អតីតមេដឹកនាំគណបក្សប្រឆាំងនៅក្រៅប្រទេស បានសម្រេចដាក់ផែនការវិលត្រលប់របស់លោក សម រង្ស៊ី ដែលគ្រោងវិលត្រឡប់នៅដើមខែវិច្ឆិកាខាងមុខ ខណៈដែលរដ្ឋាភិបាលត្រៀមទប់ស្កាត់ភាពមិនប្រក្រតីនៅថ្ងៃបុណ្យភ្ជុំបិណ្ឌនេះផងដែរ។
លោក សម រង្ស៊ី ដែលបានប្រកាសខ្លួនឯងជាប្រធានស្ដីទីគណបក្សសង្គ្រោះជាតិ បានកំណត់ថ្ងៃវិលចូលស្រុករបស់លោកវិញនាថ្ងៃ៩ វិច្ឆិកាខាងមុខ ចំថ្ងៃខួប ៦៦ឆ្នាំនៃបុណ្យឯករាជ្យជាតិ។
ក្នុងសេចក្តីប្រកាសព័ត៌មានចុះថ្ងៃ១៥ កញ្ញា អតីតគណបក្សសង្គ្រោះជាតិដែលមានមូលដ្ឋាននៅរដ្ឋ Massachuesetts សហរដ្ឋអាមេរិក បានសម្រេចរៀបចំផែនការសកម្មភាពសម្រាប់ដំណើរវិលត្រឡប់របស់លោក សម រង្ស៊ី មាន ៥ចំនុចដែលរួមមាន សម្រេចឱ្យលោក សម រង្ស៊ី និងថ្នាក់ដឹកនាំបក្សចូលទៅកាន់តំបន់អាស៊ីនៅថ្ងៃ៥ វិច្ឆិកា រៀបចំថវិកាសម្រាប់គាំទ្រដល់កងកម្លាំងផ្ដាច់ខ្លួន ប្រគល់ភារកិច្ចឱ្យរចនាសម្ព័ន្ធបក្សទាំងក្នុង និងក្រៅប្រទេស អនុវត្តន៍ផែនការមាតុភូមិនិវត្តន៍ និងអំពាវនាវឱ្យពលករក្រៅស្រុកចូលរួមជាកម្លាំងនៃការចូលស្រុកនេះផងដែរ។
អនុប្រធានគណបក្សសង្គ្រោះជាតិ លោកស្រី មូ សុខហួរ បានឱ្យ VOD ដឹងថា ការសម្រេចនេះ គឺជាស្មារតីរបស់គណបក្សលោកស្រីក្នុងការជំរុញឱ្យមានការផ្លាស់ប្ដូរជាវិជ្ជមានក្នុងប្រទេស។
លោកស្រី មូរ សុខហួរ ប្រាប់ថា៖ «យើងដឹងច្បាស់ថា នៅគ្រប់ទីកន្លែងក្នុងប្រទេសកម្ពុជាយើង គឺមហាជន និងសកម្មជនយើងមានស្មារតីរឹងមាំ ចង់ឱ្យមានការផ្លាស់ប្ដូរហើយសកម្មភាពនោះមានគ្រប់ទីកន្លែងដែលធ្វើឱ្យរដ្ឋាភិបាលលោកហ៊ុន សែន មានការខ្វាយខ្វល់ដែលបង្កឱ្យមានការចាប់ចងសកម្មជន ឬក៏ប្រជាពលរដ្ឋដោយខុសច្បាប់។ តែយើងឃើញថាសកម្មជនយើង គណបក្សសង្គ្រោះជាតិមិនដកថយ គឺទៅមុខដើម្បីឆ្ពោះទៅរកបំណងរបស់ពលរដ្ឋគឺការផ្លាស់ប្ដូរជាវិជ្ជមាន»។
