ក្រុមមន្ត្រីសង្គមស៊ីវិលដែលជំរុញការបំបៅកូនដោយទឹកដោះម្ដាយ បានទាមទារទៅរដ្ឋាភិបាលឲ្យចាត់វិធានការទៅលើក្រុមហ៊ុនដែលត្រូវបានរកឃើញថា បានរំលោភទៅលើសេចក្ដីណែនាំអំពីការចែកចាយផលិតផលម្សៅទឹកដោះគោ ខណៈដែលពួកគេលើកឡើងថា ការបំបៅទារកដោយទឹកដោះម្ដាយធ្លាក់ចុះក្នុងរយៈពេលប៉ុន្មានឆ្នាំចុងក្រោយនេះ។
ក្រុមមន្ត្រីសង្គមស៊ីវិលទាំងនោះ បានទាមទារបែបនេះនៅក្នុងសិក្ខាសាលាមួយជាមួយក្រុមអ្នកសារព័ត៌មានកម្ពុជា ដែលត្រូវបានរៀបចំឡើងនៅរាជធានីភ្នំពេញនៅថ្ងៃនេះ។
នាយករងអង្គការ Helen Keller International លោក ហ៊ូ ក្រើន បានឲ្យដឹងថា ការបំបៅកូនដោយទឹកដោះម្ដាយ បានធ្លាក់ចុះពីចំនួន ៧៣.៥ភាគរយ នៅឆ្នាំ២០១០ មកដល់ចំនួន ៦៤.៦ភាគរយ នៅឆ្នាំ២០១៤កន្លងមក។ លោកបន្ថែមថា ផ្ទុយទៅវិញ តួលេខនៃការបំបៅទារកដោយដបទឹកដោះគោ បានកើនឡើងឆាប់រហ័សពីចំនួន ១១.៨ភាគរយ នៅឆ្នាំ២០០៥ ដល់ចំនួន ២៤.៧ភាគរយ នៅឆ្នាំ២០១០ ហើយកើនឡើងដល់ចំនួនជាង ៣០ភាគរយ នៅឆ្នាំ២០១៤កន្លងមក។
មន្ត្រីសង្គមស៊ីវិលរូបនេះ ឲ្យដឹងទៀតថា ការបំបៅទារកដោយម្សៅទឹកដោះគោ បានបង្កឲ្យទារកប្រឈមមុខនឹងជំងឺរាគរូស ហើយស្ត្រីជាម្ដាយប្រឈមមុខនឹងជំងឺទឹកនោមផ្អែម ដែលនាំឲ្យកម្ពុជាខាតបង់ប្រាក់ដល់ទៅជាង ១លានដុល្លារក្នុងមួយឆ្នាំចំណាយទៅលើការព្យាបាលទាំងម្ដាយ និងទារក។
បើតាមលោក ហ៊ូ ក្រើន គ្រួសារពលរដ្ឋកម្ពុជា ក៏ខាតបង់ប្រាក់ដល់ទៅជាង ១០០លានដុល្លារក្នុងមួយឆ្នាំ សម្រាប់ចំណាយទៅលើផលិតផលម្សៅទឹកដោះគោផងដែរ។
លោក ហ៊ូ ក្រើន បានឲ្យដឹងទៀតថា កុមារដែលពុំទទួលបានការបំបៅដោយទឹកដោះម្ដាយឲ្យបានគ្រប់គ្រាន់ ប្រឈមមុខនឹងកម្រិតលូតលាស់ខាងបញ្ញាស្មារតី និងរាងកាយ និងងាយប្រឈមមុខនឹងជំងឺនានា ដែលធ្វើឲ្យកម្ពុជាប្រឈមមុខនឹងការខាតបង់ប្រាក់សម្រាប់ព្យាបាលដល់ទៅជាង ៣២៦លានដុល្លារក្នុងមួយឆ្នាំៗ។
