តំណាងអយ្យការអមសាលាដំបូងខេត្តកំពង់ចាម បានចេញដីកាកោះហៅអតីតសមាជិកយុវជនគណបក្សប្រឆាំងនៅខេត្តកំពង់ចាមម្នាក់ឱ្យចូលបំភ្លឺពាក់ព័ន្ធនឹងអំពើញុះញង់ឱ្យប្រព្រឹត្តបទឧក្រិដ្ឋជាអាទិ៍។
ក្នុងដីកាកោះហៅចុះថ្ងៃទី២៨ ខែសីហា ឆ្នាំ២០១៩ តំណាងអយ្យការអមសាលាដំបូងខេត្តកំពង់ចាម លោក ហាក់ ហ៊ាន់ បានបង្គាប់ឱ្យ លោក រិន រដ្ឋ រស់នៅភូមិព្រះអណ្ដូងទី២ ឃុំព្រះអណ្ដូង ស្រុកស្ទឹងត្រង់ ចូលទៅកាន់តុលាការខេត្តនៅថ្ងៃទី១៩ ខែកញ្ញា ឆ្នាំ២០១៩ វេលាម៉ោង ៨ : ៣០ នាទីព្រឹក។
ដីកានោះ បញ្ជាក់ថាការកោះហៅនេះគឺដើម្បីសាកសួរក្នុងដំណើររឿងអំពើញុះញង់ឱ្យប្រព្រឹត្តបទឧក្រិដ្ឋជាអាទិ៍។
អតីតសមាជិកយុវជនគណបក្សប្រឆាំង លោក រិន រដ្ឋ ប្រាប់វីអូឌីនៅថ្ងៃនេះថាការចេញដីកាកោះហៅនេះ ធ្វើឡើងបន្ទាប់ពីលោកបានទៅជួបអតីតមេដឹកនាំគណបក្សប្រឆាំងលោក សម រង្ស៊ីនៅប្រទេសម៉ាឡេស៊ីកាលពីថ្ងៃទី១៥ ខែសីហា ឆ្នាំ២០១៩។
លោក ថា៖«ខ្ញុំត្រឡប់មកវិញនៅថ្ងៃទី១៨ ខែសីហា ឆ្នាំ២០១៩ ពេលល្ងាច ដល់ថ្ងៃទី១៩ ខែសីហា ខ្ញុំបានទទួលព័ត៌មានថាមានប៉ូលីសមកស៊ើបអង្កេតឈ្មោះអី។ ហើយខ្ញុំក៏រត់នៅថ្ងៃទី១៩ ខែសីហាហ្នឹងតែម្ដង»។
កាលពីថ្ងៃទី២ និង៣ ខែកញ្ញា ឆ្នាំ២០១៩ តុលាការខេត្តកំពង់ធំសម្រេចឃុំខ្លួនអតីតសកម្មជននិងអតីតសមាជិកក្រុមប្រឹក្សាឃុំគណបក្សប្រឆាំង៣នាក់នៅពន្ធនាគារបណ្ដោះអាសន្ន។ ការសម្រេចឃុំខ្លួនអតីតសកម្មជនបក្សប្រឆាំងទាំង៣ នាក់នោះ ធ្វើឡើងបន្ទាប់ពីពួកគេបានបង្ហោះសារនិងចែករំលែកព័ត៌មានវិទ្យុអាស៊ីសេរីដោយគាំទ្រការវិលត្រឡប់របស់លោក សម រង្ស៊ី មកកម្ពុជា។
របាយការណ៍របស់អង្គការលីកាដូ បានបង្ហាញថា អតីតសកម្មជន និងមន្ត្រីគណបក្សសង្គ្រោះជាតិ ១៥៦នាក់ហើយ ត្រូវបានអាជ្ញាធរ ឬតុលាការកោះហៅសាកសួរ ឬចូលបំភ្លឺពាក់ព័ន្ធនឹងការសម្ដែងមតិ និងការជួបជុំរបស់ពួកគេ ស្របពេលដែលសកម្មជនបក្សប្រឆាំង១៩នាក់ ត្រូវបានសមត្ថកិច្ចចាប់ខ្លួននិងដាក់ឃុំ គិតត្រឹមចុងខែសីហាក្នុងឆ្នាំ២០១៩។
