សហរដ្ឋអាមេរិក បានបង្ហាញក្តីបារម្ភករណីដែលចិនជ្រៀតជ្រែកលើការរុករករ៉ែនៅក្នុងសមុទ្រចិនខាងត្បូង ជាពិសេសយាយីសកម្មភាពរបស់វៀតណាមនៅក្នុងដែនសមុទ្រនេះ។
ការបង្ហាញក្តីព្រួយបារម្ភរបស់សហរដ្ឋអាមេរិក ធ្វើឡើងស្របពេលដែលមានសេចក្តីរាយការណ៍ថា ទាហានជើងទឹកចិន និងវៀតណាមកំពុងប្រឈមដាក់គ្នានៅសមុទ្រចិនខាងត្បូងក្នុងតំបន់សម្បូរដោយធនធានប្រេងកាត និងឧស្ម័នធម្មជាតិ ដែលក្រុមហ៊ុនបរទេសមួយចំនួនទទួលបានអាជ្ញាបណ្ណពីវៀតណាម កំពុងធ្វើអាជីវកម្មនៅទីនោះ។
អ្នកនាំពាក្យក្រសួងការបរទេសអាមេរិក លោកស្រី Morgan Ortagus បានលើកឡើងថាសហរដ្ឋអាមេរិកមានការព្រួយបារម្ភជុំវិញរបាយការណ៍នៃការជ្រៀតជ្រែករបស់ចិនលើសកម្មភាពរុករករ៉ែប្រេងកាត និងឧស្ម័នធម្មជាតិនៅសមុទ្រចិនខាងត្បូង ដែលក្នុងនោះក៏មានការយាយីលើសកម្មភាពរបស់វៀតណាមដែលបានធ្វើអាជីវកម្មនៅក្នុងតំបន់នោះតាំងពីយូរយារណាស់មកហើយ។ លោកស្រី បន្តថា សកម្មភាពលូកលាន់ម្តងហើយម្តងទៀតរបស់ចិនលើតំបន់រ៉ែប្រេងកាត និងឧស្ម័នធម្មជាតិរបស់រដ្ឋដទៃ ជាការគំរាមកំហែងដល់សន្តិសុខថាមពលក្នុងតំបន់ ក៏ដូចជា បំផ្លាញដល់ទីផ្សារថាមពលក្នុងតំបន់ឥណ្ឌូ-ប៉ាស៊ីហ្វិកផងដែរ។
សហរដ្ឋអាមេរិក ថាការរាំងខ្ទប់មិនឲ្យមានការអភិវឌ្ឍក្នុងសមុទ្រចិនខាងត្បូងដោយការប្រើប្រាស់កម្លាំងពីសំណាក់ភាគីចិន បានកំពុងរារាំងប្រទេសជាសមាជិកអាស៊ានក្នុងការទាញយកថាមពលដែលមានតម្លៃរហូតដល់ ២,៥ ទ្រីលានដុល្លារ។
សហរដ្ឋអាមេរិកតាមរយៈអ្នកនាំពាក្យក្រសួងការបរទេសរបស់ខ្លួនដដែល បានលើកឡើងផងដែថា សកម្មភាពគំរាមកំហែង បំភិតបំភ័យរបស់យោធាចិនក្នុងសមុទ្រចិនខាងត្បូង ក៏បំផ្លាញសន្តិភាព និងសន្តិសុខក្នុងតំបន់ផងដែរ។
ប្រទេសមហាអំណាចមួយនេះ ក៏បានអំពាវនាវផងដែរឲ្យរដ្ឋាភិបាលក្រុងប៉េកាំងបញ្ឈប់ជាបន្ទាន់នូវទង្វើដែលបង្កឲ្យមានអស្ថិរភាពក្នុងតំបន់។
