មេដឹកនាំវិស័យសហគ្រាសខ្នាតតូច និងមធ្យមនៅកម្ពុជា រំពឹងថា ក្ដីកង្វល់របស់សហគ្រាសខ្នាតតូច និងមធ្យម (SME)អំពីកង្វះខាតទុន នឹងត្រូវបានដោះស្រាយ បន្ទាប់ពីរដ្ឋាភិបាលបានសម្រេចបង្កើតធនាគារមួយ ដើម្បីផ្ដល់កម្ចីដល់វិស័យមួយនេះ។
អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា បានឲ្យដឹងថា នៅក្នុងសិក្ខាសាលាមួយកាលពីសប្ដាហ៍មុន រដ្ឋាភិបាលកម្ពុជា បានសម្រេចវិនិយោគនូវទឹកប្រាក់ ១០០លានដុល្លារ សម្រាប់បង្កើតធនាគារមួយគ្រប់គ្រងដោយរដ្ឋ ដើម្បីជួយផ្ដល់ទុនទៅដល់វិស័យ SME នៅក្នុងស្រុក។
លោក អ៊ុំ សុថា មានប្រសាសន៍ថា៖ «អ្វីដែលយើងទទួលបានពីការគាំទ្រផ្នែកទុនរបស់ធនាគារ គឺគេចង់ធ្វើឱ្យ SME មានឱកាសទទួលបានឥណទានដែលមានកម្រៃការប្រាក់ថោកជាងឥណទានធម្មតា ហើយបែបបទក៏សាមញ្ញាជាងដែរ»។
ប៉ុន្តែ អ្នកនាំពាក្យរូបនេះ បដិសេធបកស្រាយលម្អិតអំពីដំណើរការនៃធនាគាររដ្ឋមួយនេះ ដោយលោកបានរុញសំណួរទៅខាងក្រសួងសេដ្ឋកិច្ច និងហិរញ្ញវត្ថុ។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក គឹម សុភៈ ក៏បដិសេធជជែកលម្អិតអំពីកិច្ចការនេះផងដែរ ហើយបានរុញឲ្យសួរទៅរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ អ្នកស្រី ងួន សុខា ប៉ុន្តែ អ្នកស្រីបានប្រាប់ថា ជាប់រវល់ និងគ្មានតួនាទីផ្ដល់ព័ត៌មានដល់អ្នកសារព័ត៌មាននោះឡើយ។
ប្រធានសម្ព័ន្ធសមាគមសហគ្រាសខ្នាតតូច និងមធ្យម (FASME) លោក តែ តាំងប៉ បានសាទរចំពោះសេចក្ដីសម្រេចបែបនេះរបស់រដ្ឋាភិបាល ហើយលោករំពឹងថា ដំណើរការសាកល្បងផ្ដល់កម្ចីដល់វិស័យ SME នេះ នឹងជួយដោះស្រាយបញ្ហាកង្វះខាតដើមទុនរបស់វិស័យមួយនេះ។
លោក តែ តាំងប៉ មានប្រសាសន៍ថា៖ «បញ្ហាភ្លើងថ្លៃ បញ្ហាថវិកា រឿងឥណទានហ្នឹងហើយ បានរដ្ឋាភិបាលកំពុងតែដោះស្រាយ។ បញ្ហាប្រឈមសព្វបែបហ្នឹង យើងបានលើកស្នើសុំរដ្ឋាភិបាល ហើយរដ្ឋាភិបាលបានដោះស្រាយបណ្តើរៗ ដូចបញ្ហាភ្លើង បានចុះ ២០ភាគរយ បញ្ហាឥណទាន រដ្ឋបានបង្កើតធនាគារ SME ដើម្បីជួយ Support (គាំទ្រ) ទៅលើអ្នកដែលខ្វះទុនខ្ចីយកទៅប្រើប្រាស់ក្នុងការផលិត កែច្នៃផលិតផលកសិកម្មទៅជាចំណីអាហារ…»។
មេដឹកនាំវិស័យ SME រូបនេះ ក៏បានស្នើសុំទៅរដ្ឋាភិបាលឲ្យជួយទប់ស្កាត់ការនាំចូលផលិតផលសម្រេចពីបរទេសចូលមកក្នុងប្រទេសកម្ពុជាផងដែរ និងបញ្ឈប់ការតាំងពិព័រណ៌ផលិតផលសម្រេចរបស់បរទេស ដែលលោកចាត់ទុកថា ធ្វើឲ្យប៉ះពាល់ដល់ផលិតកម្មសហគ្រាសខ្នាតតូច និងមធ្យមនៅក្នុងស្រុកផងដែរ។
របាយការណ៍ក្រសួងឧស្សាហកម្ម និងសិប្បកម្មកាលពីឆ្នាំមុន បង្ហាញថា វិស័យ SME កម្ពុជា មានជាង ៥០ម៉ឺនសហគ្រាស ក្នុងនោះភាគច្រើនផ្តោតលើការកែច្នៃម្ហូបអាហារបម្រើដល់វិស័យទេសចរណ៍ កសិ-ឧស្សាហកម្ម និងកែច្នៃផលិតផលប្រើប្រាស់ទូទៅជាដើម។របាយការណ៍ដដែលនោះ អះអាងថា វិស័យនេះ បានផ្ដល់ការងារដល់ពលរដ្ឋខ្មែរពី ៧០ ទៅ ៨០ភាគរយ និងនាំមកនូវផលទុនជាតិសរុបចំនួន ៥៨ភាគរយ៕