អ្នកជំនាញសិទ្ធិមនុស្សអង្គការសហប្រជាជាតិពីទីក្រុងហ្វឺណែវ អំពាវនាវជាថ្មីទៀតទៅរដ្ឋាភិបាលកម្ពុជា ឱ្យសន្ទនានយោបាយផ្តោតលើបញ្ហា សម្រាប់ជាមូលដ្ឋានគ្រឹះសន្តិភាពយូរអង្វែង។
សេចក្តីថ្លែងការណ៍ចុះថ្ងៃទី១៩នេះ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាលើកឡើងថា អ្នកជំនាញសិទ្ធិមនុស្សអន្តរជាតិមានកង្វល់ចំពោះសកម្មភាពរដ្ឋាភិបាលក្នុងការបំបិទសំឡេងដៃគូប្រជែងនយោបាយ។
កង្វល់នោះ អ្នកជំនាញសិទ្ធិមនុស្សអន្តរជាតិលើកឡើងថា បញ្ហាដែលខ្លួនព្រួយបារម្ភនោះមាន ការប្រើច្បាប់ព្រហ្មទណ្ឌដើម្បីកំណត់គោលដៅ បំភិតបំភ័យ ការចាប់ឃុំខ្លួនអតីតមន្ត្រីគណបក្សសង្គ្រោះជាតិ ការរឹតត្បិតសេរីភាពបញ្ចេញមតិ ការចោទប្រកាន់ពីបទញុះញង់ និងចោទថា រំលោភសាលដីការតុលាការកំពូលចុះថ្ងៃទី១៦ ខែវិច្ឆិកា ឆ្នាំ២០១៧។
សេចក្តីថ្លែងការណ៍នេះ បានដកស្រង់អនុសាសន៍ របស់អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត ដែលបានរំឭកអំឡុងបញ្ចប់បេសកកម្មនៅកម្ពុជា កាលពីថ្ងៃទី៩ ខែឧសភា ថា៖ «ដល់ពេលដែលរដ្ឋាភិបាលដឹកនាំផ្លាស់ប្តូរវប្បធម៌នយោបាយទៅជាកិច្ចសន្ទនាមួយដែលផ្តោតទៅលើបញ្ហា ជាជាងផ្តោតលើបុគ្គល ដែលជាវិធីមួយឈានទៅមុខ និងបង្កើតមូលដ្ឋានរឹងមាំសម្រាប់សន្តិភាពយូអង្វែង ការអភិវឌ្ឍប្រកបដោយចីរភាពនិងសិទ្ធិមនុស្សទាំងអស់គ្នា»។
យ៉ាងនេះក្តី នាយករដ្ឋមន្ត្រីកម្ពុជា លោក ហ៊ុន សែន ធ្លាប់ថ្លែងថា ចំណាត់ការនានារួមទាំង ចំណាត់ការរំលាយអតីតគណបក្សប្រឆាំងផង ថា ជាវិធានការច្បាប់ និងបានអំពាវនាវទៅអាជ្ញាធរ ឱ្យទប់ស្កាត់សកម្មភាពរបស់គណបក្សប្រឆាំងកុំឱ្យងើបរួចព្រមទាំងប្រើពាក្យធ្ងន់ៗថា «ងើបមួយវាយមួយ» ដោយថា ដើម្បីការពារសន្តិភាព។