តួលេខពីរដ្ឋាភិបាល បង្ហាញថា ប្រជាពលរដ្ឋជាង ១ម៉ឺនគ្រួសារ ត្រូវបានជម្លៀសនៅតាមបណ្ដាខេត្តចំនួន ៦ ដែលរងទឹកជំនន់ចាប់ពីចុងខែសីហារហូតដល់សប្ដាហ៍កន្លងមកនេះ ខណៈរដ្ឋាភិបាលកំពុងបូកសរុបទំហំនៃផលប៉ះពាល់នៃទឹកជំនន់នៅខេត្តមួយចំនួនទៀត។
ក្នុងរបាយការណ៍សង្ខេបដែលផ្ញើទៅអង្គភាពអ្នកនាំពាក្យរដ្ឋាភិបាលកាលពីថ្ងៃម្សិលមិញ គណៈកម្មាធិការជាតិគ្រប់គ្រងគ្រោះមហន្តរាយ បានរាយការណ៍ថា ខេត្តចំនួន ៨ នៅភាគខាងលើនៃទន្លេមេគង្គ ខេត្តនៅភាគខាងក្រោមនៃទន្លេមេគង្គ និងខេត្តជាប់បឹងទន្លេសសាប បានទទួលរងទឹកជំនន់ពីទន្លេមេគង្គ និងទន្លេសាបចាប់តាំងពីចុងខែសីហាកន្លងមកនេះ។
គណៈកម្មាធិការមួយនេះ បានលើកឡើងបន្ថែមទៀតថា ខេត្តរតនគិរី បានរងគ្រោះពីជំនន់ទឹកភ្លៀងខ្លាំងជាងគេ ហើយខេត្តកំពត ខេត្តព្រះសីហនុ កោះកុង និងខេត្តដទៃទៀត ក៏ទទួលរងគ្រោះពីជំនន់ទឹកភ្លៀងផងដែរ ប៉ុន្តែ ថា «មិនធ្ងន់ធ្ងរ»ទេ ខណៈដែលខេត្តបាត់ដំបង និងពោធិ៍សាត់ ស្ថាប័នមួយនេះ កំពុងចាប់ផ្ដើមបូកសរុបរបាយការណ៍ផលប៉ះពាល់។
របាយការណ៍ដដែលនេះ ដែលបានបូកសរុបផលប៉ះពាល់នៅក្នុងខេត្តចំនួន ៦នោះ រាយការណ៍ថា ប្រជាពលរដ្ឋជិត ៨ម៉ឺនគ្រួសារ (៧៩,៩០៧គ្រួសារ) ឬស្មើនឹងចំនួនជិត ៣២ម៉ឺននាក់ បានរងផលប៉ះពាល់ពីទឹកជំនន់ ក្នុងនោះ ប្រជាពលរដ្ឋជាង ១ម៉ឺន(១០,៨៥៧)គ្រួសារ ត្រូវបានជម្លៀសចេញពីទឹកជំនន់ ចាប់ពីថ្ងៃទី៣១ ខែសីហា ដល់ថ្ងៃទី១៣ ខែកញ្ញានេះ។
ក្រៅពីផលប៉ះពាល់ទៅលើមនុស្សហើយនោះ ស្ថាប័នមួយនេះ បានឱ្យដឹងទៀតថា ស្រូវស្រែ និងដំណាំរួមផ្សំផ្សេងទៀតទំហំសរុបដល់ទៅជាង ២ម៉ឺន ៣ពាន់(២៣,២៤៩)ហិកតា បានខូចខាតដោយសារទឹកជំនន់ ហើយសត្វពាហនៈជាង ៣០,៤០០(៣០,៤៦៦)ក្បាល ក៏ត្រូវបានជម្លៀសចេញទៅកាន់ទីទួលសុវត្ថិភាពផងដែរ។
បើតាមរបាយការណ៍នេះ ស្ថាប័នរដ្ឋាភិបាលមួយនេះ បានអះអាងថា ប្រជាពលរដ្ឋ ៩០ភាគរយនៃចំនួនប្រជាជនដែលត្រូវបានជម្លៀសទៅទីទួលសុវត្ថិភាពនោះ បានទទួលជំនួយរួចហើយ ហើយក៏កំពុងបន្តទទួលបន្ថែមទៀត។
គណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងក្នុងរបាយការណ៍នោះថា៖ «ការផ្ដល់ជំនួយដើម្បីសម្រាលទុក្ខលំបាករបស់បងប្អូន ដែលរងផលប៉ះពាល់ គឺធ្វើជាអាទិភាពបន្ទាន់ចំពោះគ្រួសារ ដែលជម្លៀសមកនៅលើទីទួលសុវត្ថិភាព។ […] តែទោះជាយ៉ាងណា ក្រុមគ្រួសារទាំងនេះ គឺនៅបានទទួលសេវាអប់រំសុខភាព អនាម័យផ្សេងៗដែលធ្វើដោយស្ថាប័នពាក់ព័ន្ធនាពេលនេះ និងនាដំណាក់កាលបន្ទាប់ក្នុងការងារស្ដារឡើងវិញ»។
របាយការណ៍ដដែលនេះ បានបង្ហាញថា ទឹកជំនន់ បានបំផ្លាញផ្ទះសម្បែងប្រជាពលរដ្ឋ ៥៦ខ្នង ហើយផ្ទះសម្បែងប្រជាពលរដ្ឋដល់ជាង ៦ម៉ឺន ២ពាន់(៦២,៣១៣)ខ្នង រងផលប៉ះពាល់ផងដែរ ខណៈទឹកជំនន់ក៏ជន់លិចសាលារៀន ២៣៧កន្លែង វត្តអារ៉ាម ១៥២កន្លែង មណ្ឌលសុខភាព ២៦កន្លែង អណ្ដូងទឹក ៧៥៤កន្លែង និងបង្គន់អនាម័យ ៥,៤៦៦កន្លែងផងដែរ៕