អង្គការពលកម្មអន្តរជាតិហៅកាត់ថា ILO បានជំរុញដល់រដ្ឋាភិបាលឲ្យយកចិត្តទុកដាក់បន្ថែមលើសុវត្ថិភាពរបស់កម្មករក្រោយមានហេតុការណ៍បាក់អគារសង្កត់កម្មករសំណង់ស្លាប់កាលពីចុងសប្ដាហ៍មុន។
ក្នុងសេចក្តីថ្លែងការណ៍ចេញនៅថ្ងៃទី២៥ មិថុនា នេះ អង្គការ ILO បានសំដែងនូវការសោកស្ដាយចំពោះគ្រោះថ្នាក់ការងារដែលកើតឡើងនេះ ដោយជំរុញដល់រដ្ឋាភិបាលឲ្យមានវិធានការណ៍បន្ថែមទៀតដើម្បីជំរុញឲ្យមានការយកចិត្តទុកដាក់ចំពោះសុវត្ថិភាព និងសុខភាពរបស់កម្មករនៅកន្លែងធ្វើការរបស់ពួកគេ។
ក្នុងសេចក្តីថ្លែងការណ៍នោះលើកឡើងថា៖ «ការបាត់បង់ជីវិតនេះ គឺជាការរំលឹកមួយទៀតអំពីហានិភ័យដែលកម្មកររាប់ពាន់នាក់ប្រឈមមុខរាល់ថ្ងៃហើយទាមទារឱ្យមានវិធានការជាបន្ទាន់ដើម្បីលើកកម្ពស់សុវត្ថិភាព និងសុខភាពកម្មករនៅកន្លែងធ្វើការ »។
អង្គការនេះបានឲ្យជាយោបល់ថា រដ្ឋាភិបាល និងភាគីពាក់ព័ន្ធត្រូវធ្វើការជាមួយគ្នាក្នុងការពិនិត្យឡើងវិញនូវសេចក្តីណែនាំស្ដង់ដារសុខភាព និងសុវត្ថិភាពការងារ សុវត្ថិភាពនៃសំណង់ បង្កើនការត្រួតពិនិត្យកម្លាំងពលកម្ម និងមានយុទ្ធនាការគ្មានគ្រោះថ្នាក់នៅកន្លែងធ្វើការជាដើម ដើម្បីលើកកម្ពស់សុវត្ថិភាពការងារក្នុងវិស័យនេះ។
ក្នុងឆ្នាំ២០១៨កន្លងទៅ មានគ្រោះថ្នាក់ការងារកើតឡើងជាង២ម៉ឺន៥ពាន់ករណី ដែលបានបណ្ដាលឲ្យកម្មករបាត់បង់ជីវិតចំនួន២០០នាក់ និងជាង២ពាន់៧រយនាក់ទៀតរងរបួស៕