តុលាការខេត្តមណ្ឌលគិរី បានសម្រេចឃុំខ្លួនមន្ត្រីរដ្ឋបាលព្រៃឈើ ២នាក់ក្នុងពន្ធនាគារ និងដោះលែងមន្ត្រីបរិស្ថានម្នាក់ឱ្យនៅក្រៅឃុំបណ្ដោះអាសន្ន ក្នុងសំណុំរឿងទាក់ទងនឹងបទល្មើសព្រៃឈើ។ នេះបើតាមឱ្យដឹងរបស់ប្រធានរដ្ឋបាលតុលាការខេត្តមណ្ឌលគិរី ដែលបញ្ជាក់ប្រាប់វីអូឌីតាមទូរសព្ទនៅព្រឹកថ្ងៃព្រហស្បត្តិ៍នេះ។
នាយរងខណ្ឌរដ្ឋបាលព្រៃឈើខេត្តមណ្ឌលគិរី លោក សារ៉ូ រតនា នាយកសង្កាត់រដ្ឋបាលព្រៃឈើរយ៉ ស្ថិតក្នុងស្រុកលំផាត់ លោក ហ៊ុន វណ្ណេ និងនាយកដែនជម្រកសត្វព្រៃភ្នំព្រេចលំផាត់ លោក ហាន សុខន ត្រូវបានសមត្ថកិច្ចចាប់ខ្លួនកាលពីចុងសប្ដាហ៍កន្លងមកនេះ។
អ្នកនាំពាក្យសាលាដំបូងខេត្តមណ្ឌលគិរី លោក ម៉េត ប្រុស បានឲ្យដឹងថា ផ្អែកតាមចម្លើយរបស់ជនសង្ស័យ និងភស្តុតាងដែលប្រមូលបាន តុលាការខេត្តមណ្ឌលគិរី រកឃើញថា មន្ត្រីរាជការទាំង ៣នាក់នេះ សុទ្ធតែជាប់ពាក់ព័ន្ធនឹងបទល្មើសព្រៃឈើដូចគ្នា។
បើតាមអ្នកនាំពាក្យរូបនេះ មន្ត្រីរដ្ឋបាលព្រៃឈើទាំង ២រូប ត្រូវបានចោទប្រកាន់ពីបទផ្ដល់ការអនុញ្ញាតណាមួយដែលផ្ទុយពីបទប្បញ្ញត្តិស្ដីពីព្រៃឈើ ខណៈដែលមន្ត្រីបរិស្ថាន លោក ហាន សុខន ត្រូវបានតុលាការចោទពីបទផ្សំគំនិតក្នុងការប្រមូលផលព្រៃឈើខុសច្បាប់ ប៉ុន្តែ ត្រូវបានដោះលែងឲ្យស្ថិតនៅក្រៅឃុំក្រោមការត្រួតពិនិត្យពីតុលាការ។
លោក ម៉េត ប្រុស ប្រាប់ថា៖ «រឿងហ្នឹងច្រើនណាស់ ខ្ញុំអត់ដឹងថាប៉ុន្មានទេបង។ ព្រោះដីការកោះគេអត់បានបញ្ជូនតាមខ្ញុំទេ គេយកទៅដាក់នៅស្នងការ»។
លោក ម៉េត ប្រុស បានឲ្យដឹងទៀតថា តុលាការខេត្តមណ្ឌលគិរី បានចេញដីកាកោះជាច្រើនទៀតទៅកាន់មន្ត្រីពាក់ព័ន្ធបទល្មើសប៉ុន្តែ លោកបដិសេធបញ្ចេញឈ្មោះមន្ត្រីពាក់ព័ន្ធទាំងនោះ។
បើតាមច្បាប់ព្រៃឈើមាត្រា ១០០ មន្ត្រីរាជការទាំងបីរូបនេះ ប្រឈមការជាប់ពន្ធនាគារពី ១ឆ្នាំដល់ ៥ឆ្នាំ និងពិន័យជាប្រាក់ពី ១០លានរៀលទៅ ១០០លានរៀល បើសិនជាតុលាការរកឃើញថា មានទោសប្រាកដមែន។
ក្នុងពេលប្រតិបត្តិការទ្រង់ទ្រាយធំចាប់ពីថ្ងៃទី៩ ដល់ថ្ងៃទី ៣១ ខែកក្កដាកន្លងមកនេះ មនុស្ស ៩នាក់ហើយ ត្រូវបានតុលាការខេត្តមណ្ឌលគិរីចោទប្រកាន់ និងដាក់ពន្ធនាគារ ក្នុងនោះមានជនជាតិចិន ៣នាក់។
