ប្រជាពលរដ្ឋជាច្រើននាក់នៅខេត្តបន្ទាយមានជ័យ ស្នើសុំអន្តរាគមន៍ពីរាជរដ្ឋាភិបាលឱ្យចចារជាមួយភាគីថៃដើម្បីបានដោះលែងសាច់ញាតិរបស់ខ្លួនដែលកំពុងជាប់គុកនៅស្រុកថៃ។ សំណើរសុំជំនួយនេះ ធ្វើឡើងបន្ទាប់ពីអាជ្ញាធរថៃចាប់ខ្លួនពលរដ្ឋខ្មែរ ៨៥នាក់ដាក់ពន្ធនាគារតាំងពីខែមេសាមក។
ក្រុមប្រជាពលរដ្ឋទាំងនោះ កំពុងបារម្ភពីសុខភាពរបស់កូនចៅដែលកំពុងជាប់គុក និងដង្ហោយសុំជំនួយពីភាគីពាក់ព័ន្ធឱ្យដោះលែងកូនចៅគាត់។ ក្រុមប្រជាពលរដ្ឋទាំងនោះបានដាក់ពាក្យស្នើសុំជំនួយពីអង្គការសង្គមស៊ីវិលនៅខេត្តបន្ទាយមានជ័យ ដើម្បីលើកសំណើបន្តទៅកាន់មន្ត្រីរាជរដ្ឋាភិបាល។
ប្រជាពលរដ្ឋរស់នៅភូមិឃ្ជាយ ឃុំតាគង់ស្រុកម៉ាឡៃ លោក គង់ សុផាត ប្រាប់ ថា កូនរបស់គាត់២នាក់ប្ដីប្រពន្ធកំពុងជាប់គុកនៅខេត្តស្រះកែវ ហើយអ្នកជិតខាង ២នាក់ទៀតក៏ជាប់គុកជាមួយគ្នាដែរ។
លោកបន្តថា ក្រុមគ្រួសាររបស់គាត់កំពុងបារម្ភចំពោះស្ថានភាពសុខភាពរបស់កូនៗជាខ្លាំង ខណៈដែលជីវភាពក៏កាន់តែយ៉ាប់យ៉ឺនទៀត។ លោកបញ្ជាក់ថា ពួកគាត់ត្រូវផ្ញើលុយឱ្យកូនចាយក្នុងគុក និងសងបំណុលជំនួសកូនផង។
លោក គង់ សុផាត៖ «កូនខ្ញុំពីរនាក់ប្ដីប្រពន្ធហ្នឹង ខ្ចីលុយមីក្រូហិរញ្ញវត្ថុបាន១ម៉ឺន(បាត) ទៅ ៥ពាន់(បាត)ធ្វើសោហ៊ុយតែទៅមិនទាន់ដល់ផងតម្រួតចាប់ខ្លូនបាត់ទៅ។បងប្អូនខ្ញុំសាច់ញាតិអ្នកជាប់គុកហ្នឹងថូ(ទូរស័ព្ទ)ទៅស្ថានទូតកាលជាប់គុកបាន ២ខែតែទូតអត់លើកសោះ។ ពាក្យសម្ដីដ៏ស្មោះត្រង់របស់ខ្ញុំ គឺសូមអំពាវនាវឱ្យស្ថានទូតជួយផង ព្រោះគ្នាទៅខ្ចីលុយមីក្រូហិរញ្ញវត្ថុទៅទេគ្នាសុទ្ធតែអ្នកក្រ»។
មន្ត្រីសមាគមការពារសិទ្ធិមនុស្សអាដហុកខេត្តបន្ទាយមានជ័យ អ្នកស្រី ប៊ិន សុភណ្ឌ ឱ្យដឹងថា អ្នកស្រីមិនទាន់ទទួលព័ត៌មានពីអាសយដ្ឋានច្បាស់លាស់របស់ពលរដ្ឋខ្មែរទាំង ៨៥នាក់នៅឡើយ។ ប៉ុន្តែ អាដហុកបានទទួលពាក្យសុំជំនួយពីសាច់ញាតិរបស់អ្នកជាប់គុកសរុប ២៦នាក់។ ក្នុងនោះ ស្រុកម៉ាឡៃ ៤នាក់ និងស្រុកថ្មពួក ៨នាក់ ស្រុកព្រះនេត្រព្រះ ១៤នាក់។ អ្នកស្រីបន្តថា អ្នកជាប់គុកនោះ ក៏មានអ្នកនៅខេត្តផ្សេងក្រៅពីបន្ទាយមានជ័យដែរ ហើយថែមទាំងមានកុមារទៀតផង ។
អ្នកស្រី ប៊ិន សុភណ្ឌ ប្រាប់ថា៖ «មាន១៣ឆ្នាំម្នាក់ ១៤ឆ្នាំ៣នាក់ និងកុមារអាយុ៥ឆ្នាំម្នាក់។ឪពុកម្ដាយគាត់ធ្វើការនៅថៃរួចហើយធ្វើការស្របច្បាប់ សាច់ញាតិនេះឡើងទៅធ្វើការក្រោយ ទើបគាត់ថាយកក្មេងទៅប្រគល់ឱ្យម៉ែឪគេតែមិនទាន់ដល់ផងគេចាប់។ ពួកគាត់រាយការណ៍មកថា គាត់ចេញតាមច្រកចម្ការគរ(ច្រករបៀងម្តុំប៉ោយប៉ែត) ក្នុងនោះក៏មានអ្នកមកពីខេត្តផ្សេងដែរ។ មេខ្យល់យកឡានហុកឡធំដឹកពួកគាត់»។