អ្នកនាំពាក្យរាជរដ្ឋាភិបាល លោក ផៃ ស៊ីផាន បដិសេធធ្វើការឆ្លើយតបចំពោះការសម្រេចនេះ ដោយលោកចាត់ទុកថាជាការសម្រេចរបស់ក្រុមក្រៅច្បាប់។
លោក ផៃ ស៊ីផាន ប្រាប់ថា៖ «សុំជម្រាបជូនអញ្ចេះ! អាចលនាសង្គ្រោះជាតិ ឬបក្សសង្គ្រោះជាតិ ខ្ញុំអត់មានសមត្ថកិច្ចណាទៅឆ្លើយឆ្លងជាមួយពួកហ្នឹងទេ! ព្រោះសុទ្ធតែពួកក្រៅច្បាប់ទាំងអស់»។
ស្របពេលដែលបក្សសង្គ្រោះជាតិរៀបចំបែបនេះ កាលពីថ្ងៃទី១៣ កញ្ញាកន្លងទៅរដ្ឋមន្ត្រីក្រសួងមហាផ្ទៃ លោក ស ខេង បានសម្រេចចាត់ឱ្យក្រុមការងារថ្នាក់ជាតិចុះមូលដ្ឋានឱ្យចូលរួមពិធីបុណ្យភ្ជុំបិណ្ឌនៅគ្រប់វត្តទូទាំងប្រទេស ដោយឆ្លៀតឱកាសឱ្យជួយផ្សព្វផ្សាយពីកិច្ចខិតខំរបស់រដ្ឋាភិបាលក្នុងការថែរក្សាសុខសន្ដិភាពរបស់កម្ពជាផងដែរ។
ក្នុងសារសំឡេងដែលបានបែកធ្លាយ ដែលគេជឿថាជាប្រសាសន៍របស់លោក ស ខេង រដ្ឋមន្ត្រីមហាផ្ទៃរូបនេះ បានបញ្ជារឱ្យមន្ត្រីចុះមូលដ្ឋានតាមវត្តអារ៉ាមទាំងនោះ ដើម្បីសង្កេត និងទប់ស្កាត់ភាពមិនប្រក្រតី ក្រោយពេលដែលលោកទទួលដំណឹងថាចលនាសង្គ្រោះជាតិនឹងប្រើប្រាស់ការជួបជុំនៅទីវត្តអារ៉ាមក្នុងពេលបុណ្យភ្ជុំដើម្បីពិភាក្សារៀបចំផែនការងងឹតប្រឆាំងរដ្ឋ។
លោក ស ខេង ថ្លែងថា៖ «សុំជម្រាបជូនឯកឧត្តម លោកជំទាវ អភិបាលរាជធានីខេត្ត មេត្តាជា្របអញ្ចេះ ពួកប្រឆាំងក្នុងឱកាសបុណ្យភ្ជុំបិណ្ឌនេះ គេបានឱ្យគ្នាគេចុះទៅតាមវត្តពេលភ្ជុំបិណ្ឌនោះឱ្យបានច្រើន ដើម្បីជាឱកាសពេលភ្ជុំបិណ្ឌហ្នឹងជួបជុំគ្នា ហើយនឹងពិភាក្សា ឬក៏រៀបចំផែនការខ្មៅរបស់គេនោះ។ ឥឡូវនេះ យើងនាំគ្នារៀបចំតាមខ្ញុំ យើងរៀបចំឱ្យមន្ត្រីចុះតាមវត្ត ម្យ៉ាង គឺដើម្បីរៀបចំបុណ្យភ្ជុំបិណ្ឌ ម្យ៉ាងគឺរៀបចំសភាពការណ៍ឱ្យបានល្អផង»។
អ្នកនាំពាក្យក្រសួងមហាផ្ទៃ លោក ខៀវ សុភ័គ បដិសេធមិនបញ្ជាក់ពីសារសំឡេងនេះ ដោយឱ្យអ្នកសារព័ត៌មានវិនិច្ឆ័យដោយខ្លួនឯង។
