លោកនាយករដ្ឋមន្ត្រី ហ៊ុន សែន បានអំពាវនាវឲ្យបញ្ឈប់ការផ្សព្វផ្សាយនូវអ្វីដែលលោកហៅថា ព័ត៌មានក្លែងបន្លំដើម្បីប្រឆាំងនឹងកម្ពុជា បន្ទាប់ពីមានការចុះផ្សាយអំពីវត្តមានកងទ័ពចិននៅលើតំបន់ឆ្នេរសមុទ្ររបស់កម្ពុជា។
សារព័ត៌មានអាមេរិក The Wall Street Journal បានចុះផ្សាយកាលពីថ្ងៃម្សិលមិញថា កម្ពុជា-ចិន បានចុះហត្ថលេខាជាសម្ងាត់ជាមួយគ្នាកាលពីអំឡុងត្រីមាសទី២ នៃឆ្នាំ២០១៩កន្លងទៅ ដើម្បីផ្ដល់សិទ្ធិឱ្យប្រទេសចិនប្រើប្រាស់មូលដ្ឋានជើងទឹកមួយនៅឈូងសមុទ្រខ្មែរក្នុងរយៈពេល ៣០ឆ្នាំ។
The Wall Street Journal បានចុះផ្សាយថា៖ «កិច្ចព្រមព្រៀងនោះ គឺកម្ពុជាផ្តល់ឱ្យភាគីចិននូវសិទ្ធិផ្តាច់មុខ ធ្វើជាមូលដ្ឋានទាហានជើងទឹកចិនជាផ្នែកមួយនៅឈូងសមុទ្រខ្មែរ ហើយនៅជិតប្រលានយន្តហោះធំមួយ ដែលកសាងដោយចិន និងអនុញ្ញាតឱ្យចិនប្រើជាមូលដ្ឋានយោធារយៈពេល ៣០ឆ្នាំ ដាក់ទ័ព ដាក់គ្រឿងសព្វាវុធ កន្លែងចតនាវា ជាដើម»។
ប្រតិកម្មតបទៅនឹងការចុះផ្សាយនេះ លោកនាយករដ្ឋមន្ត្រី ហ៊ុន សែន បានច្រានចោលនូវព័ត៌មាននេះ ហើយអំពាវនាវឲ្យបញ្ឈប់ការផ្សាយនូវព័ត៌មានបែបនេះ ដែលលោកចាត់ទុកជាព័ត៌មានក្លែងបន្លំ។ នេះបើតាមការចុះផ្សាយរបស់សារព័ត៌មាន Fresh News ដែលបានសម្ភាសផ្ដាច់មុខជាមួយមេដឹកនាំកម្ពុជារូបនេះ។
លោក ហ៊ុន សែន ត្រូវបានដកស្រង់សម្ដីចុះផ្សាយថា៖ «តើកម្ពុជាត្រូវការវត្តមានយោធាចិនលើទឹកដីរបស់ខ្លួនដើម្បីអ្វី? យើងមិនដែលបានពិភាក្សាណាមួយជាមួយមេដឹកនាំចិននោះឡើយ កុំថាឡើយដល់មានចុះហត្ថលេខាលើកិច្ចព្រមព្រៀង។ ល្មមឈប់ប្រើព័ត៌មានក្លែងបន្លំអំពីវត្តមានកងទ័ពចិនលើទឹកដីកម្ពុជា ដើម្បីប្រឆាំងនឹងយើងហើយ»។
នេះមិនមែនជាលើកទីមួយទេដែលសហរដ្ឋអាមេរិក រួមទាំងប្រព័ន្ធផ្សព្វផ្សាយរបស់ខ្លួន បានចុះផ្សាយពីវត្តមានកងទ័ពចិនលើទឹកដីកម្ពុជានោះ។ កាលពីដើមខែនេះ សហរដ្ឋអាមេរិកក៏បានធ្វើការចោទសួរកម្ពុជាពីរឿងនេះដែរ ខណៈរូបថតដែលអាមរិកថតបានពីផ្កាយរណប បានដាក់ការសង្ស័យពីមូលដ្ឋានកងទ័ពចិនលើកោះមួយក្នុងខេត្តព្រះសីហនុ។
អ្នកនាំពាក្យក្រសួងការពារជាតិ លោក ឈុំ សុជាតិ ក៏ច្រានចោលនូវព័ត៌មាននេះផងដែរ ហើយចាត់ទុកការចោទប្រកាន់ម្ដងហើយម្ដងទៀតរបស់អាមេរិកនេះថា ជាចេតនាធ្វើឱ្យមានការភ័ន្តច្រឡំទៅលើអព្យាក្រឹតរបស់កម្ពុជា ដែលធ្វើឱ្យប៉ះពាល់ដល់សន្ដិសុខជាតិ និងស្ថិរភាពនៅក្នុងតំបន់។
លោក ឈុំ សុជាតិ ប្រាប់ថា៖ «ព័ត៌មានធ្វើឱ្យឈឺក្បាល វាអត់មានសោះ បែរជាធ្វើឱ្យមានបញ្ហាច្របូកច្របល់។ អស់ពីមួយដល់មួយ ធ្វើឱ្យមានការពិបាកក្នុងការសន្និដ្ឋានសភាពការណ៍ វាធ្វើឱ្យមានការភ័ន្តច្រលំ ឬក៏បង្កាច់បង្ខូចអំពីជំហររបស់កម្ពុជាដែលខំរក្សាភាពអព្យាក្រឹតរបស់ខ្លួន»។
