ប្រជាពលរដ្ឋ ២០០នាក់ នៅក្នុងស្រុកតំបែរ ខេត្តត្បូងឃ្មុំ បានប្រមូលផ្ដុំគ្នាតវ៉ានៅមុខសាលាដំបូងខេត្តនេះ ដើម្បីទាមទារឱ្យតុលាការទម្លាក់ចោលបណ្ដឹងទៅលើប្រជាសហគមន៍ដីធ្លីចំនួន ៨នាក់។
ការតវ៉ារបស់ប្រជាពលរដ្ឋនេះ ធ្វើឡើងបន្ទាប់ពីប្រជាសហគមន៍ដីធ្លីចំនួន ៨នាក់ ត្រូវបានតុលាការខេត្តត្បូងឃ្មុំ កោះហៅឱ្យចូលបំភ្លឺ នាថ្ងៃនេះ ក្រោមការចោទថា បានគំរាមកំហែងអ្នកដទៃ។
តំណាងសហគមន៍ដីធ្លី លោក សែម ចំណាន ដែលត្រូវចូលបំភ្លឺនៅថ្ងៃនេះ បានប្រាប់ វី.អូ.ឌី ថា តុលាការបានលើកពេលចូលបំភ្លឺទៅថ្ងៃក្រោយវិញហើយ ដោយមិនបានកំណត់ពីពេលវេលានោះទេ។
លោក សែម ចំណាន ប្រាប់ថា៖ «អត់ប្រាប់ពីមូលហេតុទេ ប៉ុន្តែ ខ្ញុំស្មាន គឺដោយសារមកពីប្រជាពលរដ្ឋមកច្រើន។ ប្រជាពលរដ្ឋទាមទារ ឱ្យមានដើមបណ្ដឹង ទាមទារឱ្យរកយុត្តិធម៌ ហើយមួយទៀត គាត់មកលើកទឹកចិត្តអ៊ីចឹង។ អត់បានជួបចៅក្រមទេ ជួបតែព្រះរាជអាជ្ញារងព្រោះព្រះរាជអាជ្ញាគាត់អ្នកហៅចូល ហើយគាត់ថា ចាំជួបចៅក្រមពេលក្រោយ»។
ក្នុងដីកាកោះចុះថ្ងៃទី២៣ ខែឧសភា ចៅក្រមស៊ើបសួរសាលាដំបូងខេត្តត្បូងឃ្មុំ អ្នកស្រី ហៃ ណៃហេង បានបង្គាប់ឱ្យប្រជាពលរដ្ឋចំនួន ៨នាក់ នៅភូមិស្រែប្រាំង ឃុំត្រពាំងព្រីង ចូលបំភ្លឺនៅតុលាការនៅថ្ងៃទី១០ ខែមិថុនា ឆ្នាំ២០១៩ ក្រោមការចោទថា បានគំរាមកំហែងអ្នកដទៃ។
លោក សែម ចំណាន អះអាងថា ដីព្រៃសហគមន៍ភូមិស្រែប្រាំង ត្រូវបានចុះបញ្ជីកាលពីឆ្នាំ២០០៤ គ្រប់លើផ្ទៃដីព្រៃទំហំ ៧៨៥ហិកតា ស្ថិតក្នុងឃុំត្រពាំងព្រីង ស្រុកតំបែរ ហើយបច្ចុប្បន្ននេះ មានប្រជាពលរដ្ឋចំនួន ១៣៩គ្រួសារ ប្រើប្រាស់ និងអាស្រ័យផលលើដីព្រៃសហគមន៍នោះ៕
