មន្រ្តីរដ្ឋបាលព្រៃឈើ ៣រូបនៅខេត្តភាគឦសានប្រទេសកម្ពុជា ត្រូវបានកោះហៅឲ្យចូលបំភ្លឺនៅចំពោះមុខកម្លាំងកងរាជអាវុធហត្ថ នៅពាក់កណ្តាលខែក្រោយនេះ ជុំវិញករណីបទល្មើសព្រៃឈើ។
ក្នុងដីកោះចំនួន ៣ ដាច់ដោយឡែកពីគ្នា ព្រះរាជអាជ្ញាសាលាដំបូងខេត្តមណ្ឌលគិរី លោក ហៀង សុភក្ត្រ បានកោះហៅនាយសង្កាត់រដ្ឋបាលព្រៃឈើរយ៉ លោក ហ៊ុន វណ្ណេ នាយកសង្កាត់រដ្ឋបាលព្រៃឈើស្រែសង្គមណងឃីលឹក លោក លឿង ភិរុណ នាយផ្នែករដ្ឋបាលព្រៃឈើកោះញែក លោក គង់ វិរៈ ឲ្យចូលឆ្លើយបំភ្លឺនៅបញ្ជាការដ្ឋានកងរាជអាវុធហត្ថខេត្ត នៅថ្ងៃទី២៤ ខែសីហាខាងមុខ។
បើតាមដីកាទាំងនោះ មន្ត្រីរដ្ឋបាលព្រៃឈើទាំង ៣រូបនេះ នឹងត្រូវបានកោះហៅទៅសាកសួរនាពេលខាងមុខ ទាក់ទងនឹងបទល្មើសព្រៃឈើដែលបានកើតឡើងនៅក្នុងដែនសមត្ថកិច្ចរបស់ពួកគេ។
វី.អូ.ឌី មិនអាចសុំការឆ្លើយតបពីមន្រ្តីរដ្ឋបាលព្រៃឈើទាំងបីនាក់នោះបានទេ ជុំវិញការកោះហៅឲ្យឆ្លើយបំភ្លឺពាក់ព័ន្ធបទល្មើសព្រៃឈើនេះ។
ក្នុងសន្និសីទកាសែតមួយនៅថ្ងៃនេះ អ្នកនាំពាក្យគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី ប្រាប់អ្នកសារព័ត៌មានថា សមត្ថកិច្ចកំពុងស្វែងរកចាប់ខ្លួនជនសង្ស័យពាក់ព័ន្ធបទល្មើសព្រៃឈើចំនួន ៩នាក់ទៀត បន្ទាប់សមត្ថកិច្ចបានចាប់ខ្លួនមនុស្ស ៤រូបហើយនៅខេត្តមណ្ឌលគិរី ក្នុងនោះមានទាំងឧកញ៉ា ស៊ឹង សំអុល ផងដែរ។
លោក អេង ហ៊ី បន្ថែមថា៖ «បុគ្គល ៩នាក់ ដែលពាក់ព័ន្ធទៀត ដែលជាជនសង្ស័យ គឺយើងបានស្វែងរក ប៉ុន្តែ គាត់បានរត់គេចខ្លួន។ ដូច្នេះ យើងបានធ្វើទៅតាមនីតិវិធី គឺសុំដីកាបញ្ជាចូលខ្លួនពីតំណាងអយ្យការសាលាដំបូងខេត្តមណ្ឌលគិរី ដើម្បីតាមចាប់ខ្លួនគាត់ ហើយបីនាក់ទៀត យើងកំពុងកោះហៅជាបន្តបន្ទាប់»។
មន្ត្រីពង្រឹងសិទ្ធិអំណាចសហគមន៍នៃសមាគមអាដហុក លោក ប៉ែន ប៊ុណ្ណារ៍ បានសាទរចំពោះចំណាត់ការរបស់សមត្ថកិច្ចដែលបានកោះហៅមន្រ្តីរដ្ឋបាលព្រៃឈើនៅមូលដ្ឋានមកសាកសួរនេះ ដោយលោកថា ប្រតិបត្តការបទល្មើសព្រៃឈើអាចដំណើរទៅបាន គឺមានការឃុបឃិតប្រព្រឹត្តបទល្មើស និងអំពើពុករលួយជាប្រព័ន្ធរវាងជនប្រព្រឹត្តបទល្មើសព្រៃឈើ និងអាជ្ញាធរពាក់ព័ន្ធ។
លោកបន្ថែមថា៖ «យើងមានការព្រួយបារម្ភថា តើសមត្ថកិច្ចមានសមត្ថភាពក្នុងការតាមចាប់ខ្លួនមន្រ្តី ៣នាក់ហ្នឹងមកឆ្លើយបំភ្លឺនៅមុខព្រះរាជអាជ្ញាបាន ឬអត់ ពីព្រោះមន្រ្តីបីនាក់ហ្នឹង អាចនឹងរកឃើញមន្រ្តីពាក់ព័ន្ធផ្សេងៗ ព្រោះយើងសង្ស័យថា មិនមែនមានតែមន្រ្តីប៉ុន្មាននាក់ហ្នឹងទេ ដែលធ្វើឲ្យមានប្រតិបត្តិការកាប់ និងដឹកឈើរហូតរាប់សិបឡានទៅក្រៅប្រទេស និងមានការផ្សព្វផ្សាយ ប៉ុន្តែ អត់មានការចាប់ខ្លួន។ អីចឹង ប្រសិនបើពុំមានការឃុបឃិតគ្នាជាប្រព័ន្ធប្រព្រឹត្តអំពើពុករលួយទេ បទល្មើសព្រៃឈើ មិនអាចដំណើរការទៅបានដោយជោគជ័យទេ»។
ឧកញ៉ា ស៊ឹង សំអុល និងមនុស្ស ៣នាក់ផ្សេងទៀត ត្រូវបានតុលាការឃុំខ្លួនបណ្តោះអាសន្ន ហើយរថយន្តដឹកឈើជាង ៤០គ្រឿងត្រូវបានក្រុមបង្ក្រាបព្រៃឈើរបស់រដ្ឋាភិបាល ដឹកនាំដោយមេបញ្ជាការកងរាជអាវុធហត្ថ លោក សៅ សុខា រឹបអូសយកកាលពីសប្ដាហ៍មុន នៅក្នុងប្រតិបត្តិការបង្ក្រាបបទល្មើសព្រៃឈើមួយកន្លែងនៅក្នុងខេត្តមណ្ឌលគិរី។
របាយការណ៍របស់កងរាជអាវុធហត្ថលើផ្ទៃប្រទេសបង្ហាញលើគេហទំព័រហ្វេសប៊ុករបស់ខ្លួនម្សិលមិញ ឲ្យដឹងថា រយៈពេលប៉ុន្មានថ្ងៃនេះ សមត្ថកិច្ចរបស់រដ្ឋាភិបាល បានប្រតិបត្តិការជាទ្រង់ទ្រាយធំនៅខេត្តជាប់ព្រំដែនមាន ខេត្តមណ្ឌលគិរី ខេត្តរតនគិរី ខេត្តក្រចេះ និងខេត្តស្ទឹងត្រែង រហូតមានការចាប់ខ្លួនមនុស្សជាច្រើននាក់ ព្រមទាំងមានដីកាកំពុងតាមចាប់អ្នកពាក់ព័ន្ធ និងរឹបអូសរថយន្តជាច្រើនគ្រឿងដុតបំផ្លាញចោលទៀតផង៕