អ្នកនាំពាក្យស្ថានទូតអាមេរិកប្រចាំកម្ពុជា លោកស្រី Emily Zeeberg បានឱ្យ VOD ដឹងតាមសារអេឡិចត្រូនិចអ៊ីម៉ែលថា សហរដ្ឋអាមេរិកកំពុងតាមដានពីការពិតនៃរឿងនេះ ដោយជំរុញដល់រដ្ឋាភិបាលកម្ពុជាឱ្យបង្ហាញតម្លាភាពនៃទំនាក់ទំនងយោធារវាងកម្ពុជា និងចិន ដើម្បីឱ្យប្រជាជនកម្ពុជា និងតំបន់ អាចយល់ពីផលប៉ះពាល់នៃទំនាក់ទំនងនេះ។
លោកស្រី Emily Zeeberg សរសេរថា៖ «យើងមានការព្រួយបារម្ភថា ជំហានណាមួយរបស់រដ្ឋាភិបាលកម្ពុជាដើម្បីឱ្យមានវត្តមានយោធាបរទេសនៅក្នុងប្រទេសកម្ពុជា នឹងគំរាមកំហែងដល់ការផ្សារភ្ជាប់គ្នា និងភាពស្និទ្ធស្នាលនៃប្រជាជាតិអាស៊ីអាគ្នេយ៍ក្នុងការសម្របសម្រួលការអភិវឌ្ឍក្នុងតំបន់ និងរំខានដល់សន្តិភាព និងស្ថិរភាពនៅអាស៊ីអាគ្នេយ៍»។
មាត្រា ៥៣ នៃរដ្ឋធម្មនុញ្ញកម្ពុជា បានហាមឃាត់នូវការចងសម្ព័ន្ធយោធា ឬកិច្ចព្រៀមព្រៀងយោធាណាមួយ ហើយហាមឃាត់ដាច់ខាតនូវមូលដ្ឋានយោធាបរទេសនៅលើទឹកដីកម្ពុជា លើកលែងតែស្ថិតនៅក្រោមក្របខណ្ឌនៃសំណូមពររបស់អង្គការសហប្រជាជាតិតែប៉ុណ្ណោះ។
អ្នកជំនាញគោលនយោបាយ និងជាសាស្ត្រាចារ្យផ្នែកការទូត និងកិច្ចការពិភពលោកនៃមហាវិទ្យាល័យ Occidental នៅសហរដ្ឋអាមេរិក លោក អៀ សុផល បានលើកឡើងប្រាប់ VOD ថា អត្ថបទសារព័ត៌មានខាងលើនេះ មិនទាន់បង្ហាញនូវភស្តុតាងច្បាស់លាស់នៅឡើយទេ ដើម្បីបញ្ជាក់អំពីវត្តមានយោធាចិននៅកម្ពុជានោះ។
លោក សុផល សរសេរថា៖ «បើសិនជាសហរដ្ឋអាមេរិកបានឃើញសេចក្តីព្រាងនៃកិច្ចព្រមព្រៀងនោះ តើច្បាប់ចម្លងនៅឯណា? វាជារឿងធម្មតាទេក្នុងការរក្សាភាពសម្ងាត់របស់ខ្លួន។ […] តើវាអាចទៅរួចទេ ដែលច្បាប់ចម្លងដែលបានចុះហត្ថលេខាជាមួយប្រទេសចិនមានតែភាសាចិន ហើយគ្មានភាសាខ្មែរ? ឬប្រហែលជាគ្រាន់តែជាភាសាអង់គ្លេសសម្រាប់មនុស្សគ្រប់គ្នា ដូច្នេះ ប្រទេសទាំងពីរអាចបដិសេធនូវអត្ថិភាពរបស់ខ្លួន» ។
ប៉ុន្តែ លោកព្រមានថា ប្រសិនជាប្រទេសមួយបណ្តោយឱ្យមហាអំណាចមួយមានមូលដ្ឋានទ័ពក្នុងប្រទេសខ្លួននោះ ប្រទេសនោះអាចក្លាយជាប្រទេសអាណានិគមរបស់ប្រទេសដែលដាក់ទ័ពលើ ឬក៏ជាក្លាយជាដែនដីបន្ថែមអំណាចឱ្យមហាអំណាចនោះផងដែរ។
កាលពីខែកុម្ភៈកន្លងទៅ ភ្នាក់ងារស៊ើបអង្កេតអាមេរិក បានចេញរបាយការណ៍មួយមានចំណងជើងថា «ការវាយតម្លៃពីការគំរាមកំហែងទូទាំងពិភពលោក» ដោយបានលើកឡើងថា ប្រទេសកម្ពុជាកំពុងធ្លាក់ទៅរករបបផ្ដាច់ការ ដែលស្ថិតនៅក្រោមអំណាចនៃគណបក្សប្រជាជនកម្ពុជា និងការក្ដោបក្ដាប់ទាំងស្រុងទៅលើស្ថាប័ននីតិប្បញ្ញត្តិ ហើយស្ថិតក្នុងស្ថានភាពបែបនេះបក្សប្រជាជនអាចបើកផ្លូវឱ្យមានការកែប្រែរដ្ឋធម្មនុញ្ញ ដែលអាចនាំឱ្យមានវត្តមានកងទ័ពចិននៅក្នុងប្រទេសបាន។
ទោះជាយ៉ាងណា ក្រសួងការពារជាតិកម្ពុជាបានចេញមុខច្រានចោល និងបានហៅរបាយការណ៍នេះថា ជាចេតនាអាក្រក់មួយក្នុងការជ្រៀតជ្រែកលើកិច្ចការផ្ទៃក្នុងប្រទេសកម្ពុជា និងការលាបពណ៌លើភាពឯករាជ្យ អព្យាក្រឹត្យអចិន្ត្រៃយ៍របស់កម្ពុជា៕
