ការិយាល័យមេដឹកនាំហុងកុង ច្រានចោលព័ត៌មានដែលចុះផ្សាយថា លោក ស្រី Carrie Lam បានស្នើសុំលាលែងពីតំណែងជាប្រមុខតំបន់ស្វយ័តនេះ។
ប្រធានការិយាល័យប្រមុខរដ្ឋាភិបាលហុងកុង លោក Eric Chan បានប្រាប់សារព័ត៌មាន South China Morning Post ដែលចុះផ្សាយនៅថ្ងៃនេះថា ពាក្យចចាមអារ៉ាម និងការចោទប្រកាន់ពីការលាលែងតំណែងរបស់លោកស្រី Carrie Lam ជាការលើកឡើងដែលគ្មានមូលដ្ឋាន។
កាលពីថ្ងៃអាទិត្យសប្តាហ៍មុន សារព័ត៌មាន Financial Times បានចុះផ្សាយថា លោកស្រី Carrie Lam បានសុំលាលែងតំណែងពីរបីដងរួចមកហើយ ក្នុងអំឡុងពេលមានបាតុកម្មតវ៉ាក្នុងទីក្រុងហុងកុងក្នុងរយៈពេលប៉ុន្មានសប្តាហ៍ចុងក្រោយនេះ ប៉ុន្តែ ការស្នើសុំនេះត្រូវបានរដ្ឋាភិបាលក្រុងប៉េកាំងបដិសេធ។
លោក Eric Chan បានអះអាង លោកស្រី Carrie Lam មិនដែលស្នើសុំ ឬបង្ហាញពីចេតនាណាមួយក្នុងការលាលែងពីតំណែងសោះឡើយ។
តាមការចុះផ្សាយរបស់សារព័ត៌មាន South China Morning Post ដដែល ព័ត៌មាននៃការលាលែងតំណែងរបស់លោកស្រី Carrie Lam ក៏ត្រូវបានសារព័ត៌មានចិនមួយចំនួនផ្សព្វផ្សាយផងដែរ ហើយក៏មិនមានជាលើកដំបូងដែរ ដែលរដ្ឋាភិបាលហុងកុងច្រានចោលព័ត៌មាននេះ។
ក្នុងយុទ្ធនាការរកសំឡេងឆ្នោតកាលពីឆ្នាំ២០១៧កន្លងទៅ លោកស្រី Carrie Lam បានសន្យាថា លោកស្រី នឹងចុះចេញពីតំណែង បើពលរដ្ឋហុងកុងភាគច្រើនចេញមុខប្រឆាំងនឹងការដឹកនាំរបស់ខ្លួន។
កាលពីខែមិថុនា និងដើមខែកក្កដានេះ ពលរដ្ឋហុងកុងបាននាំគ្នាចេញតវ៉ា ដោយស្នើឲ្យរដ្ឋាភិបាលទម្លាក់ចោលទាំងស្រុងសេចក្តីស្នើច្បាប់ធ្វើបត្យាប័នអ្នកទោស ស្នើឱ្យមេដឹកនាំហុងកុង លោកស្រី Carrie Lam ចុះចេញពីតំណែង និងស៊ើបអង្កេតការប្រើប្រាស់អំពើហិង្សារបស់ប៉ូលីសទៅលើក្រុមបាតុករ។
ជាលទ្ធផលនៅថ្ងៃទី៩ ខែកក្កដា លោកស្រី Carrie Lam បានប្រកាសលុបចោលសេចក្តីព្រាងច្បាប់ស្តីពីការធ្វើបត្យាប័ន។ មេដឹកនាំហុងកុងរូបនេះ អះអាងថា ក្នុងអាណត្តិរបស់លោកស្រី ច្បាប់នេះនឹងមិនមានឡើយ។
ទោះបីជាលោកស្រី Carrie Lam បានបញ្ជាក់ពីការរលត់ទៅនៃច្បាប់នេះយ៉ាងក្តី តែពលរដ្ឋហុងកុងនៅតែគិតថា ការប្រកាសរបស់មេដឹកនាំខ្លួនមិនស្មោះត្រង់នោះទេ។
កាលពីថ្ងៃចុងសប្តាហ៍មុន ក្រុមបាតុករជាង១១ម៉ឺននាក់ បានប្រមូលផ្តុំគ្នានៅសង្កាត់មួយដែលសម្បូរដោយជនជាតិចិនដីគោករស់នៅប្រកបរបររកស៊ី ដើម្បីប្រឆាំងនឹងច្បាប់ធ្វើបត្យាប័ន ប្រឆាំងជនជាតិចិនដីគោកដែលមករស់នៅ និងនាំទំនិញគេចពន្ធឆ្លងដែន និងទាមទារឲ្យលោកស្រី Carrie Lam ចុះចេញពីតំណែង។ ប៉ុន្តែ អាជ្ញាធរហុងកុងអះអាងថា អ្នកតវ៉ាមានជិត៣ម៉ឺននាក់ប៉ុណ្ណោះ។
ការតវ៉ា បានប្រែក្លាយជាអំពើហិង្សារវាងនគរបាល និងក្រុមបាតុករ។ មនុស្ស២២នាក់ត្រូវបានបញ្ជូនទៅមន្ទីរពេទ្យ។ ចំណែកឯបាតុករជាង៤០នាក់ត្រូវបានសមត្ថកិច្ចហុងកុងចាប់ខ្លួនពាក់ព័ន្ធនឹងកុបកម្មនេះ។ នេះបើតាមការចុះផ្សាយរបស់សាព័ត៌មាន Hong Kong Free Press៕