិរក្សសត្វព្រៃកម្ពុជា បានលើកឡើងថា សត្វខ្សឹបរស់នៅច្រើនបំផុតនៅស្រុកស្ទោង ស្ថិតក្នុងខេត្តកំពង់ធំ និងស្រុកជីក្រែង ក្នុងខេត្តសៀមរាប ដែលជាតំបន់ទំនាបភាគខាងជើងបឹងទន្លេសាប បន្ទាប់ពីតំបន់ទាំងពីរនេះ ត្រូវបានដាក់បញ្ចូលជាតំបន់ការពារទេសភាព។
អនុប្រធាននាយកដ្ឋានអភិរក្សតំបន់ដីសើមទឹកសាបរបស់ក្រសួងបរិស្ថាន លោក ហុង ចំណាន ដែលត្រូវបានដកស្រង់សម្ដីនៅក្នុងសេចក្ដីប្រកាសព័ត៌មាននោះ បានហៅការងារអភិរក្សសត្វស្លាបនៅតំបន់ទាំងពីរនោះថា ជា«ជោគជ័យធំធេង»។
លោក ហុង ចំណាន ឲ្យដឹងបន្ថែមថា មូលហេតុដែលធ្វើឲ្យសត្វខ្សឹបថយចុះនេះ បណ្ដាលមកពីកត្តាមនុស្ស និងបរិស្ថានជុំវិញខ្លួនវា ខណៈសត្វប្រភេទនេះបង្កើតកូនបានតែម្ដងប៉ុណ្ណោះក្នុងមួយឆ្នាំ ហើយក្នុងចំនួនតិចថែមទៀត។
លោក ហុង ចំណាន ប្រាប់ថា៖ «សត្វនេះ វាអត់អាចទំលើដើមឈើដូចសត្វស្លាបដទៃទេ។ អ៊ីចឹងហើយ ការពងកូនក៏ដូចជាធ្វើការបន្តពូជ វានៅផ្ទាល់ដី ដេកពួនដីនៅលើដីរហូត។ អ៊ីចឹង វាងាយក្នុងការគំរាមកំហែងអំពីឆ្កែ ឬសត្វពស់ សត្វអីផ្សេងៗ ដែលវាអាចថា ចាប់សត្វហ្នឹងស៊ី ឬក៏យកពងយកកូនរបស់សត្វហ្នឹង អីអញ្ចឹងណា»។
បើតាមលោក ចំណាន បច្ចុប្បន្ន បើទោះបីផ្ទៃដីអភិរក្សនៅជុំវិញបឹងទន្លេសាបមានទំហំដល់ទៅជាង ៣១ពាន់ហិកតាក៏ដោយ តែការផ្លាស់ទីរបស់សត្វនេះនៅពេលទឹកឡើងក៏ជាបញ្ហានៃការអភិរក្សផងដែរ។
ទីប្រឹក្សាបច្ចេកទេសរបស់អង្គការអភិរក្សសត្វព្រៃកម្ពុជា លោក ស៊ុំ ភារុណ កិច្ចការអភិរក្សសត្វខ្សឹប ត្រូវការជាចាំបាច់នូវការការពារតំបន់ស្មៅធម្មជាតិលិចទឹកនៅតាមបឹងទន្លេសាប។
លោក ស៊ុំ ភារុណ ត្រូវបានដកស្រង់សម្ដីដែលនិយាយថា៖ «ការពារតំបន់ស្មៅធម្មជាតិលិចទឹកនៅតាមតំបន់លិចទឹកបឹងទន្លេសាប គឺជាចំណាត់ការដ៏មានសារៈសំខាន់ ដើម្បីធានាដល់ការស្តារឡើងវិញ និងការរស់រៀនយូរអង្វែងរបស់សត្វដ៏កម្រទាំងនេះ»។
លោក ស៊ុំ ភារុណ បានប្រាប់ VOD ថា ការជួយសត្វនេះឲ្យមានចំនួនច្រើនវិញក្នុងមជ្ឈដ្ឋានរស់នៅរបស់ពួកវា ជាការលំបាកមួយដោយសារការងារអភិរក្សនេះ ត្រូវការការចូលរួមពីគ្រប់ភាគីពាក់ព័ន្ធទាំងអស់។
លោក ស៊ុំ ភារុណ៖ «យើងនឹងព្យាយាមឲ្យអស់ពីលទ្ធភាព ហើយខ្ញុំគិតថា តំបន់ដែលយើងបានធ្វើការងារ តំបន់ដែលយើងមានសកម្មភាព យើងគិតថា អាចសង្ឃឹមក្នុងការធានា តែសម្រាប់តំបន់ដែលយើងមិនទាន់មានសកម្មភាពការងារ ឬមិនទាន់ពង្រីកសកម្មភាពទៅដល់ទីតាំងហ្នឹង គឺយើងពិបាកសង្ឃឹមដែរ»។
បើតាមមន្ត្រីបរិស្ថាន សត្វទ្រមាក់អណ្ដើក ឬខ្សឹបនេះ ត្រូវបានចាត់ចូលជាសត្វជិតផុតពូជដែលត្រូវការការគាំពារបំផុត ខណៈនៅតំបន់អាស៊ីសត្វនេះឃើញមានតែប្រទេស ៣ប៉ុណ្ណោះ គឺកម្ពុជា នេប៉ាល់ និងឥណ្ឌា៕
