អង្គភាពប្រឆាំងអំពើពុករលួយ (ACU) បានឲ្យមន្រ្តីនគរបាលម្នាក់អគ្គនាយកដ្ឋានអន្តោប្រវេសន៍ឆ្លើយបំភ្លឺដោយសង្ស័យជាប់ពាក់ព័ន្ធអំពើពុករលួយព្រោះទទួលបានលុយលើសពីការផាកពិន័យពេលចុះពិនិត្យកាស៊ីណូមួយនៅខេត្តព្រះសីហនុ។
ក្នុងលិខិតមួយចុះថ្ងៃទី៩ ខែកញ្ញាដែលវីអូឌីទើបទទួលបាននៅថ្ងៃនេះ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានផ្ញើរលិខិតមួយទៅលោក យឹម ឡាលី ជាមន្រ្តីនគរបាលមានតួនាទីជាប្រធានក្រុមចម្រុះអធិការកិច្ចហត្ថពលកម្មបរទេសនៅខេត្តព្រះសីហនុ ដើម្បីឲ្យឆ្លើយបំភ្លឺអំពីនីតិវិធីនិងលក្ខខណ្ឌ នៃការផាកពិន័យ និងការទទួលបានថវិកាលើសពីការផាកពិន័យ។
ក្នុងលិខិតដដែលនេះ អង្គភាពប្រឆាំងអំពើពុករលួយ បញ្ជាក់ថាមូលហេតុដែលឲ្យលោក យឹម ឡាលី ចូលឆ្លើយបំភ្លឺនោះធ្វើឡើងបន្ទាប់ពី ACU ទទួលបាន និងពិនិត្យលើពាក្យបណ្តឹងមួយដោយរកឃើញថាក្រោមការដឹកនាំរបស់លោក យឹម ឡាលី ដែលចុះពិនិត្យទីតាំងកាស៊ីណូមួយនៅខេត្តព្រះសីហនុកាលពីខែមុននោះ គឺមានភាពមិនប្រក្រដី។
អង្គភាពមួយនេះ ឲ្យដឹងថា កាលពីថ្ងៃទី១២ ខែសីហា ឆ្នាំ២០១៩ ក្រុមការងារចម្រុះអធិការកិច្ចហត្ថពលកម្មបរទេសដឹកនាំដោយលោក យឹម ឡាលី ផ្ទាល់បានចុះពិនិត្យទីតាំងកាស៊ីណូ ស៊ឹង ឈឹង ស្ថិតក្នុងសង្កាត់១ ក្រុងព្រះសីហនុ ខេត្តព្រះសីហនុ ដើម្បីត្រួតពិនិត្យមើលការអនុវត្តច្បាប់ ស្តីពីអន្តោប្រវេសន៍ និងច្បាប់ការងារ។
ACU បញ្ជាក់ទៀតថា ការចុះអធិការកិច្ចនោះ គឺមានការផាកពិន័យជនបរទេសគ្មានបណ្ណការងារចំនួន៥៧នាក់ ដោយក្នុង១នាក់ត្រូវបង់ពិន័យចំនួន១២៥ដុល្លារ និងសរុបទាំងអស់៥៧នាក់ស្មើនឹង៧១២៥ដុល្លារ។
ចំណែកការផាកពិន័យ៣ចំណុចផ្សេងទៀតនោះ មានចំនួនទឹកប្រាក់១៦៨០ដុល្លារ ដោយសារម្ចាល់កាស៊ីណួនេះមិនអនុវត្តតាមសេចក្ដីជូនដំណឹងស្ដីពីបុគ្គលិក សេចក្ដីប្រកាសជូនដំណឹងស្ដីពីចលនាបុគ្គលិក និងលិខិតអនុញ្ញាតឱ្យប្រើប្រាស់ហត្ថពលកម្មបរទេស។
ប៉ុន្តែលោក យឹម ឡាលី បែរជាទទួលបានប្រាក់ពីតំណាងកាស៊ីណូចំនួន២ម៉ឺនដុល្លារ ដែលលើសពីចំនួនត្រូវផាកពិន័យរហូតដល់ចំនួន ១១ ១៩៥ ដុល្លារ។
វិអូឌីបានព្យាយាមសុំការឆ្លើយតបពីប្រធានក្រុមចម្រុះអធិការកិច្ចហត្ថពលកម្មបរទេស លោក យឹម ឡាលី តាមរយៈទូរស័ព្ទដែរប៉ុន្តែមានមនុស្សស្រីលើកដែលអះអាងថា ត្រូវកូនស្រី ហើយបានប្រាប់ថា លោក យឹម ឡាលី រវល់ទុកទូរស័ព្ទនៅផ្ទះ។ វិអូឌីបានព្យាយាមពេលក្រោយទៀតដោយទូរស័ព្ទច្រើនដងប៉ុន្តែគ្មានអ្នកទទួល។
អ្នកនាំពាក្យអគ្គនាយកដ្ឋានអន្តោប្រវេសន៍លោក កែវ វណ្ណថន មានប្រសាសន៍ថា លោកមិនទាន់ទទួលបានព័ត៌មាននេះទេដោយថា លោកទើបមកពីបំពេញបេសកម្មនៅក្រៅប្រទេស។ លោក បញ្ជាក់ថាប្រសិនជាករណីនោះកើតឡើងមែន ហើយរកឃើញថាលោក យឹម ឡាលី ពិតជាមានកំហុសមែននោះ អង្គភាពនឹងដាក់ពិន័យទៅតាមច្បាប់។
លោក បន្ថែមថា៖ «បើសិនជារកឃើញកំហុស យើងត្រូវដាក់ពិន័យគាត់ទៅតាមវិន័យរបស់កងកម្លាំងនគរបាលជាតិហើយ»។
កាលពីថ្ងៃទី២៧ ខែកក្កដា ឆ្នាំ២០១៩ អង្គភាពប្រឆាំងអំពើពុករលួយបានចុះទៅឃាត់ខ្លួនប្រធានមន្ទីរៀបចំដែនដី និងសំណង់ខេត្តពោធិសាត់ លោក លៀម ប៊ុនរឿន អនុប្រធានមន្ទីរទទួលការងារសំណង់ លោក ជាង វុទ្ធី និងមន្ត្រីសុរិយោដីខេត្តទទួលបន្ទុកច្រក លោក តែ ប៊ុនថេង ពាក់ព័ន្ធការប្រព្រឹត្តអំពើពុករលួយដោយឃុបឃិតគ្នាទារប្រាក់ពីម្ចាស់ដីដោយខុសច្បាប់ចំនួន ១០ម៉ឺនដុល្លារជាថ្នូរចេញច្បាប់សាងសង់។
សាលាដំបូងរាជធានីភ្នំពេញ បានសម្រេចឃុំខ្លួនមន្រ្តីមន្ទីរៀបចំដែនដីទាំង៣នាក់នោះ នៅថ្ងៃទី៣១ ខែកក្កដា ដោយចោទចំនួន៣បទល្មើសគឺ បទវិតិក្រមតាមក្រមព្រហ្មទណ្ឌ បទរំលោភអំណាច និងបទសម្អាតប្រាក់៕
