អាជ្ញាធរវៀតណាម បានសម្លាប់ជ្រូកជាង ២លាន ៥សែនក្បាល ដើម្បីកុំឱ្យជំងឺប៉េស្តជ្រូកអាហ្រ្វិកដែលកំពុងផ្ទុះឡើងរីករាលដាលកាន់តែខ្លាំង។
មន្រ្តីក្រសួងកសិកម្មរបស់វៀតណាមម្នាក់ ត្រូវបានសារព័ត៌មាន Straits Times របស់សឹង្ហបុរី ដកស្រង់សម្តីមកចុះផ្សាយថា ពេលនេះ ជំងឺប៉េស្តជ្រូកអាហ្រ្វិកបានកើតឡើងនៅទូទាំង ៦៣ខេត្តរបស់ប្រទេសកុម្មុយនីស្តមួយនេះ។ ទោះយ៉ាងណាក៏ដោយ មន្រ្តីវៀតណាមរូបនេះ អះអាងថា ប្រទេសរបស់លោកនឹងមិនប្រកាសភាពអាសន្ននោះទេ ដោយសារតែជំងឺនេះមិនមានផលប៉ះពាល់ដល់សុខភាពមនុស្សឡើយ។
ប្រជាជនវៀតណាម ប្រហែល ៣០លាននាក់ប្រកបរបរចិញ្ចឹមជ្រូកសម្រាប់លក់ និងទទួលទានក្នុងស្រុក។ សាច់ជ្រូក ជាប្រភេទសាច់ដែលជនជាតិវៀតណាមចូលចិត្តបរិភោគជាងគេ ដែលមានប្រហែល ៧៥ភាគរយនៃផលិតផលសាច់សរុបក្នុងប្រទេសនេះ។
ទោះយ៉ាងណាក៏ដោយ អ្នកជំនាញសេដ្ឋកិច្ចវៀតណាម លោក Can Van Luc អះអាងថា ការផ្ទុះជំងឺប៉េស្តជ្រូកអាហ្រ្វិក មិនទាន់ជះឥទ្ធិពលជាអវិជ្ជមានច្រើនដល់សេដ្ឋកិច្ចប្រទេសនេះនៅឡើយទេ។
កាលពីខែសីហាកន្លងទៅ ជំងឺប៉េស្តជ្រូកអាហ្រ្វិក បានរីករាលដាលក្នុងខេត្ត និងតំបន់ចំនួន២៥ នៅប្រទេសចិន ដែលពេលនោះអាជ្ញាធរចិនបានសម្លាប់ជ្រូកចោលរហូតដល់ ២០០លានក្បាល។
ភ្លាមៗក្រោយការផ្ទុះជំងឺនេះ អង្គការស្បៀងអាហារ និងកសិកម្ម ហៅកាត់ថា FAO បានព្រមានថាជំងឺប៉េស្តជ្រូកអាហ្វ្រិកដែលកើតឡើងនៅចិន អាចរីករាលដាលដល់ប្រទេសផ្សេងទៀតនៅតំបន់អាស៊ី។ អង្គការដដែលនេះ ឲ្យដឹងថា មេរោគប៉េស្តជ្រូកអាហ្វ្រិកជាមេរោគដែលធន់ខ្លាំងហើយអាចរស់នៅបានយូរ ពោលគឺវាអាចស៊ាំនឹងអាកាសធាតុក្តៅខ្លាំង ត្រជាក់ខ្លាំង ហើយមិនត្រឹមតែប៉ុណ្ណោះ វាថែមទាំងអាចរស់នៅបានក្នុងផលិតផលសាច់ជ្រូកក្រៀមទៀតផង។
បើតាមអង្គការស្បៀងអាហារ និងកសិកម្ម ជំងឺប៉េស្តជ្រូកអាហ្វ្រិក មិនបង្កផលប៉ះពាល់ដល់សុខភាពមនុស្សទេ។ ប៉ុន្តែ ពុំមានវ៉ាក់សាំងណាមួយដែលអាចចាក់ការពារជ្រូកមិនឲ្យឆ្លង និងកើតជំងឺនេះឡើយ។
ប៉េស្តជ្រូកអាហ្វ្រិក បានផ្ទុះខ្លាំងកាលពីទស្សវត្សឆ្នាំ១៩៦០ នៅអឺរ៉ុប និងអាមេរិក។ ដោយសារតែមានប្រវត្តិនៃការផ្ទុះ និងការសាយភាយនៅតំបន់ផ្សេងៗគ្នាបែបនេះ ទើបអង្គការស្បៀងអាហារ និងកសិកម្ម យល់ថា ជំងឺនេះអាចរីករាលដាលដល់ប្រទេសជិតខាង ជាពិសេសប្រទេសនៅតំបន់អាស៊ីអាគ្នេយ៍ និងឧបទ្វីបកូរ៉េ ព្រោះប្រទេសក្នុងតំបន់ទាំងនេះមានតម្រូវការសាច់ជ្រូកខ្ពស់៕