រដ្ឋាភិបាលវៀតណាមបានសម្តែងការព្រួយបារម្ភកាន់តែខ្លាំង ហើយអំពាវនាវឱ្យសហគមន៍អន្តរជាតិជួយជំរុញឱ្យចិនគោរពច្បាប់អន្តរជាតិ ក្រោយនាវាចិនចូលទៅតំបន់មានប្រេង និងឧស្ម័នដែលវៀតណាមអះអាងថាជារបស់ខ្លួន។
សេចក្តីថ្លែងការណ៍របស់ក្រសួងការបរទេសវៀតណាមកាលពីម្សិលមិញបានលើកឡើងថា ក្រុមនាវារបស់ចិនឈ្មោះ Haiyang Dizhi 8 បានត្រឡប់ចូលទៅរាតត្បាតនៅតំបន់សេដ្ឋកិច្ចផ្តាច់មុខ(Exclusive Economic Zone) សំបូរដោយធនធានប្រេង និងឧស្ម័ន ដែលវៀតណាមអះអាងថា ជាកម្មសិទ្ធិរបស់ខ្លួន។
រដ្ឋាភិបាលវៀតណាមបញ្ជាក់ថា បើមិនមានការអន្តរាគមន៍ណាមួយពីសហគមន៍អន្តរជាតិទេ នឹងធ្វើឱ្យរាលដាលកាន់តែខ្លាំងឡើងនៃភាពតានតឹង បង្កភាពស្មុគស្មាញ គំរាមកំហែងដល់សន្តិភាព ស្ថិរភាព និងសន្តិសុខក្នុងតំបន់សមុទ្រខាងកើត(សមុទ្រចិនខាងត្បូង) និងក្នុងតំបន់ទាំងមូល។
ក្នុងរយៈពេលប៉ុន្មានថ្ងៃកន្លងទៅនេះ ក្រុមនាវារបស់ចិនបានចូលទៅស្រាវជ្រាវក្នុងតំបន់ដែលសំបូរទៅដោយប្រេងនិងឧស្ម័ន ហើយវៀតណាមចាត់ទុកថា នេះជាសកម្មភាពបំពានដល់ដែនអធិបតេយ្យភាពរបស់ខ្លួន និងការបំពានដល់ខ្លឹមសារច្បាប់សមុទ្ររបស់អង្គការសហប្រជាជាតិ ដែលបង្កើតឡើងកាលពីឆ្នាំ១៩៨២។
ក្រោយការអំពាវនាវរបស់រដ្ឋាភិបាលវៀតណាមភ្លាមៗនោះ ក្រសួងការបរទេសរបស់សហរដ្ឋអាមេរិកបានសម្តែងការព្រួយបារម្ភចំពោះបញ្ហានេះ ហើយក៏បានជំរុញឱ្យសហគមន៍អន្តរជាតិចូលរួមតាមដាន ដូចរដ្ឋាភិបាលវៀតណាមអំពាវនាវដែរ។
បើទោះជាមានការចោទប្រកាន់ថា នាវារបស់ចិនចូលក្នុងដែនទឹកគ្រប់គ្រងដោយវៀតណាមតាំងពីថ្ងៃទី១៣ខែសីហាក៏ដោយ ប៉ុន្តែនៅមិនទាន់មានការប៉ះទង្គិចគ្នាដោយកងកម្លាំងដោយសារបញ្ហានេះនៅឡើយទេ។
ជម្លោះនៅសមុទ្រចិនខាងត្បូង ដែលវៀតណាមហៅសមុទ្រខាងកើតនោះ ភាគីជម្លោះមាន ចិនប៉េកាំង ប្រុយណេ ម៉ាឡេស៊ី ឥណ្ឌូនេស៊ី ហ្វីលីពីន និង វៀតណាម។ ក្នុងជម្លោះនេះ ចិនកំពុងក្តោបក្តាប់ដែនទឹកច្រើនជាង ហើយទំហំ៩០ភាគរយនៃជម្លោះគឺប្រឈមមុខដាក់គ្នារវាងចិន និងវៀតណាម។
របាយការណ៍របស់ GlobalFirePower បង្ហាញថា មួយរយៈកាលចុងក្រោយនេះ ទាំងចិន និង វៀតណាមហាក់កំពុងតែបង្កើនសព្វាវុធ និងពង្រឹងការហ្វឹកហាត់កងទ័ពជើងទឹកដូចគ្នា ខណៈប្រទេសទាំងពីរកំពុងប្រឈមុខដាក់គ្នាផ្នែកគ្រប់គ្រងដែនសមុទ្រ។
របាយការណ៍នេះបញ្ជាក់ថា បច្ចុប្បន្នវៀតណាមមាននាវាចម្បាំងចំនួន៦៥ គ្រឿងក្នុងនោះមាននាវាមុជទឹកចំនួន៣ និងនាវាពិឃាតចំនួ៦គ្រឿង។ចំណែកចិនគឺជាប្រទេសមួយស្ថិតនៅក្នុងចំណោមប្រទេសដែលកំពុងមានឥទ្ធិពលខ្លាំងក្លាលើពិភពលោកខាងផ្នែកកងទ័ពជើងទឹកគឺចិនមាននាវាចម្បាំងចំនួន៧១៤គ្រឿង រួមទាំងនាវាមុជទឹក៧៦គ្រឿង នាវាពិឃាតផ្ទុកយន្តហោះ៣៣គ្រឿង។