អតីតគណបក្សប្រឆាំង អំពាវនាវទៅពលរដ្ឋគ្រប់និន្នាការ និងគ្រប់គណបក្សនយោបាយឱ្យរួមកម្លាំងគ្នារក្សាប្រព័ន្ធអនុគ្រោះពន្ធ EBA របស់សហភាពអឺរ៉ុប និង GSP របស់សហរដ្ឋអាមេរិក។
សេចក្តីថ្លែងការណ៍ចុះថ្ងៃទី៩ ខែមិថុនា អតីតគណបក្សប្រឆាំង បញ្ជាក់ថា ការអំពាវនាវនេះធ្វើឡើង«ដើម្បីបញ្ចៀសនូវការឈឺចាប់ និងសេចក្តីទុក្ខលំបាករបស់ពលរដ្ឋខ្មែរ»។
សេចក្តីថ្លែងការណ៍ដដែល ក៏ប្រាប់ពីគម្រោងវិលត្រឡប់របស់ថ្នាក់ដឹកនាំមួយចំនួនដែលបាននិរទេសខ្លួន ថានឹងវិលចូលកម្ពុជាវិញឆាប់ៗផងដែរ ។
បើតាមសេចក្តីថ្លែងការណ៍នេះ ដំណើរនិវត្តន៍នេះដើម្បីតស៊ូនយោបាយដោយអហិង្សានៅក្នុងប្រទេស ទាមទារឱ្យដោះលែងលោក កឹម សុខា និងជំរុញស្តារប្រជាធិបតេយ្យឡើងវិញ ដើម្បីបញ្ចៀសការកាត់ផ្តាច់ប្រព័ន្ធអនុគ្រោះពន្ធពីសហរដ្ឋអាមេរិក និងសហភាពអឺរ៉ុប។
សហភាពអឺរ៉ុប នៅសប្តាហ៍មុននេះ បានបញ្ចប់បេសកកម្មស្វែងរកការពិតពីស្ថានភាពសិទ្ធិមនុស្សនិងលទ្ធិប្រជាធិបតេយ្យនៅកម្ពុជា លើវិធានការព្យួរប្រព័ន្ធអនុគ្រោះពន្ធ EBA។
ចំណែកប្រព័ន្ធអនុគ្រោះពន្ធ GSP របស់សហរដ្ឋអាមេរិក កំពុងគំរាមកំហែងដកវិញ ក្រោយពីសមាជិកសភាអាមរិកពីររូបស្នើសុំព្យួរ ។
ការគំរាមកំហែងព្រមគ្នាផ្នែកប្រព័ន្ធអនុគ្រោះពាណិជ្ជកម្មទាំងនេះ បានកើតឡើងក្រោយពីប្លុកលោកសេរីជំរុញទៅរដ្ឋាភិបាលឱ្យដោះលែង លោក កឹម សុខា ឱ្យទម្លាក់បទចោទអ្នកនយោបាយប្រឆាំងទាំងអស់ និងទាមទារឱ្យមានការផ្សះផ្សាជាតិឡើងវិញ ជាដើម គ្មានចម្លើយវិជ្ជមានពីបក្សកាន់អំណាច។
ប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ ប្រាប់ VOD ថា ការបាត់បង់ប្រព័ន្ធអនុ គ្រោះពន្ធ ធ្វើឱ្យកម្ពុជាខាតបង់។ លោកថា ករណីនេះ គណបក្សលោកធ្លាប់បានជំរុញរួចហើយទៅរដ្ឋាភិបាល ដើម្បីកុំឱ្យបញ្ហានេះកើតឡើង។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ហៅសារអំពាវនាវនេះថា ជាល្បិចទាល់ច្រកថ្មីមួយទៀត ក្រោយពីអំពាវនាវទៅប្រជាពលរដ្ឋ និងកងទ័ពឱ្យចូលរួមផ្តួលរំលំរដ្ឋាភិបាលមិនបានជោគជ័យ។
ប៉ុន្តែ នៅពេលសួរថា តើគណបក្សកាន់អំណាច នឹងបង្ហាញជំហរយ៉ាងដូចម្តេចពាក់ព័ន្ធទៅនឹងលក្ខខណ្ឌប្រព័ន្ធអនុគ្រោះពន្ធនេះ។
លោកថា៖ «អាហ្នឹង យើងធ្វើតាមនីតិវិធីរបស់យើង ពីព្រោះការសម្រេចមិនមែនស្ថិតនៅលើយើងទេ តែរដ្ឋាភិបាលលោកកំពុងចាត់ចែងការងារហ្នឹង ស្របទៅតាមនីតិវិធី និងសមត្ថកិច្ចរបស់ក្រសួងពាក់ព័ន្ធ»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាសន៍ថា ការបាត់បង់ប្រព័ន្ធអនុគ្រោះផ្នែកពាណិជ្ជកម្ម វានឹងបង្កផលប៉ះពាល់ដល់សិទ្ធិរស់រានមានជីវិតរបស់ពលរដ្ឋច្រើនលាននាក់។
អ្នកឃ្លាំមើលរូបនេះ ផ្តល់ជាយោបល់ថា អ្នកនយោបាយគួរស្វែងរកដំណោះស្រាយរក្សាទុកប្រព័ន្ធអនុគ្រោះនេះ ដើម្បីជាប្រយោជន៍ជាតិ ជាជាងបណ្តែតបណ្តោយឱ្យជាតិបែកបាក់។
លោក ថា៖ «យើងមានការព្រួយបារម្ភ ព្រោះបើកាលណាយើងបាត់ EBA និង GSP អ្នកដែលទទួលរងផលប៉ះពាល់មុនគេហ្នឹង គឺកម្មករតាមរោងចក្រ ហើយបើកម្មករគាត់បាត់បង់ហើយក្រុមគ្រួសារគាត់ប៉ុន្មានលាននាក់ទៀតដែលត្រូវរងគ្រោះដោយសារការបាត់បង់ហ្នឹង»។
តាមលិខិតក្រុមអ្នកបញ្ជាទិញដែលបានផ្ញើទៅនាយករដ្ឋមន្ត្រីកម្ពុជា កាលពីដើមខែមេសា ឆ្នាំនេះ បង្ហាញថា ប្រព័ន្ធអនុគ្រោះពន្ធ EBA និង GSP ផ្តល់អត្ថប្រយោជន៍ដល់កម្ពុជាក្នុងការនាំទំនិញទៅលក់នៅទីនោះ គិតជាទឹកប្រាក់ ៨,៥ពាន់លានដុល្លារ ក្នុងឆ្នាំ២០១៨។ ទំហំពាណិជ្ជកម្មនេះស្មើនឹង ១ភាគ៣ ឬ ៣៨% នៃផលិតផលក្នុងស្រុកសរុប GDP របស់កម្ពុជា។