លោកនាយករដ្ឋមន្ត្រីអំពាវនាវដល់សប្បុរសជនឱ្យជួយជាថវិកាដល់ក្រុមគ្រួសារអ្នកបាត់បង់ជីវិត និង អ្នករងរបួសក្នុងហេតុការណ៍បាក់អគារនៅក្នុងខេត្តព្រះសីហនុ។
លោកនាយរដ្ឋមន្ត្រីបានសរសេរនៅលើហ្វេសប៊ុករបស់លោកថា លោកកំពុងតែធ្វើដំណើរទៅខេត្តព្រះសីហនុដើម្បីចូលរួមរុករក និងសង្គ្រោះករណីបាក់អគារ។ លោកក៏បានអំពាវនាវឱ្យសប្បុរសជនជួយក្នុងករណីនេះ។
លោក ហ៊ុន សែន៖ «ពេលនេះ ខ្ញុំកំពុងធ្វើដំណើរទៅកាន់ខេត្តព្រះសីហនុដើម្បីចូលរួមក្នុងកិច្ចខិតខំប្រឹងប្រែងរុករកនិងសង្រ្គាះជាបន្តជាមួយបងប្អូនដែលកំពុងធ្វើការនៅទីនោះស្រាប់។
ខ្ញុំសុំអំពាវនាវចំពោះសប្បុរសជនមេត្តាជួយជាថវិកាដល់គ្រួសារនៃអ្នកបាត់បង់
ជិវិតនិងអ្នករបួសក្នុងហេតុការណ៍នេះ។»
លោកនាយករដ្ឋមន្ត្រី ហ៊ុន សែន ក៏បានសម្រេចបញ្ជាឱ្យប្រើប្រាស់ថវិកាជាតិជួយឧត្ថម្ភដល់គ្រួសារដែលមានអ្នកស្លាប់ម្នាក់៤០លានរៀលឬ ស្មើនឹង១ម៉ឺនដុល្លារ។