ក្រុមសកម្មជនព្រៃឈើ និងយុវជនអ្នកស្រលាញ់ធនធានធម្មជាតិ បានលើកឡើងថា រដ្ឋាភិបាលនៅពុំទាន់មានឆន្ទៈពេញលេញទាំងស្រុង ក្នុងការថែរក្សាព្រៃឈើនៅឡើយទេ បើទោះបីជារដ្ឋាភិបាលបានធ្វើយុទ្ធនាការបង្ក្រាបបទល្មើសព្រៃឈើក្នុងរយៈពេលប៉ុន្មានខែចុងក្រោយនេះក្ដី។
ក្រុមសកម្មជនព្រៃឈើ និងយុវជនស្រឡាញ់ធនធានធម្មជាតិ បានលើកឡើងបែបនេះនៅក្នុងលិខិតមួយ ចេញកាលពីថ្ងៃទី៣០ ខែសីហាកន្លងមកនេះ ដែលបង្ហាញកង្វល់អំពីបញ្ហាព្រៃឈើនៅកម្ពុជា។
សកម្មជនព្រៃឈើ លោក ហេង ស្រស់ ដែលជាហត្ថលេខីមួយរូបក្នុងចំណោមហត្ថលេខី ៤៣រូបផ្សេងទៀត បានប្រាប់វីអូឌីបន្ថែមនៅថ្ងៃនេះថា ក្រុមសកម្មជនព្រៃឈើ បានរកឃើញថា ក្រុមហ៊ុនយ៉ាងហោចណាស់ ១០ទៀត នៅតែបន្តកាន់កាប់អាជ្ញាប័ណ្ណ ដែលត្រូវបានអនុញ្ញាតឱ្យកាប់ និងកែច្នៃព្រៃឈើនៅឡើយ។
លោក ហេង ស្រស់ ប្រាប់ថា៖ «បើសិនជាគាត់[រដ្ឋាភិបាល]មិនយកលិខិតហ្នឹងទៅធ្វើការពិចារណា បិទរោងចក្រ ក៏ដូជាបញ្ឈប់នូវការចេញលិខិត PC ដែលជាលិខិតអនុញ្ញាតឱ្យមានការដឹកជញ្ជូនឈើទេ អាហ្នឹងហាក់បីដូចជាគាត់រាល់ថ្ងៃហ្នឹងគាត់កំពុងទប់ស្កាត់ ហើយនិងគាត់បង្រ្កាបហ្នឹងហាក់បីដូចជាធ្វើឱ្យល្អមើលហ្នឹង។ មិនមែនជាការធ្វើដើម្បីឱ្យមានផលប្រយោជន៍សម្រាប់ប្រទេសជាតិផងហ្នឹង»។
យុវនិស្សិត សោម តាំងអ៊ី ដែលបានចុះហត្ថលេខាលើលិខិតអំពាវនាវ និងធ្លាប់ចុះអង្កេតបទល្មើសព្រៃឈើចំនួន ២លើកនៅតំបន់ព្រៃព្រះរការផងនោះ បានប្រាប់ថា លោកព្រួយបារម្ភពីការបាត់បង់ធនធានព្រៃឈើនៅកម្ពុជានាថ្ងៃអនាគត ប្រសិនបើគ្មានវិធានការទប់ស្កាត់ឲ្យបានទាន់ពេលវេលាទេនោះ។
លោក តាំងអ៊ី ប្រាប់ថា៖ «ចង់សំណូមពរទៅកាន់រដ្ឋាភិបាលធ្វើយ៉ាងណាពង្រឹងការអនុវត្តច្បាប់ឱ្យបានត្រឹមត្រូវ ហើយលុបបំបាត់អំពើពុករលួយ ព្រោះអំពើពុករលួយក៏ជាហេតុនាំឱ្យមានការបាត់បង់ព្រៃឈើដែរ ហើយអីដែលសំខាន់ សូមឱ្យគាត់[រដ្ឋាភិបាល] ធ្វើតាមអ្វីដែលយើងសំណូមពរនៅក្នុងលិខិតដែលក្រុមសកម្មជនព្រៃឈើ និងនិសិត្សដែលស្រលាញ់ធនធានធម្មជាតិទាំង ៤ចំណុច»។
កញ្ញា សារ៉ន ចរិយា ជានិសិត្សឆ្នាំទី២ ម្នាក់ទៀត នៃដេប៉ាដឺម៉ង់បរិស្ថាន នៅសកលវិទ្យាល័យភូមិន្ទភ្នំពេញ ដែលបានចុះអង្កេតពីការកាប់បំផ្លាញព្រៃឈើនៅឧទ្យានជាតិព្រៃព្រះរកា និងព្រៃឡង់ លើកឡើងថា ប្រតិបត្តិការចុះបង្រ្កាបបទល្មើសព្រៃឈើពីសំណាក់រដ្ឋាភិបាល នៅមិនទាន់មានភាពសកម្មគ្រប់គ្រាន់នៅឡើយទេ។
