ក្រុមគ្រួសារអះអាងថា ពិធីរំឭកខួបគម្រប់៣ឆ្នាំនៃការបាញ់សម្លាប់លោក កែម ឡី ដែលគ្រោងធ្វើនៅសប្តាហ៍ក្រោយនេះ ធ្វើតូចជាងឆ្នាំមុន ដោយថា និមន្តព្រះសង្ឃតែ៦អង្គប៉ុណ្ណោះដើម្បីប្រារព្វពិធី។
ម្តាយបង្កើតលោក កែម ឡី គឺអ្នកស្រី ភោគ សេ ឱ្យដឹងថា ពិធីបុណ្យគម្រប់ខួប៣ឆ្នាំរបស់កូនប្រុស នឹងប្រារព្វធ្វើនៅស្រុកកំណើត ក្នុងខេត្តតាកែវដូចឆ្នាំមុនៗ ចាប់ពីថ្ងៃទី១០ ដល់១១ ខែកក្កដាឆ្នាំនេះ។
ស្ត្រីវ័យ៧៩ឆ្នាំរូបនេះ បញ្ជាក់ថា ឆ្នាំនេះ កម្មវិធីបុណ្យនិមន្តព្រះសង្ឃតែ៦អង្គប៉ុណ្ណោះ និងត្រៀមនំបញ្ចុក៣០០គីឡូ សម្រាប់ទទួលភ្ញៀវខណៈឆ្នាំមុននិមន្តព្រះសង្ឃដល់ទៅ៥២អង្គ។
ស្ត្រីវ័យចំណាស់រូបនេះ នៅតែមិនជឿថា ការបាញ់សម្លាប់កូនប្រុសរបស់គាត់នៅកណ្តាលទីក្រុងមានតែមនុស្សម្នាក់ដែលបានរៀបចំផែនការសម្លាប់។
អ្នកស្រីថា៖ «អ្នករកហ្នឹង រកឱ្យឃើញយុត្តិធម៌ឱ្យផង។ ខ្ញុំមិនថាអីទេ អ្នកដែលគេចាប់មកហ្នឹង។ ប៉ុន្តែ ខ្ញុំមិនជឿថា កូនខ្ញុំខ្ចីលុយ៣ពាន់ បានគេបាញ់សម្លាប់។ ខ្ញុំមិនជឿទេ កូនខ្ញុំទៅខ្ចីអីអាលុយ ៣ពាន់ហ្នឹង»។
បងស្រីលោក កែម ឡី គឺអ្នកស្រី កែម ថាវី ឱ្យដឹងដែរថា ការធ្វើពិធីបុណ្យតូចនៅឆ្នាំនេះ ដោយសារក្រុមគ្រួសារខ្វះខាត មិនចង់ឱ្យជំពាក់លុយគេដូចពេលមុនៗក្រោយបញ្ចប់ពិធីបុណ្យទៅ។
ស្ត្រីអាយុ៥៦ឆ្នាំរូបនេះ អះអាងថា បើអ្នកពាក់ព័ន្ធនៃអំពើឃាតកម្មនៅតែមិនត្រូវបានវែកមុខ វាហាក់នៅតែបង្កើតមន្ទិលសង្ស័យដល់ពលរដ្ឋច្រើនលាននាក់ដែលចូលចិត្តលោក កែម ឡី ផងដែរ។
អ្នកស្រីថា៖ «បើយើងមើលសន្ទុះកាលដែលគាត់ស្លាប់ បើយើងស្មានទៅចូល៣លានអ៊ីចឹង អាផលប៉ះពាល់ហ្នឹងវាអត់ក្រោមហ្នឹងទេ វាមានតែលើសហ្នឹងចូល៤ទៅ៥លានផងមិនដឹងគាត់មិនអស់ចិត្តដូចតែគ្នា គ្រាន់តែគាត់មិនមែនជាពោះមួយដូចយើងជាម៉ែ ជាបង ជាប្អូនប៉ុន្តែ តាមខ្ញុំមើលទឹកចិត្តរបស់គាត់មិនខុសពីពួកខ្ញុំទេ»។