លោក ហ៊ូ ក្រើន បានមានប្រសាសន៍៖ «បញ្ហាមួយដែលធ្វើឲ្យប៉ះពាល់ដល់ការបំបៅកូនដោយទឹកដោះម្ដាយនេះ ដោយសារការឃោសនាផ្សព្វផ្សាយម្សៅទឹកដោះគោពីសំណាក់ក្រុមហ៊ុន ក៏ដូចជាអ្នកចែកចាយផលិតផលទឹកដោះគោ ដែលជាផលិតផលជំនួសទឹកដោះម្ដាយនេះ។ ដោយសារការផ្សព្វផ្សាយហ្នឹង វាបំប៉ោងខ្លាំងពេក ធ្វើឲ្យសហគមន៍ ឬម្ដាយៗហ្នឹងគិតថា ទឹកដោះគោហ្នឹងមានគុណភាព គុណតម្លៃ ហើយនិងសារធាតុចិញ្ចឹមហ្នឹង ល្អជាងទឹកដោះម្ដាយ»។
ការផ្សព្វផ្សាយផលិតផលម្សៅទឹកដោះគោ ត្រូវបានរដ្ឋាភិបាលហាមឃាត់ ហើយការចែកចាយផលិតផលបែបនេះ ត្រូវបានកំណត់ឲ្យភ្ជាប់ជាមួយសារ «គ្មានអ្វីប្រសើរជាងទឹកដោះម្ដាយ» និងសារព្រមានដទៃទៀតនៅលើសំបកវេចខ្ចប់នៃផលិតផលរបស់ពួកគេ។ នេះបើតាមអនុក្រឹត្យលេខ ១៣៣ ស្ដីពីការផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារ ចេញរដ្ឋាភិបាលកាលពីឆ្នាំ២០០៥។
មន្ត្រីជាន់ខ្ពស់គោលនយោបាយ នៃអង្គការទស្សនៈពិភពលោក អ្នកស្រី សាំង រ៉ាន្នី បានលើកឡើងនៅឯសិក្ខាសាលានោះដែរថា អង្គការមួយនេះ បានរកឃើញផលិតផលម្សៅទឹកដោះជាច្រើនប្រភេទ ត្រូវបានចែកចាយ និងលក់បន្តនៅទូទាំងប្រទេសកម្ពុជាដោយមិនបានអនុវត្តតាមបទប្បញ្ញត្តិនេះនោះឡើយ។
អ្នកស្រី សាំង រ៉ាន្នី បានលើកឡើងបន្ថែមទៀតថា ក្រុមអ្នកតស៊ូមតិពីក្រុមអង្គការសង្គមស៊ីវិល បានទាមទារទៅរដ្ឋាភិបាលឲ្យបញ្ចេញឈ្មោះក្រុមហ៊ុនដែលបានរំលោភលើសេចក្ដីណែនាំនេះ ប៉ុន្តែ អ្នកស្រីថា រដ្ឋាភិបាលពុំបង្ហាញឲ្យសាធារណជនដឹងនោះឡើយ។
អ្នកស្រី រ៉ាន្នី ជំរុញទៅរដ្ឋាភិបាលឲ្យបង្កើនចំនួនទឹកប្រាក់ផាកពិន័យទៅលើក្រុមហ៊ុននាំចូល និងចែកចាយផលិតផលម្សៅទឹកដោះនៅកម្ពុជា ដោយអ្នកស្រីចាត់ទុកប្រាក់ផាកពិន័យត្រឹមតែ ២លានរៀល ជាចំនួនតិចតួចមិនអាចឲ្យក្រុមហ៊ុនរាងចាលនោះឡើយ។
អ្នកស្រី សាំង រ៉ានី មានប្រសាសន៍ថា៖ «ប៉ុន្តែ យើងសំណូមពរទៅដល់ខាងក្រសួង ប្រសិនបើអាច សូមឲ្យបញ្ចេញឈ្មោះក្រុមហ៊ុន អ្នកដែលប្រព្រឹត្តខុសទៅនឹងអនុក្រឹត្យលេខ ១៣៣ហ្នឹងណ៎ា។ ដោយសារយើងឃើញថា ចំនួនទឹកលុយ [ផាកពិន័យ] វាតិច ប៉ុន្តែ អ្វីដែលយើងចង់ឲ្យគាត់បញ្ចេញ គឺទាក់ទងនឹងឈ្មោះបង្ហាញថា គាត់ពិតជាបានប្រព្រឹត្តខុស ហើយវាអាចនឹងប៉ះពាល់ទៅដល់កេរ្តិ៍ឈ្មោះរបស់គាត់ និយាយទៅកេរ្តិ៍ឈ្មោះរបស់គាត់វាសំខាន់ជាងចំនួនទឹកប្រាក់ហ្នឹង»។
