ជនជាតិដើមភាគតិចពូនងខេត្តមណ្ឌលគិរី បានដាក់ពាក្យបណ្ដឹងទៅតុលាការដែលប្ដឹងអាជ្ញាធរមូលដ្ឋាន ដោយពួកគេថា មិនបានទប់ស្កាត់ការទន្ទ្រានដីព្រៃ និងការកាប់ព្រៃឈើក្នុងតំបន់ដែនជម្រកសត្វព្រៃភ្នំណាំលៀ។
តំណាងសហគមន៍ភូមិពូលុ ឃុំប៊ូស្រា ស្រុកពេជ្រាដា លោក ក្លាង ថូល ប្រាប់វីអូឌីនៅថ្ងៃនេះថា កាលពីថ្ងៃទី១២ ខែកញ្ញា ឆ្នាំ២០១៩ពួកគាត់ចំនួន១៥ នាក់ បានចុះល្បាតព្រៃ ដោយចាប់បានពលរដ្ឋម្នាក់ដែលស៊ីឈ្នួលកាប់រានដីព្រៃសហគមន៍នីតិបុគ្គល ដែលមានទីតាំងស្ថិតក្នុងតំបន់ដែនជម្រកសត្វព្រៃភ្នំណាំលៀអស់ជាង២ ហិកតា។
លោក បន្តថាពួកគាត់ប្ដឹងមេប៉ុស្តិ៍ទួលសា្វយឈ្មោះ លាង ណាង និងមេឃុំដាក់ដាំ លោក ចាស់ណា ទៅតុលាការ ដោយសារតែ អាជ្ញាធរទាំងពីរបែរជាបណ្ដោយឱ្យពលរដ្ឋចូលកាប់ទន្ទ្រានដី និងការកាប់ព្រៃឈើដោយមិនធ្វើការទប់ស្កាត់ ទាំងដីព្រៃសហគមន៍នេះ ស្ថិតក្នុងដែនគ្រប់គ្រងរបស់ខ្លួននោះ។
លោក ស្នើទៅតុលាការ និងស្ថាប័នពាក់ព័ន្ធចាត់វិធានការទៅលើអ្នកការកាប់ទន្ទ្រានដីព្រៃនិងកាប់បំផ្លាញ់ព្រៃឈើ រួមទាំងមន្ត្រីថ្នាក់ក្រោមទៅតាមច្បាប់។
លោក ថា៖«ខ្ញុំសំណូមពរទៅព្រះរាជអាជ្ញាហ្នឹង ធ្វើតាមច្បាប់ ដែលកុំឱ្យ លម្អៀង ព្រោះកន្លងទៅដាក់ពាក្យបណ្ដឹងជាច្រើនករណីពីមុនៗអត់បានផលអីសោះ ។ ខ្ញុំដាក់ពាក្យបណ្ដឹងបរិហារក៏មាន បទកាប់ទន្ទ្រានដីព្រឈើក៏មានដែរ ប៉ុន្តែអត់មានប្រសិទ្ធភាពលើហ្នឹងមិនដឹងម៉េច»។
មេប៉ុស្តិ៍៨លោក លាង ណាង បានបដិសេធការចោទប្រកាន់របស់ប្រជាសហគមន៍ ដែលថាអាជ្ញាធរធ្វេសប្រហែលក្នុងការទប់ស្កាត់បទល្មើសព្រៃឈើនិងការទន្ទ្រានដីព្រៃ។ លោកបន្តថា ប្រសិនបើតុលាការកោះហៅលោកនឹងចូលបំភ្លឺចំពោះរឿងនេះ។
លោក ថា៖«ពួកខ្ញុំនៅមិនបានជាប់ ព្រោះត្រូវទៅប្រជុំនៅខេត្តនៅ វរៈអីអ៊ីចឹង ។ [កន្លងមក] អ្នកភូមិនៅនោះឧស្សាហ៍តេមកប្រាប់ខ្ញុំដែរ ខ្ញុំក៏បានឱ្យកម្លាំងទប់ស្កាត់រួចរាល់ម្ដង ហើយក្រោយមកៗទៀតខ្ញុំក៏អត់បានដឹងដែរ»។
មេឃុំដាក់ដាំលោក ចាស់ ណា ក៏បានបដិសេធការចោទប្រកាន់របស់ប្រជាសហគមន៍ជនជាតិដើមភាគតិច។
លោក មានប្រសាសន៍ថា៖«ពួកខ្ញុំមិនបានធ្វេសប្រហែលអីទេ គ្រាន់តែខាងនោះ[ភូមិនោះវាជិត] ខាងខ្ញុំវាឆ្ងាយ[ភូមិខ្ញុំវាឆ្ងាយ] ដ៏អ៊ីចឹងខាងខ្ញុំក៏មិនចុះ»។
អ្នកនាំពាក្យសាលាដំបូងខេត្តមណ្ឌលគិរីលោក មាស ប្រុស មានប្រសាសន៍ថា តុលាការបានទួលពាក្យបណ្ដឹងពីក្រុមប្រជាសហគមន៍នឹងបានបញ្ជូនទៅព្រះរាជអាជ្ញាពិនិត្យរួចហើយដែរ។
លោក ថា៖«ទទួលហើយបញ្ជូនទៅខាងលើហើយ អត់ទុកទេ។ ព្រះរាជអាជ្ញាគាត់ ចាត់ឱ្យព្រះរាជអាជ្ញារងមួយណា [អត់បានដឹងទេ]ក្នុងសំណុំរឿងហ្នឹង»។
អ្នកប្រឹក្សាយោបល់សម្រាប់សហគមន៍ជនជាតិដើមភាគតិចនៅខេត្តមណ្ឌលគិរី លោក គ្រើង តុលា ស្នើទៅរដ្ឋាភិបាលនិងតុលាការ ឱ្យដាក់ទោសលើមន្ត្រីអសកម្មដែលមិនចុះទប់ស្កាត់បទល្មើសព្រៃឈើដូចគ្នានឹងអ្នកប្រព្រឹត្តបទល្មើសដែរ។
បើតាមតំណាងសហគមន៍ពូលុ លោក ក្លាង ថូល អះអាងថា ព្រៃសហគមន៍នីតិបុគ្គលត្រូវបានក្រសួងទទួលស្គាល់ និងចុះបញ្ជីកាលពីឆ្នាំ២០១១ ដោយដាក់ឱ្យស្ថិតក្រោមការគ្រប់គ្រងដោយសហគមន៍ពូលុ ដែលមានប្រជាពលរដ្ឋជិត២០០គ្រួសារអាស្រ័យផល។ ព្រៃនេះស្ថិតក្នុងតំបន់ដែនជម្រកសត្វព្រៃភ្នំណាំលៀ។
ដែនជម្រកសត្វព្រៃណាំលៀ ត្រូវរដ្ឋាភិបាលបានដាក់បញ្ចូលជាដែនជម្រកសត្វព្រៃ កាលពីឆ្នាំ២០១៦ ដោយស្ថិតនៅក្រោមការគ្រប់គ្រងរបស់ក្រសួងបរិស្ថានដែលមានផ្ទៃដីជាង ២ម៉ឺនហិកតា (២១.៩៣៣)៕