លោកនាយករដ្ឋមន្ត្រីហ៊ុន សែន បញ្ជាក់ថា សុខភាពរបស់លោកអាចហាត់ប្រាណបានធម្មតាវិញ ក្រោយពេលផ្អាករយៈពេល៧០ថ្ងៃកន្លងទៅតាមការណែនាំរបស់ក្រុមគ្រូពេទ្យជំនាញ ដោយសារជំងឺគ្រេចស្មា។
លោកនាយករដ្ឋមន្ត្រីហ៊ុន សែន កាលពីម្សិលមិញបង្ហាញរូបមួយចំនួនរត់លើម៉ាស៊ីនហាត់ប្រាណ ភ្ជាប់ជាមួយសារសរសេរថា លោកអាចហាត់ប្រាណបានវិញហើយ។
លោក ហ៊ុន សែន៖« ថ្ងៃទីមួយបានហាត់ប្រាណឡើងវិញបន្ទាប់ពី៧០ថ្ងៃមិនបានហាត់ដោយសារគ្រេចស្មា។រត់លើម៉ាស៊ីន៣០នាទីធាក់កង់៦៥នាទីដុតកាលឡូរី៥៦០ បែកញើសគ្រប់គ្រាន់ល្មម។»
កាលពីខែកក្កដា លោកនាយករដ្ឋមន្ត្រីហ៊ុន សែន បានប្រកាសលុបចោលកម្មវិធីណាត់ជួបមួយចំនួន ដោយត្រូវទៅជួបគ្រូពេទ្យជំនាញនៅប្រទេសសិង្ហបុរីពិនិត្យនិងព្យាបាលជំងឺគ្រេចស្មា។ ក្រោយមកក្រុមគ្រូពេទ្យបានណែនាំឱ្យលោកផ្អាកហាត់ប្រាណមួយរយៈ។