អគ្គលេខាធិការក្រុមប្រឹក្សាសិក្សាគោលនយោបាយចិន លោក Andrew Yang បានប្រាប់វិទ្យុសម្លេងសហរដ្ឋអាមេរិក ថា ចិន និងវៀតណាមនឹងស្វែងរកដំណោះស្រាយមួយដែលភាគីទាំងពីរអាចទទួលយកបាន ព្រោះថា ប្រទេសទាំងពីរនេះមានបញ្ហាជាមួយគ្នាជាយូរមកហើយ។ លោកបន្តថា ប្រទេសទាំងពីរនេះ នឹងមិនបង្កើតបញ្ហានឹងគ្នាថែមទៀតនោះទេ។
កាលពីចុងខែឧសភា ក្រុមសមាជិកព្រឹទ្ធសភាអាមេរិក បានស្នើច្បាប់ដាក់ទណ្ឌកម្មអ្នកដែលពាក់ព័ន្ធជាមួយប្រទេសចិន ក្នុងករណីរំលោភអធិបតេយ្យតំបន់កំពុងមានជម្លោះក្នុងសមុទ្រចិនខាងត្បូង និងខាងកើត។ ច្បាប់នេះនឹងដាក់ទណ្ឌកម្មប្រឆាំងបុគ្គល ឬក្រុមហ៊ុនណាដែលចូលរួមជាមួយរដ្ឋាភិបាលក្រុងប៉េកាំងក្នុងសកម្មភាពខុសច្បាប់នានា។ សកម្មភាពខុសច្បាប់ទាំងនោះរួមមាន ការរំលោភយកដែនកោះ ការបង្កើតកោះសិប្បនិម្មិត និងការកសាងហេដ្ឋារចនាសម្ព័ន្ធទូរគមនាគមន៍ចល័តក្នុងតំបន់ដែលកំពុងមានជម្លោះ ជាដើម។ ប្រសិនបើច្បាប់នេះចូលជាធរមាន រដ្ឋាភិបាលអាមេរិកនឹងដកហូតទ្រព្យសម្បត្តិរបស់បុគ្គល ឬក្រុមហ៊ុនចិនទាំងនោះ ឬបដិសេធការចេញទិដ្ឋាការឲ្យពួកគេចូលទឹកដីអាមេរិក។
ក្រសួងការបរទេសចិន កាលពីសប្តាហ៍មុន បានអំពាវនាវដល់ភាគីវៀតណាមត្រូវគោរពសិទិ្ធនៃអធិបតេយ្យភាព និងយុត្តាធិការរបស់ចិនលើដែនសមុទ្រចិនខាងត្បូង។ ចិន ក៏បានស្នើឲ្យវៀតណាមកុំធ្វើសកម្មភាពណាមួយដែលអាចបង្កឲ្យកាន់តែស្មុគស្មាញថែមទៀត។
ភាគីវៀតណាមកាលពីថ្ងៃទី១៦ ខែកក្កដា ក៏បានចេញសេចក្តីថ្លែងការណ៍មួយផងដែរទាក់ទងនឹងស្ថានការណ៍នៅសមុទ្រចិនខាងត្បូង។ អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang បានអះអាងថា ភាគីវៀតណាមបានលើកឡើងជាច្រើនលើកច្រើនសារមកហើយពីសិទិ្ធនៃអធិបតេយ្យភាព និងយុត្តាធិការរបស់ខ្លួនលើដែនទឹកក្នុងសមុទ្រចិនខាងត្បូង ដោយយោងទៅតាមអនុសញ្ញាអង្គការសហប្រជាជាតិឆ្នាំ១៩៨២ ពាក់ព័ន្ធនឹងច្បាប់សមុទ្រអន្តរជាតិ។
អ្នកនាំពាក្យក្រសួងការបរទេសវៀតណាមរូបនេះ បានបញ្ជាក់ផងដែរថា សកម្មភាពណាមួយដោយភាគីបរទេសក្នុងដែនទឹករបស់វៀតណាមដោយគ្មានការអនុញ្ញាត ជាការឈ្លានពានអធិបតេយ្យភាពវៀតណាម និងជាការរំលោភច្បាប់អន្តរជាតិ៕