លោក ខៀវ សុភ័គ ប្រាប់ថា៖ «ពូអត់មានអីឆ្លើយទេក្មួយ ពូសុំមិនឆ្លើយរឿងហ្នឹង! ក្មួយឆ្លើយខ្លួនឯងមួយម៉ាត់ទៅ គិតឡើងវិញទៅ។ រៀនជំនាញមិនដល់បានជាមិនដឹង»។
អ្នកវិភាគនយោបាយលោកបណ្ឌិត ឡៅ ម៉ុងហៃ យល់ថា វិធានការរបស់រដ្ឋាភិបាលជាបន្តបន្ទាប់នេះ ហាក់បីដូចជាកំពុងបង្ហាញនូវការភ័យខ្លាចចំពោះការវិលចូលស្រុកវិញរបស់លោកសម រង្ស៊ី។ លោកបន្ថែមថា ការបង្កើនវិធានការក្ដៅដាក់គ្នាទៅវិញទៅមកនេះមិនបានធ្វើឱ្យមានភាពល្អប្រសើរដល់ជាតិទេ។
លោកបណ្ឌិត ឡៅ ម៉ុងហៃ មានប្រសាសន៍ថា៖ «ចេះតែចាត់វិធានការផ្សេងៗ ទី១ ដើម្បីទប់ស្កាត់ សម រង្ស៊ី កុំឱ្យដណ្ដើមអំណាច។ ទី២ អ្នកដែលមានអំណាចហើយនៅតែឱបក្រសោបអំណាចជាបន្តទៀត ហើយអ្នកដែលមានអំណាចហ្នឹងក៏ចេះតែបន្តប្រើប្រាស់ធនធានរបស់ជាតិហ្នឹង ជាពិសេសលុយកាក់ពន្ធដាររបស់ប្រជាពលរដ្ឋហ្នឹង យកទៅប្រើប្រាស់ដើម្បីពង្រឹងអំណាចរបស់ខ្លួនទៅ។ […] ហ្នឹង គឺនៅក្នុងប្រវត្តិសាស្ត្រយើងអត់ហ៊ានថា យ៉ាងម៉េចៗទេ តែវាអាចកើតមានគ្រាន់តែខុសគ្នាបន្ដិចបន្ដួច។ អាហ្នឹង វាអាចទៅជារងើកភ្លើង ឬផ្កាភ្លើងដែលធ្វើឱ្យឆេះផ្ទះបាន»។
លោកបណ្ឌិតឡៅ ម៉ុងហៃ ឱ្យជាយោបល់ថា នយោបាយទាំងពីរគួរស្រុះស្រួលគ្នាវិលរកតុចរចារដើម្បីពិភាក្សា និងសាមគ្គីជាតិវិញទើបធ្វើឱ្យប្រទេសជាតិរីកចំរើន។
ក្រោយការនិរទេសខ្លួនឯងកាលពីចុងឆ្នាំ២០១៥ លោក សម រង្ស៊ី បានប្រកាសវិលចូលកម្ពុជាវិញនៅក្នុងឆ្នាំ២០១៩នេះ ខណៈដែលជាប់បណ្ដឹងជាច្រើនប្ដឹងដោយមេដឹកនាំគណបក្សប្រជាជនកម្ពុជា។
រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន បានប្រកាសថា នឹងចាប់ខ្លួនលោក សម រង្ស៊ី នៅពេលលោកវិលត្រឡប់ចូលមកកម្ពុជាវិញនោះ ខណៈដែលសកម្មជន និងមន្ត្រីមូលដ្ឋានអតីតគណបក្សសង្គ្រោះជាតិចំនួន ២៦នាក់ហើយត្រូវបានអាជ្ញាធរចាប់ខ្លួន ដោយចោទថា មានពាក់ព័ន្ធនឹងការវិលចូលស្រុករបស់លោក សម រង្ស៊ី នេះ៕