ក្រុមយុវជន១០០រាត្រី និងជាអ្នកបន្តវេនពីលោក កែមឡី គឺលោក មួង សូនី អះអាងថា លោកសោកស្តាយ ដែលថា ៣ឆ្នាំមកនេះ រដ្ឋាភិបាលនៅតែមិនទាន់រកឃើញអ្នកនៅពីក្រោយការបាញ់សម្លាប់នេះមកផ្តន្ទាទោសបានក្រៅពីបុរសម្នាក់ដែលសមត្ថកិច្ចចោទថា ជាខ្មាន់កាំភ្លើង។
លោកថា៖ «ខ្ញុំគិតថា សំឡេងពលរដ្ឋតាមសង្គមហ្វេសប៊ុក តាមយូធូបអីនឹង វាជួយដាស់តឿនដែរ ដាស់តឿនទៅរដ្ឋាភិបាល ទៅក្រសួងយុត្តិធម៌ ទៅចៅក្រមគ្រប់ជាន់ថ្នាក់ហ្នឹងឱ្យភ្ញាក់ស្មារតីក្នុងការជំរុញឱ្យមានយុត្តិធម៌ក្នុងប្រទេសកម្ពុជាយើង កុំឱ្យវាដុនដាបអាក្រក់អាក្រីខ្លាំងពេក»។
លោក កែម ឡី ត្រូវខ្មាន់កាំភ្លើងបាញ់សម្លាប់នៅក្នុងស្តាម៉ាតមួយកន្លែងស្ថិតក្នុងស្ថានីយ៍ប្រេងឥន្ធនៈកាល់តិច ជាប់នឹងស្តុបបូកគោ រាជធានីភ្នំពេញ កាលថ្ងៃទី១០ ខែកក្កដា ឆ្នាំ២០១៦ ក្រោយពីលោក កែម ឡី បានវិភាគបន្ថែមលើរបាយការណ៍ស៊ើបអង្កេតរបស់អង្គការអន្តរជាតិ Global Witness ដែលលាតត្រដាងពីការក្តោបក្តាប់មុខជំនួញរបស់គ្រួសារ«ត្រកូលហ៊ុន»។
រហូតទល់ពេលបច្ចុប្បន្ន អាជ្ញាធរចាប់ខ្លួនបុរសម្នាក់ប៉ុណ្ណោះឈ្មោះ អឿត អាង ហៅ «ជួបសម្លាប់» ដោយកាត់ទោសឱ្យជាប់ពន្ធនាគារមួយជីវិត។
ការបាញ់សម្លាប់លោក កែម ឡី ស្ថិតក្នុងភាពចម្រូងចម្រាស ដែលអតីតមេដឹកនាំបក្សប្រឆាំង លោក សម រង្ស៊ី ចោទរដ្ឋាភិបាលថា ជាអ្នកនៅពីក្រោយឃាតកម្មនេះ។ ប៉ុន្តែ នាយករដ្ឋមន្ត្រី តាមរយៈមេធាវីបានដាក់ពាក្យប្តឹងលោក សម រង្ស៊ី ចំពោះការចោទនេះ ហើយទីបំផុត តុលាការបានកាត់ក្តីឱ្យលោកនាយករដ្ឋមន្ត្រីជាអ្នកឈ្នះក្តី។
យ៉ាងនេះក្តី លោកនាយករដ្ឋមន្ត្រីធ្លាប់ចូលបុណ្យ១ម៉ឺនដុល្លារ ដល់ក្រុមគ្រួសារសព ក្រោយពីប្អូនប្រុសលោក កែម ឡី គឺលោក កែម រិទ្ធិសិទ្ធ អះអាងថា ការធ្វើបុណ្យគម្រប់ខួប១ឆ្នាំ នៅឆ្នាំ២០១៧នោះ ជំពាក់លុយថ្លៃបបរ និងចំណាយផ្សេងៗ ៧៨០០ដុល្លារ។