ហេតុការណ៍ចាប់ខ្លួនពលរដ្ឋទាំង៨៥នាក់ កើតឡើងតាំងពីថ្ងៃទី២៦ខែមេសា។ សាច់ញាតិរបស់ពលករមួយចំនួនរៀបរាប់ថា នៅថ្ងៃកើតហេតុ តម្រូតថៃបានចាប់រថយន្តដែលដឹកពលរដ្ឋខ្មែរចំនួន៩០នាក់ ក្នុងនោះមនុស្ស៥នាក់ដែលមានឯកសារស្របច្បាប់ត្រូវដោះលែង ហើយមនុស្ស ៨៥នាក់ ត្រូវចាប់យកទៅដាក់ឃុំអគ្គនាយកដ្ឋានត្រួតពិនិត្យពលករខុសច្បាប់នាទីក្រុងបាងកកឬហៅថាសួនភ្លូ។
អ្នកទាំង៨៥នាក់ជាប់គុកបាន២ខែក៏ត្រូវប៉ូលីសថ្ងៃបំបែកគ្នា ដោយយក៦៥នាក់មកដាក់គុកនៅអារញ្ញ ខេត្តស្រះកែវ និង២០នាក់ជាប់នៅសួនភ្លូដដែល។
អភិបាលរងខេត្តបន្ទាយមានជ័យ អ្នកស្រី ប៉ុក ម៉ាឌី មានប្រសាសន៍ថា អ្នកស្រីកំពុងប្រមូលព័ត៌មានពីរឿងនេះនៅឡើយ។
ទាក់ទងនឹងបញ្ហានេះ អ្នកនាំពាក្យក្រសួងការបរទេស លោក កេត សាផាន់ មានប្រសាសន៍ថា ស្ថានទូតខ្មែរប្រចាំនៅទីក្រុងបាងកកបានទាក់ទងទៅកាន់ភាគីថៃរួចហើយ ដើម្បីដោះស្រាយពីរឿងនេះ ប៉ុន្តែ នៅរង់ចាំចម្លើយនៅឡើយ។
កេត សាសាផាន់៖ «ខ្ញុំមិនទាន់ទទួលបានព័ត៌មានបន្ថែមទៀតទេបើមានចាំខ្ញុំជម្រាបជូន»។
ទោះជាបែបណាក្ដី អង្គភាពអ្នកនាំពាក្យក្រសួងការបរទេសកម្ពុជា បានប្រាប់អ្នកកាសែតក្នុងស្រុកថា ទូតកម្ពុជាប្រចាំប្រទេសថៃបានធ្វើលិខិតជាផ្លូវការស្នើឲ្យអាជ្ញាធរថៃដោះលែងពលរដ្ឋខ្មែរ ៨៥នាក់ កាលពីថ្ងៃទី៥ ខែសីហា។ ប៉ុន្តែ ប្រធានពន្ធនាគារសួនភ្លូ ប្រាប់ទូតខ្មែរនៅថៃថា ជាករណីសង្ស័យរឿងជួញដូរមនុស្ស។
មន្ត្រីជាន់ខ្ពស់ផ្នែកពលករចំណាកស្រុក នៃអង្គការសង់ត្រាល់ លោក ឌី ថេហូយ៉ា មានប្រសាសន៍ថា ពលករខ្មែរដែលចំណាកស្រុកមិនស្របច្បាប់ទៅប្រទេសថៃប្រឈមខ្លាំងនឹងការរំលោភបំពានសិទ្ធិការងារ ការកេងប្រវ័ញ្ចកម្លាំងពលកម្ម។ល។ លោកបញ្ជាក់ថា នៅពេលដែលអាជ្ញាធរថៃចាប់ខ្លួនពលករខ្មែរម្ដងៗ
ពលករទាំងនោះពិបាកស្វែងរកអន្តរាគមន៍ពីសំណាក់អាជ្ញាកម្ពុជាណាស់ ហើយយន្តការដោះស្រាយបញ្ហាទាំងនោះ នៅយឺតយ៉ាវមិនទាន់សភាពការណ៍ជាក់ស្តែងឡើយ។
របាយការណ៍របស់ក្រសួងការងារបញ្ជាក់ថា ពលករខ្មែរចំនួនជាង ១លាន ១សែននាក់ កំពុងធ្វើការនៅប្រទេសថៃ ក្នុងនោះក្រសួងមិនបានបង្ហាញពីតួលេខនៃអ្នកធ្វើការខុសច្បាប់នៅទីនោះឡើយ។ ប៉ុន្តែ អង្គការសង្គមស៊ីវិលរកឃើញពលករខ្មែរប្រមាណជិត ២លាននាក់៕