មន្ត្រីជាន់ខ្ពស់នៃក្រសួងកសិកម្ម លើកឡើងថា មន្ត្រីជំនាញរបស់ខ្លួនរកមិនឃើញវីរុសប៉េស្តជ្រូកអាហ្រិ្វកក្នុងសត្វជ្រូកដែលលួចនាំចួលដោយខុសច្បាប់ពីវៀតណាម និងត្រូវបានចាប់បាននោះទេ ខណៈជំងឺនេះបានផ្ទុះក្នុងខេត្តជាប់ព្រំដែនវៀតណាម ចំនួន៤ក៏ដោយនោះ។
អគ្គនាយកនៃអគ្គនាយកដ្ឋានសុខភាព និងផលិតកម្មសត្វ លោក តាន់ ផាន់ណារ៉ា បានថ្លែងក្នុងសន្នីសីទសារព័ត៌មាននៅព្រឹកនេះថា ក្នុងរយៈពេល៦ខែ នៃឆ្នាំ២០១៩នេះ អាជ្ញាធរបានបង្ក្រាបបទល្មើសលួចនាំចូលសត្វជ្រូកខុសច្បាប់ចូលកម្ពុជាចំនួន៥៥ករណី ដែលមានចំនួនសត្វជ្រូកចំនួនជិត១៥០០ក្បាល។
លោក តាន់ ផាន់ណារ៉ា បញ្ជាក់ថា ក្នុងចំណោមជ្រូកដែលចាប់បានទាំងអស់នោះត្រូវបានអគ្គនាយកដ្ឋានយកឈាមទៅពិសោធទាំងអស់ ដែលជាលទ្ធផលគឺគ្មានសញ្ញាវិជ្ជមាននៃវីរុសប៉េស្តជ្រូកអាហ្រ្វិកនោះទេ។
លោកថា៖ «ជ្រូកទាំងអស់ហ្នឹងធ្វើតេស្តទៅ គឺអត់បានរកឃើញទេ យើងបានធ្វើតេស្តទាំងអស់ តែជាលទ្ធផលគឺអត់បានរកឃើញ (វីរុសប៉េស្តជ្រូកអាហ្វ្រិក) ទេ»។
ទោះជាយ៉ាងណា លោកបញ្ជាក់ថា រដ្ឋាភិបាលនៅតែបង្ហាញការព្រួយបារម្ភចំពោះបញ្ហានៃការលួចនាំចូលទាំងនេះដដែល។
បើតាមអគ្គនាយកដ្ឋានសុខភាព និងផលិតកម្មសត្វ ជំងឺប៉េស្តជ្រូកអាហ្វ្រិកនេះ ក្រៅពីចំលងតាមរយៈជ្រូកដែលមានជំងឺ វាអាចឆ្លងតាមសម្ភារ បរិក្ខារ មធ្យោបាយធ្វើដំណើរ កាកសំណល់អាហារដែលចំអិនមិនបានឆ្អិនល្អ និងឧបករណ៍ផ្សេងទៀតដែលមានមេរោគ ជាពិសេសចេញពីកន្លែងដែលផ្ទុះជំងឺ ជំងឺនេះក៏អាចឆ្លងតាមខ្យល់អាកាស តាមរយៈដង្កែទន់ សត្វល្អិតបឺតឈាម និងភ្នាក់ងារចម្លងផ្សេងទៀតមានដូចជា កណ្ដុរ ជាដើមផងដែរ។
ប្រធានសមាគមអ្នកចិញ្ចឹមសត្វ លោក ស្រ៊ុន ពៅ មានប្រសាសន៍ថា ខណៈដែលវៀតណាមមានជំងឺនេះឆ្លងស្ទើរពេញប្រទេសហើយនោះ ការដឹកជញ្ជូនសត្វជ្រូកពីប្រទេសនេះមិនមែនជាសត្វដែលមានសុវត្ថិភាពនោះទេ។ លោកព្រមានថា ប្រសិនជាមិនអាចទប់ស្កាត់ការលួចនាំចូលជ្រូកទាំងតូច និងធំនៅតាមព្រំដែនបាននោះទេ បញ្ហានេះនឹងផ្ទុះកាន់តែធ្ងន់ធ្ងរ។
លោកថា៖ «អត់ទេ! វាឆ្លងតែមួយទេ គឺការនាំចូល ប្រាកដជាឆ្លងតាមការនាំចូល។ […] ប៉េស្តជ្រូកអាហ្វ្រិកនេះ វាច្រើនកើតនៅកសិករខ្នាតតូចៗ វាមិនអាចកើតនៅកសិដ្ឋានខ្នាតធំៗទេ! វាមិនងាយដល់ភ្លាមៗទេ ដល់គង់តែដល់ទេ តែយូរ។ ដូច្នេះ នៅវៀតណាមសព្វថ្ងៃនេះ វាផ្ទុះដល់កសិដ្ឋានធំៗហើយ។ អញ្ចឹង សួរថា កម្ពុជាយើងសព្វថ្ងៃផ្ទុះប៉ុន្មានខេត្តហ្នឹង សួរថា យើងអាចនឹងការពារបានប៉ុន្មានទៀត»។
ក្រសួងកសិកម្ម កាលពីថ្ងៃទី០៨ ខែកក្កដា បានផ្ញើលិខិតទៅកាន់អភិបាលនៃខេត្តស្វាយរៀង និងតាកែវ ដើម្បីស្នើឲ្យមានការចាត់វិធានការទប់ស្កាត់ការនាំចូលសាច់ជ្រូកឈឺពីប្រទេសវៀតណាម និងហាមមិនឱ្យដឹកជ្រូក និងផលិតផលមានដើមកំណើតពីសត្វជ្រូកពីកន្លែងផ្ទុះជំងឺដឹកទៅកាន់តំបន់ផ្សេងៗទៀតផងដែរ។
បើតាមក្រសួង រហូតមកដល់ពេលនេះ មានជ្រូកដែលឆ្លងជំងឺប៉េស្តនេះងាប់ និងត្រូវបានសម្លាប់មានជាង២ពាន់ក្បាលហើយ ដែលក្នុងនោះជិត៨រយក្បាលត្រូវបានរដ្ឋាភិបាលយកទៅបំផ្លាញចោល ដែលគិតជាទឹកប្រាក់អស់ប្រមាណ៥០ម៉ឺនដុល្លារអាមេរិក៕
