អតីតរដ្ឋលេខាធិការក្រសួងសង្គមកិច្ច លោក អះម៉ាត់ យ៉ះយ៉ា ត្រូវបញ្ជូនទៅឃុំខ្លួនក្នុងពន្ធនាគារព្រៃសថ្ងៃនេះ បន្ទាប់ពីតុលាការសម្រេចកាត់ទោសលោកដាក់ពន្ធនាគាររយៈពេល១៥ឆ្នាំក្នុងសំណុំរឿងជួញដូរមនុស្ស។
នេះបើតាមការបញ្ជាក់តាមរយៈប្រព័ន្ធតេឡេក្រាមរបស់អ្នកនាំពាក្យអយ្យការអមសាលាដំបូងរាជធានីភ្នំពេញលោក គុជ គឹមឡុង នៅថ្ងៃទី១៣ ខែសីហា។
អ្នកនាំពាក្យរូបនេះ ឲ្យដឹងថា លោក អះម៉ាត់ យ៉ះយ៉ា និងក្មួយប្រុសឈ្មោះ អ៊ីស្មាអែលពិន ឧស្មាន នៅថ្ងៃនេះ ត្រូវបានតុលាការចោទប្រកាន់ពីបទនាំចេញដោយមិនស្របច្បាប់សម្រាប់ការឆ្លងដែន តាមមាត្រា១១ នៃច្បាប់ស្តីពីការបង្ក្រាបអំពើជួញដូរមនុស្សនិងការធ្វើអាជីវកម្មផ្លូវភេទ ប្រព្រឹត្តនៅចំណុចរាជធានីភ្នំពេញ កាលពីឆ្នាំ២០០៤។ លោក បញ្ជាក់ថា សាលក្រមតុលាការផ្តន្ទាទោសពួកគាត់ដោយដាក់ពន្ធនាគាររយៈពេល១៥ឆ្នាំ ខណៈដែលលោកកំពុងស្ថិតនៅក្នុងសវនាការ តុលាការបានបញ្ជាឱ្យសមត្ថកិច្ចចាប់ខ្លួនលោកដាក់ពន្ធនាគារព្រៃសតែម្តង។
មាត្រា១១នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទបានចែងថា ជនណាដែលនាំយកជនដទៃចេញដោយមិនស្របច្បាប់ ក្នុងគោលដៅប្រគល់ ឬ នាំយកទៅក្រៅព្រះរាជាណាចក្រកម្ពុជា ត្រូវផ្ដន្ទាទោសដាក់ពន្ធនាគារពី ៧ (ប្រាំពីរ) ឆ្នាំដល់១៥ (ដប់ប្រាំ) ឆ្នាំ។ ច្បាប់នេះ ផ្ដន្ទាទោសឧក្រិដ្ឋជន ដាក់ពន្ធនាគារពី ១៥ (ដប់ប្រាំ) ឆ្នាំ ទៅ ២០ (ម្ភៃ)ឆ្នាំ ក្នុងករណីដែល ជនរងគ្រោះជាអនីតិជនឬអំពើល្មើសប្រព្រឹត្តឡើង ដោយមន្ត្រីសាធារណៈ ដែលបំពានដោយអំណាចរបស់ខ្លួនមកលើជនរងគ្រោះ ឬអំពើល្មើសប្រព្រឹត្តឡើង ដោយក្រុមមានការចាត់តាំង។
លោក អាម៉ាត់ យ៉ះយ៉ា ជាអតីតមន្ត្រីជាន់ខ្ពស់គណបក្សហ៊ុនស៊ិនប៉ិច ក្រោយមកចូលជាសមាជិកគណបក្សសមរង្ស៊ី និងបន្តចូលរូមជាមួយគណបក្សប្រជាជនកម្ពុជាហើយកាន់តំណែងជារដ្ឋលេខាធិការក្រសួងសង្គមកិច្ចកាលពីរដ្ឋាភិបាលអាណត្តិទី៥។ លោកអាម៉ាត់ យ៉ះយ៉ា ធ្លាប់មានទំនាស់ខ្លាំងក្លា ជាមួយរដ្ឋមន្ត្រីទទួលបន្ទុកបេសកម្មពិសេស លោកអូស្មាន់ ហាសាន់ លើសំណុំរឿងដីធ្លីនៅព្រះវិហារឥស្លាមក្នុងបឹកកក់។ លោកអាម៉ាត់ យ៉ះយ៉ា ក៏ត្រូវតុលាការកាត់ក្ដីឱ្យចាញ់លោកអូស្មាន់ ហាសាន់ ក្នុងសំណុំរឿងបរិហារកេរ្តី៍និងត្រូវបង់ប្រាក់១០០លានរៀលទៀតផង៕
