រដ្ឋាភិបាលសហរដ្ឋអាមេរិកបានបញ្ជូនពលរដ្ឋខ្មែរចំនួន៣៧នាក់បន្ថែមទៀត មកដល់កម្ពុជាវិញនៅថ្ងៃនេះ ក្រោយពេលអនុវត្តទោសចប់ ពាក់ព័ន្ធបទឧក្រិដ្ឋផ្សេងៗ។
បើតាមអង្គការគាំពារពលរដ្ឋខ្មែរគ្មានទីពឹង (KVAO) គឺពលរដ្ឋខ្មែរទាំងនោះបញ្ជូនដល់កម្ពុជានៅម៉ោង៨ព្រឹក ថ្ងៃទី៤ ខែកក្កដានេះ។
នាយកប្រតិបត្តិអង្គការគាំពារពលរដ្ឋខ្មែរគ្មានទីពឹង លោក តាន់ សូនិក ឱ្យ វី.អូ.ឌី ដឹងនៅមុននេះបន្ដិចថា អង្គការលោកកំពុងទទួលអ្នកទាំង៣៧នាក់ដែលទើបតែមកដល់នៅព្រឹកនេះ ឱ្យស្នាក់នៅជាបណ្ដោះអាសន្ននៅអង្គការរបស់លោក ខណៈពួកគេមួយចំនួនមានសាច់ញាតិមកទទួលទៅស្នាក់នៅជាមួយ។
វី.អូ.ឌី មិនទាន់អាចទាក់ទងអគ្គនាយករងនៃអគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ លោក តុប នេត ដើម្បីសុំការអត្ថាធិប្បាយបាននៅឡើយទេ ត្រឹមរសៀលថ្ងៃទី៤ ខែកក្កដានេះ។ ប៉ុន្តែលោកបានបញ្ជាក់នៅល្ងាចថ្ងៃទី៣ ខែកក្កដា ម្សិលមិញថា អង្គភាពលោកតែងតែបានផ្ដល់ឯកសារបញ្ជាក់អត្តសញ្ញាណដល់ពលរដ្ឋខ្មែរដែលរងការបណ្ដេញចេញពីអាមេរិក ដើម្បីទទួលស្គាល់ពួកគេជាពលរដ្ឋខ្មែរជាផ្លូវការ។
សហរដ្ឋអាមេរិកបានបញ្ជូនជនភៀសខ្លួនកម្ពុជាដែលបានប្រព្រឹត្តបទល្មើសព្រហ្មទណ្ឌ មកកម្ពុជាវិញជាបន្តបន្ទាប់ ក្រោមកិច្ចព្រមព្រៀងរវាងរដ្ឋាភិបាលនៃប្រទេសទាំងពីរ ចាប់តាំងពីឆ្នាំ២០០២មក។
ប៉ុន្តែ ក្រោយពេលចំនួននៃពលរដ្ឋដែលរងការបណ្ដេញចេញកើនឡើងខ្លាំង ក្រោមរដ្ឋបាលលោក ត្រាំ ដែលរឹតបន្ដឹងការអនុវត្តច្បាប់អន្តោប្រវេសន៍ចាប់តាំងពីលោកចូលកាន់តំណែងមក លោក ហ៊ុន សែន បានប្រកាសជំហរមិនទទួលយកពលរដ្ឋខ្មែរដែលត្រូវបានរដ្ឋាភិបាលអាមេរិកបណ្ដេញចេញឡើយ។
ករណីនេះបានធ្វើឱ្យសហរដ្ឋអាមេរិកប្រកាសកាលពីខែកញ្ញា ឆ្នាំ២០១៧ ឈប់ផ្ដល់ទិដ្ឋាការដល់មន្ត្រីការទូតជាន់ខ្ពស់កម្ពុជា និងក្រុមគ្រួសាររបស់មន្ត្រីជាន់ខ្ពស់ទាំងនោះ ប្រសិនបើរដ្ឋាភិបាលមិនព្រមទទួលយកពលរដ្ឋកម្ពុជាដែលត្រូវបានបណ្ដេញចេញពីអាមេរិកនោះទេ។ ជាលទ្ធផល លោក ហ៊ុន សែន ក៏បានយល់ព្រមទទួលយកពួកគេវិញ ក្រោយរងសំពាធនេះ។
របាយការណ៍របស់អង្គភាពអនុវត្តច្បាប់អន្តោប្រវេសន៍ និងគយនៃសហរដ្ឋអាមេរិក ហៅកាត់ថា (ICE) បង្ហាញថា ក្នុងឆ្នាំ២០១៨ ពលរដ្ឋខ្មែរដែលត្រូវបានរដ្ឋាភិបាលអាមេរិកបណ្ដេញចេញមានចំនួនសរុប ១១០នាក់ ដែលកើនឡើងជិត៤ដង ពីឆ្នាំ២០១៧ ដែលកាលនោះមានតែ ២៩នាក់ប៉ុណ្ណោះ។
អ្នកនាំពាក្យ និងជាអតីតប្រធាន អង្គការគាំពារពលរដ្ឋខ្មែរគ្មានទីពឹង (KVAO) លោក ប៊ីល ហឺរ៉ដ (Bill Herod) ឱ្យដឹងក្នុងបទសម្ភាសន៍ជាមួយ វី.អូ.ឌី កាលពីពេលថ្មីៗនេះថា ចាប់តាំងពីអង្គការលោកត្រូវបានបង្កើតក្នុងឆ្នាំ២០០២មក អង្គការនេះបានទទួលជនជាតិខ្មែរដែលរងការបណ្ដេញចេញសរុប ៧០១នាក់ ដែលសុទ្ធសឹងជាជនភៀសខ្លួនជាមួយឪពុកម្ដាយរបស់ពួកគេ ក្រោយសម័យខ្មែរក្រហម ហើយបទល្មើសដែលពួកគេមួយចំនួនបានប្រព្រឹត្តបានកើតឡើងជាយូរមកហើយ ហើយខ្លះក៏បានអនុវត្តទោសចប់សព្វគ្រប់អស់ដែរ។ លោកបញ្ជាក់ថា អង្គការលោកត្រូវបានប្រាប់ឱ្យត្រៀមទទួលជនរងគ្រោះទាំងនោះសរុបរហូតដល់ ២០០នាក់ នៅឆ្នាំ២០១៩នេះ៕