ក្រសួងការងារនៅថ្ងៃនេះ បានចេញប្រកាសមួយដោយហាមមុខជនបរទេសប្រកបការងារចំនួន១០ប្រភេទ ដែលជាមុខរបររកចំណូលផ្ទាល់ខ្លួន។
ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងក្នុងប្រកាសរបស់ខ្លួន ដែលចុះផ្សាយនៅថ្ងៃ២៨ ខែសីហានេះថាការងារទាំង១០ប្រភេទនោះរួមមាន បើកយានជំនិះគ្រប់ប្រភេទជាលក្ខណៈអាជីវកម្ម លក់ដូរដោយមធ្យោបាយថ្មើរជើង ឬយានជំនិះគ្រប់ប្រភេទនៅទីសាធារណៈ ម៉ាស្សានិងចាប់សសៃរតាមសាធារណៈ កាត់សក់ អ៊ុតសក់ និងថែរក្សាសម្ពស្ស ប៉ះកង់និងជួសជុលយាន្តយន្ត។ ក្រៅពីនេះ ក៏មានមួយមុខរបរមួយចំនួនទៀតដូចជាកាត់ដេរ សេវាកម្មដេរ និងសំអាតស្បែកជើង ផលិតវត្ថុអនុស្សាវរីយ៍ខ្មែរ ផលិតឧបករណ៍ភ្លេងខ្មែរ បាត្រលោក ព្រះពុទ្ធរូប និងជាងទង ជាងច្នៃត្បូងពេជ្រជាដើម។
ប្រកាសដដែល ក៏បញ្ជាក់ថាក្រសួងនឹងមិនផ្តល់ ឬមិនបន្តសុពលភាពបណ្ណ/សៀវភៅការងារដល់ជនបរទេសដែលកំពុងប្រកបមុខរបរ និងការងារខាងលើនេះនោះទេ។ ក្រសួងការងារ បានព្រមានផងដែរថានឹងចាត់វិធានការច្បាប់ តាមរយៈការផាកពិន័យជាប្រាក់ និងផ្តន្ទាទោសតាមច្បាប់ការងារ ទៅលើជនបរទេសទាំងឡាយណា ដែលមិនអនុវត្តន៍តាមប្រកាសនេះ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ មានប្រសាសន៍ថា ចំណាត់ការរបស់រដ្ឋាភិបាលនៅពេលនេះហាក់យឺតពេលបន្តិចក្នុងការហាមឃាត់ជនបរទេសមិនឲ្យធ្វើស្វ័យនិយោជន៍នៅកម្ពុជា ខណៈបច្ចុប្បន្ននេះលោកថា ជនបរទេសមួយចំនួន កំពុងដណ្តើមមុខរបរពីប្រជាពលរដ្ឋកម្ពុជា។
លោក មានប្រសាសន៍ថា៖ «ខ្ញុំយល់ឃើញថា វាហាក់ដូចជាយឺតពេលបន្តិច ប៉ុន្តែវាមិនទាន់ហួសពេលទេ។ យើងមើលទៅដូចថាកន្លងមក ជាង១០ឆ្នាំ ២០ឆ្នាំហើយ ដែលជនបរទេសជាច្រើនបានដណ្តើមមុខរបរខ្មែរ ដូចជា វៀតណាមដណ្តើមមុខរបរខ្មែរ ហើយខាងចិនមួយមុខទៀត រឹតតែខ្មែរបាត់មុខរបរ ច្រើនឡើងៗ ធ្វើឲ្យការព្រួយបារម្ភរបស់យើងក៏ដូចជាពេលបច្ចុប្បន្ននិងអនាគត់»។
លោក វន់ ពៅ ជំរុញទៅរដ្ឋាភិបាលពង្រឹងការអនុវត្តច្បាប់ឲ្យបានតឹងរឹង ទើបទទួលបានផលវិជ្ជមាន។
របាយការណ៍បូកសរុបការងាររបស់ក្រសួងការងារនិងបណ្តុះបណ្តាលវិជ្ជាជីវៈ ដែលចេញកាលពីខែមីនា ឆ្នាំ២០១៨ ឱ្យដឹងថា កាលពីឆ្នាំ២០១៧ ក្រសួងការងារ បានផ្តល់បណ្ណ និងសៀវភៅការងារដល់កម្មករបរទេស ចំនួនជាង៥ម៉ឺននាក់(៥៦ ៩៧៥)៕
