ចលនាតវ៉ានៅហុងកុងចាប់ផ្តើមខ្លាំងក្លាពីមួយថ្ងៃទៅមួយថ្ងៃ បើទោះជាមានការបង្ក្រាប និងចាប់ខ្លួនជាបន្តបន្ទាប់ក៏ដោយ ដែលធ្វើឱ្យរាំងស្ទះដល់វិស័យការងារជាច្រើននៅដែនដីជាមជ្ឈ មណ្ឌលពាណិជ្ជកម្មរបស់ពិភពលោកមួយនេះ។
ចាប់តាំងពីដើមខែមិថុនាមក ការតវ៉ានៅដែនដីហុងកុងកើតឡើងជាបន្តបន្ទាប់ ទាំងថ្ងៃទាំងយប់ ស្ទើរគ្រប់កន្លែងក្នុងដែនដីនេះទាំងកន្លែងសាធារណៈ និងកន្លែងឯកជន។
ចលនានៅហុងកុងនេះមិនមែនជាចលនាដែលកើតដោយហិង្សាពីមនុស្សមួយក្រុមតូចឬ ក្រុមជ្រុលនិយមនោះទេគឺចលនាហាក់កើតឡើងព្រមៗគ្នាពីក្រុមមនុស្សគ្រប់ស្រទាប់។ ក្រុមអ្នកតវ៉ាមាន ក្រុមមេធាវី ក្រុមនិស្សិត អ្នកជំនួញធំៗ អ្នកនយោបាយ ស្រ្តីជាម្តាយតវ៉ាគាំទ្រសកម្មភាពកូនៗ និង ចុងក្រោយនេះកាលពីចុងសប្តាហ៍មុនក៏មានមន្ត្រីរាជការតាមស្ថានប័នរដ្ឋចូលរួមបាតុកម្មដែរ។
ដើមហេតុដំបូងគ្រាន់តែតវ៉ាទាមទារឱ្យលុបចោលសេចក្តីព្រាងច្បាប់ស្តីពីការធ្វើបត្យាប័ន ប៉ុន្តែដោយសារមេដឹកនាំដែនដីនេះលោកស្រី ការី ឡាម ថ្លែងការពារច្បាប់នោះ ទើបធ្វើឱ្យគោលបំណងបន្ទាប់នៃការតវ៉ារបស់ពួកគេគឺទាមទារឱ្យលោកស្រី ឡាម ចុះចេញពីតំណែង។
បាតុករចោទថា លោកស្រីការី ឡាម ជាមេដឹកនាំដែលតែងតាំងដោយចិនប៉េកាំង កំពុងបម្រើការងារឱ្យផលប្រយោជន៍ចិន ហើយធ្វើសេរីភាពពួកគេកាន់តែរួមតួច មិនដូចកិច្ចព្រមព្រៀងធ្វើឡើងរវារដ្ឋអំណាចចិននិងអង់គ្លេសកាលពីឆ្នាំ១៩៩៧ ស្តីពីប្រទេសមួយប្រព័ន្ធដឹកនាំពីរនោះទេ។
ច្បាប់ធ្វើបត្យាប័ននោះពលរដ្ឋហុងកុងមិនទទួលយកដោយសារពួកគេមិនទុកចិត្តប្រព័ន្ធយុត្តិធម៌ស្ថិតនៅក្រោមអំណាចទីក្រុងប៉េកាំងនោះទេ។
ក្នុងអំឡុងពេលនៃការតវ៉ានេះ បានធ្វើឱ្យប៉ះពាល់ច្រើនដល់ដំណើរការ ការងារនៅទីនោះដូចជា ការបិទផ្លូវ ការឡោមព័ទ្ធអគារនានារបស់រដ្ឋរួមទាំងសភា និងអគ្គស្នងការដ្ឋាននគរបាលជាដើម។
កាលពីថ្ងៃចន្ទម្សិលមិញ ផ្លូវលើដីចំនួន១៥កន្លែង និងផ្លូវក្រោមដីចំនួន៣ត្រូវបិទ ផ្លូវរថភ្លើងចំនួន៨កន្លែងរងឥទ្ធិពល ចំណែកជើងហោះហើរចំនួនជាង២០០ត្រូវផ្អាកទាំងស្រុង។ គិតត្រឹមថ្ងៃចន្ទម្សិលមិញបាតុករជាង២៤០នាក់ ត្រូវបានចាប់ខ្លួន។
តើវាជាកំហុងឆ្គងដែរឬទេ ដែលពលរដ្ឋហុងកុងកំពុងតែធ្វើសកម្មភាពពេលនេះ?
មើលទៅក្រុមអ្នកតវ៉ាប្រហែលមិនស្តាយក្រោយ ឬ គិតថាជាកំហុសទេ ដោយពួកគេគិតថា ជាជាការលះបង់ដើម្បីជាតិ ដើម្បីមនុស្សជំនាន់ក្រោយទៅវិញ។
ស្ត្រីតំណាងក្រុមហ៊ុនម្នាក់ថ្លែងកាលពីខែមិថុនាថា « នៅពេលអ្នកខ្លះនិយាយថា ការតវ៉ាមិនមានប្រយោជន៍ រដ្ឋាភិបាលមិនស្តាប់យើងទេ។ ខ្ញុំមានអារម្មណ៍ថា បើយើងមិនធ្វើអ្វីទាំងអស់នៅពេលនេះ យើងនឹងជួបរឿងសោកសង្រេងនៅថ្ងៃអនាគត។ បើមិនធ្វើនៅពេលនេះ តើពេលណាទើបធ្វើ?» ស្ត្រីម្ចាស់ក្រុមហ៊ុនម្នាក់និយាយក្នុងលក្ខខណ្ឌមិនបង្ហាញអត្តសញ្ញាណ។
ក្រោយពេលមានបាតុកម្មទ្រង់ទ្រាយធំដែលមានអ្នកចូលរួមជាង២លាននាក់កាលពីខែកក្កដា ក្រុមស្ត្រីជាម្តាយរាប់ពាន់នាក់ចេញមុខប្រមូលផ្តុំគ្នាបញ្ជាក់ជំហរគាំទ្រកូនៗរបស់ពួកគេថា ជាទង្វើត្រឹមត្រូវ។
ក្តីកង្វល់របស់ពលរដ្ឋហុងកុង លើសពីប្រព័ន្ធយុត្តិធម៌ និងសិទ្ធិសេរីភាពរួមតួចនៅពេលនេះគឺចិនប្រើរបបកុម្មុនីស្តគ្រប់គ្រងពួកគេ ហើយត្រូវផ្លាស់ប្តូរស្ទើរទាំងស្រុងពីអ្វីដែលពួកគាត់ធ្លាប់មាននៅពេលនេះ។