អ្នកនាំពាក្យក្រសួងសុខាភិបាល លោក លី សូវ៉ាន់ បានព្រមានចាត់វិធានការបន្ថែមទៀតទៅលើក្រុមហ៊ុននាំចូល និងចែកចាយលក់ផលិតផលម្សៅទឹកដោះ ប្រសិនបើក្រុមហ៊ុនទាំងនោះ ពុំនៅតែបន្តប្រព្រឹត្តល្មើសទៅនឹងសេចក្ដីណែនាំនៅក្នុងអនុក្រឹត្យនេះ។
លោក លី សូវ៉ាន់ មានប្រសាសន៍ថា៖ «ហេតុដូច្នេះ ក្រុមមន្ត្រីអធិការកិច្ចបានធ្វើការផាកពិន័យក្រុមហ៊ុនដែលមិនបានអនុវត្ត ដោយ[ពិន័យ] ២លាន ៥សែនរៀល ហើយក្រុមហ៊ុនឯកជនទាំងនោះ បានធ្វើកិច្ចព្រមព្រៀងថា គាត់នឹងបញ្ឈប់ប្រព្រឹត្តនូវការខុសឆ្គងនេះតទៅទៀតហើយ។ តែទោះបីជាយ៉ាងណាក៏ដោយ ក្រសួងនឹងធ្វើការតាមដានទៀត ប្រសិនបើករណីគាត់មិនរាងចាលទេ យើងនឹងចាត់វិធានការបន្ថែមទៀត ក្នុងនោះមានការផាកពិន័យ និងការងារដែលត្រូវបញ្ចេញឈ្មោះក្រុមហ៊ុនគាត់បន្ថែមទៀត»។
របាយការណ៍ស្រាវជ្រាវរួមមួយដែលត្រូវបានធ្វើឡើងរួមគ្នាដោយអង្គការទស្សនៈពិភពលោក និងអង្គការ Helen Keller អន្តរជាតិ កាលពីឆ្នាំ២០១៨កន្លងមក បានរកឃើញថា ៩៨ភាគរយនៃផលិតផលម្សៅទឹកដោះគោ បានរំលោភលើសេចក្ដីណែនាំរបស់រដ្ឋាភិបាលកម្ពុជា ដូចជា ពុំមានសារជាភាសាខ្មែរពេញលេញ ពុំមានសារលើកកម្ពស់គុណតម្លៃទឹកដោះម្ដាយ និងពុំមានសារព្រមានពីគ្រោះថ្នាក់នៃដបបំបៅទឹកដោះគោនោះឡើយ។
របាយការណ៍អង្គការសុខភាពពិភពលោកកាលពីឆ្នាំមុន បានរកឃើញថា ការបំបៅទារកដោយទឹកដោះគោ បានធ្វើឲ្យខាតបង់ថវិកាដល់ទៅ ៣៤១ពាន់លានដុល្លារនៅទូទាំងពិភពលោកក្នុងមួយឆ្នាំៗ។
អង្គការសុខភាពពិភពលោក បានឲ្យដឹងទៀតថា ការបំបៅទារកដោយទឹកដោះម្ដាយ អាចជួយសង្គ្រោះជីវិតមនុស្សជាង ៨២ម៉ឺននាក់ និងជួយសង្គ្រោះស្ត្រីដល់ទៅ ២ម៉ឺននាក់ពីជំងឺមហារីកសុដន់ក្នុងមួយឆ្នាំៗ។
អង្គការមួយនេះ បានលើកឡើងទៀតថា ការបំបៅទារកដោយទឹកដោះម្ដាយ ក៏ជួយដល់ដំណើរលូតលាស់រាងកាយ និងបញ្ញារបស់កុមារ ហើយវាពាក់ព័ន្ធយ៉ាងខ្ពស់ទៅនឹងលទ្ធផលសិក្សា និងសមត្ថភាពរបស់ក្មេងនាពេលអនាគតផងដែរ៕