មេដឹកនាំអាមេរិក និងកូរ៉េខាងត្បូង បានជជែកគ្នានៅថ្ងៃនេះ បន្ទាប់ពីកូរ៉េខាងជើងបានគំរាមលុបចោលជំនួបកំពូលជាមួយក្រុងវ៉ាស៊ីងតោន។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ជំនួបកំពូលប្រធានាធិបតីអាមេរិក លោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន ត្រូវបានគ្រោងធ្វើឡើងនៅថ្ងៃទី១២ ខែមិថុនាខាងមុខនេះ នៅឯប្រទេសសិង្ហបុរី។
ប៉ុន្តែ គម្រោងជំនួបនេះបានជួបភាពរអាក់រអួលជាបណ្ដើរៗហើយ បន្ទាប់ពីការផ្ដោះផ្ដងសង្គ្រាមពាក្យសម្ដីដាក់គ្នា ដែលជំរុញឲ្យក្រុងព្យុងយ៉ាងគំរាមដកខ្លួនចេញពីជំនួបនេះ។
ទីភ្នាក់ងារព័ត៌មាន AFP បានដកស្រង់សេចក្ដីប្រកាសព័ត៌មានរបស់ខុទ្ទកាល័យប្រធានាធិបតី លោក មូន ជែអ៊ីន ដែលបានឲ្យដឹងថា លោក មូន បានជជែកតាមទូរស័ព្ទជាមួយលោក ត្រាំ ជុំវិញទង្វើរបស់កូរ៉េខាងជើងនាពេលថ្មីៗនេះ។
បើតាមសេចក្ដីប្រកាសព័ត៌មានដែល AFP បានដកស្រង់នោះ បានឲ្យដឹងបន្ថែមថា មេដឹកនាំទាំងពីរបានឯកភាពធ្វើការជិតដិតនឹងគ្នា ដើម្បីសម្រេចបានជំនួបកំពូលនាពេលខាងមុខនេះ ដែលវានឹងក្លាយជាជំនួបលើកដំបូងរវាងប្រធានាធិបតីអាមេរិក និងមេដឹកនាំកូរ៉េខាងជើង។
ទោះជាយ៉ាងណា គ្មានព័ត៌មានលម្អិតបន្ថែមទៀតជុំវិញកិច្ចសន្ទនារវាងមេដឹកនាំអាមេរិក និងមេដឹកនាំកូរ៉េខាងត្បូងនោះឡើយ។
ក្រៅពីគំរាមដកខ្លួនចេញពីជំនួបកំពូលខាងមុខនេះហើយ នៅថ្ងៃនេះ ក្រុងព្យុងយ៉ាងក៏បានទាមទារទៅក្រុងសេអូល ឲ្យបញ្ជូនត្រឡប់ទៅកូរ៉េខាងជើងវិញនូវស្ត្រីជាអ្នកបម្រើកូរ៉េខាងជើង ដែលបានរត់ចុះចូលនឹងកូរ៉េខាងត្បូងកាលពីឆ្នាំមុនផងដែរ៕