ទន្ទឹមនឹងនេះ អ្នកនាំពាក្យគណៈកម្មាធិការជាតិបង្ក្រាបបទល្មើសធនធានធម្មជាតិ លោក អេង ហ៊ី មានប្រសាសន៍ថា អង្គភាពជំនាញកំពុងស៊ើបអង្កេតករណីក្រុមហ៊ុនចំនួន ៥ ដែលជាប់ពាក់ព័ន្ធនឹងបទល្មើសព្រៃឈើ ប៉ុន្តែ លោកមិនទាន់អាចបង្ហាញលទ្ធផលស៊ើបអង្កេតនេះបាននៅឡើយទេ។
លោក អេង ហ៊ី ប្រាប់ថា៖ «យើងកំពុងបន្តស្រាវជ្រាវ យើងមិនទាន់បូកសរុបរបាយការណ៍នៅឡើយទេ»។
ទាក់ទងនឹងបញ្ហានេះ ប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក សៅ សុខា កាលពីថ្ងៃទី១៨ កក្កដា ព្រមានចាត់វិធានាការលើគ្រប់បុគ្គល ដែលអាងខ្សែរយៈ ដើម្បីប្រព្រឹត្តិបទល្មើសព្រៃឈើ ឬគ្រប់មន្ត្រីអាវុធហត្ថ ឬមន្ត្រីរដ្ឋាភិបាលណា ដែលផ្សំគំនិតបង្កើតឱ្យមានការបំផ្លាញព្រៃឈើ។ លោក សៅ សុខា ថែមទាំងប្រកាសថា សុខចិត្តដាច់ក្បាលក៏ដោយ ក៏ត្រូវតែប្រយុទ្ធនឹងឧក្រិដ្ឋកម្មព្រៃឈើឱ្យបានជាដាច់ខាត។
ទោះជាបែបណាក្ដី មន្ត្រីកម្មវិធីពង្រឹងសិទ្ធិអំណាចមូលដ្ឋាននៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ មានប្រសាសន៍ថា ស្ថានភាពជំនួញឈើ បានស្ងប់ស្ងាត់នៅពេលដែលមានយុទ្ធនាការបង្ក្រាបទ្រង់ទ្រាយធំៗម្ដងៗ តែក្រុមឈ្មួញឈើគ្រាន់តែសម្ងំមួយរយៈប៉ុណ្ណោះ។លោកបន្តថា គណៈកម្មការពិសេសមួយនេះ ត្រូវតែស្រាវជ្រាវរកអ្នកពាក់ព័ន្ធនឹងបទល្មើសមកផ្តន្ទាទោសឱ្យបាន ដើមរក្សាព្រៃឈើដែលនៅសេសសល់ឱ្យបានគង់វង្ស។ អាជ្ញាធរខេត្តសាម៉ីវិញ ត្រូវតែជាអ្នកទទួលខុសត្រូវធំ ក្នុងមុខនាទីរបស់ខ្លួនជុំវិញដឹកនាំបង្ក្រាបឧក្រិដ្ឋកម្មព្រៃឈើ។
លោក ប៉ែន ប៊ុណ្ណារ៍ ប្រាប់ថា៖ «យើងគិតថា មិនចាំបាច់គណៈកម្មការជាតិយូរៗម្ដងចុះទៅធ្វើទេ។ យើងមានគណៈអភិបាលខេត្តដែលជាសមាជិកគណៈកម្មការជាតិចុះទៅធ្វើក៏បានដែរ គាត់មានមន្ត្រីនគរបាលយុត្តិធម៌អាចប្រើចុះធ្វើបាន។ អាហ្នឹងហើយបានបង្កើតការ សង្ស័យថាជំនួញឈើ ឬបទល្មើសព្រៃឈើប្រព្រឹត្តិទៅបានដោយសារអំពើពុករលួយជាប្រព័ន្ធ»។
របាយការណ៍របស់ក្រុមបង្ក្រាបបទល្មើសព្រៃឈើរបស់រដ្ឋាភិបាល បង្ហាញថា ក្នុងប្រតិបត្តិការបង្ក្រាបបទល្មើសព្រៃឈើទ្រង់ទ្រាយធំទូទាំងប្រទេសតាំងពីឆ្នាំ២០១៦ រហូតមកដល់ពេលនេះ មនុស្ស ៣៣នាក់ត្រូវបានចាប់ខ្លួន ហើយយានយន្តជាមធ្យោបាយដឹកជញ្ជូនព្រៃឈើជាង ១៥០គ្រឿង ត្រូវបានកម្ទេចចោល៕