កញ្ញា ចរិយា និយាយថា៖ «ការចុះបង្រ្កាបរបស់រាជរដ្ឋាភិបាល ឬសមត្ថកិច្ចនៅតំបន់ហ្នឹង គឺគាត់អត់មាន លក្ខណៈថា និយាយទៅគាត់អត់ស្ទុះស្ទារនៅក្នុងការបង្រ្កាបវា។ ហើយណាមួយវាពាក់ព័ន្ធនឹងក្រកាស PC មួយដែលចេញដោយខាងក្រសួង[កសិកម្ម] រុក្ខាប្រមាញ់ និងនេសាទហ្នឹង។… ខ្ញុំចង់សំណូមពរទៅកាន់រដ្ឋាភិបាលធ្វើយ៉ាងណាពង្រឹងការអនុវត្តច្បាប់ឱ្យបានត្រឹមត្រូវ ហើយលុបបំបាត់អំពើពុករលួយ ព្រោះអំពើពុករលួយក៏ជាហេតុនាំឱ្យមានការបាត់បង់ព្រៃឈើដែរ»។
ប្រធានផ្នែកសើបអង្គេតនៃអង្គការលីកាដូ លោក អំ សំអាត ទទួលស្គាល់ការថមថយនៃបទល្មើសព្រៃឈើ បន្ទាប់ពីមានយុទ្ធនាការចុះបង្រ្កាបរបស់គណៈកម្មការជាតិទប់ស្កាត់ និងបង្រ្កាបបទល្មើសធនធានធម្មជាតិ ប៉ុន្តែ លោកប្រាប់ ប្រតិបត្តិការនោះ ធ្វើឡើងដោយអន្លើនៅឡើយ។
លោក សំអាត លើកឡើងថា៖ «ខ្ញុំគ្រាន់ឃើញថា វាមានការធ្លាក់ចុះដោយសារប្រតិបត្តិការរបស់រដ្ឋាភិបាលក៏ដោយ ក៏បទល្មើសនេះ[ព្រៃឈើ]វានៅតែបន្តកើតខ្លះដែរ។ អីចឹងខ្ញុំគិតថា ទាក់ទងនឹងបញ្ហាទាំងអស់នេះ ទី១ រដ្ឋាភិបាលគួរតែផ្អាកអាជ្ញាបណ្ណទាក់ទងទៅនឹងអាជីវកម្មឈើ ដែលរដ្ឋាភិបាលបានដក ធ្លាប់ដកនៅមណ្ឌលគីរីហ្នឹង។ អីចឹងកន្លែងផ្សេងៗ គួរតែផ្អាកសិន ដើម្បីកុំឱ្យវាមានផលប៉ះពាល់ដល់ដំណើរការប្រតិបត្តិរបស់រដ្ឋាភិបាលបង្រ្កាប និងទប់ស្កាត់ព្រៃឈើហ្នឹង»។
អ្នកនាំពាក្យគណៈកម្មការជាតិទប់ស្កាត់ និងបង្រ្កាបបទល្មើសធនធានធម្មជាតិ លោក អេង ហ៊ី បានចាត់ទុកការអំពាវនាវរបស់ក្រុមសកម្មជនព្រៃឈើ និងយុវជនទាំងនោះថា គ្រាន់តែជាការបញ្ចេញទស្សនៈតែប៉ុណ្ណោះ ប៉ុន្តែ លោកថា គណៈកម្មការរបស់លោក កំពុងធ្វើការទប់ស្កាត់ និងបង្រ្កាបបទល្មើសព្រៃឈើទូទាំងប្រទេស។
លោក អេង ហ៊ី មានប្រសាសន៍ថា៖ «សព្វថ្ងៃហ្នឹង យើងធ្វើនៅទូទាំងប្រទេស។ ឥឡូវយើងឃើញ រកឃើញឡានប៉ាកុងហ្នឹង គឺនៅបាត់ដំបង១០គ្រឿងទៀត។ គេកំពុងតែធ្វើរាល់ថ្ងៃហើយ តែវាអត់ឃើញអ្នកណាដែលមានបទល្មើស។ បើមានបទល្មើសគេបង្រ្កាបហើយ។ ហើយបើសិនជាមាន សូមឱ្យគាត់រាយការណ៍ទៅ[អាជ្ញាធរ]ពាក់ព័ន្ធជាមួយហ្នឹងតំបន់ហ្នឹងតែម្តង។ ដូចថា ឥឡូវពាក់ព័ន្ធនឹងខេត្តណា គឺសូមឱ្យគាត់រាយការណ៍ទៅខេត្តហ្នឹង ហើយបើខេត្តហ្នឹងមិនធ្វើ នឹងចាំគណៈកម្មការមានវិធានការ»។
បើតាមលោក អេង ហ៊ី ថ្លែងប្រាប់វីអូឌីនៅខែកក្កដកន្លងមកថា នៅដើមឆ្នាំ២០១៦ គណៈកម្មការរបស់លោកបង្ក្រាបបានឈើជាង ១០ម៉ឺនម៉ែត្រគូប ហើយនៅឆ្នាំ២០១៨ បង្ក្រាបបានឈើជាង ៤ពាន់ម៉ែត្រគូប ហើយឃាត់ខ្លួនមនុស្សបានចំនួន ១៦៣នាក់ ក្នុងនោះមនុស្ស ៦៣នាក់ ត្រូវបានបញ្ជូនទៅតុលាការ ហើយមនុស្សដទៃទៀត ត្រូវបានធ្វើការពិន័យ និងអប់រំ៕