ទីក្រុងហុងកុងបានក្លាយទៅជាសមុទ្រខ្មៅហើយនៅរសៀលថ្ងៃអាទិត្យនេះ បន្ទាប់ពីមនុស្សរាប់ម៉ឺននាក់ស្លៀកពាក់ខោអាវខ្មៅ ចេញមកតវ៉ាយ៉ាងកកកុញនៅតាមដងផ្លូវនានានៅទីក្រុងមួយនេះ ដើម្បីទាមទារឲ្យមេដឹកនាំទីក្រុងមួយនេះចុះចេញពីតំណែង។ នេះបើតាមការផ្សាយរបស់សារព័ត៌មាន South China Morning Post។
សារព័ត៌មានមួយនេះ បានផ្សាយបន្តផ្ទាល់នូវទិដ្ឋភាពនៃក្រុមពលរដ្ឋហុងកុងរាប់ម៉ឺននាក់ ស្លៀកពាក់ខោវអាវខ្មៅ ដើរដង្ហែតាមដងផ្លូវនានាក្នុងទីក្រុងហុងកុង និងស្រែកថា «កុំបាញ់ យើងជាអ្នកហុងកុង»។
ទីភ្នាក់ងារព័ត៌មាន Reuters បានរាយការណ៍ថា បាតុករមានទាំងមនុស្សចាស់ យុវជន និងសមាជិកក្រុមគ្រួសារ ដែលបានដើរត្រៀមត្រានៅតាមដងវិថីនានា និងស្ថានីយ៍រថភ្លើង នៅក្នុងមជ្ឈមណ្ឌលហិរញ្ញវត្ថុមួយនេះ។
រូបថតនានា បង្ហាញបាតុករកាន់បដារសរសេរថា «ឈប់សម្លាប់យើងទៅ!» «គ្មានច្បាប់បត្យាប័ន គ្មានអំពើព្រៃផ្សៃរបស់ប៉ូលិស!»។
ក្រុមបាតុករទាំងនោះ បានចុះផ្លូវតវ៉ាយ៉ាងកកកុញបែបនេះ ដើម្បីទាមទារទៅមេដឹកនាំទីក្រុងហុងកុង ចុះចេញពីតំណែង តែមួយថ្ងៃប៉ុណ្ណោះក្រោយពីមេដឹកនាំទីក្រុងមួយនេះ បានសម្រេចផ្អាកផែនការបង្កើតច្បាប់បត្យាប័នដ៏ចម្រូងចម្រាស់៕