អ្នកមានជម្លោះដីធ្លីនៅបុរីកីឡា និងតំបន់បឹងកក់ជាង៦០នាក់ បានប្រមូលម្តុំគ្នានៅមុខទីស្តីការគណៈរដ្ឋមន្ត្រី ដើម្បីជំរុញទៅរដ្ឋាភិបាលឲ្យពន្លឿនដោះស្រាយបញ្ហាដីធ្លីជូនពួកគេឲ្យបានឆាប់។
តំណាងសហគមន៍បុរីកីឡា អ្នកស្រី ភោគ សុភីន បានរៀបរាប់ទាំងអួលដើមកថា ប្រជាពលរដ្ឋជាង៣០គ្រួសារនៅបុរីកីឡាដែលមិនទទួលបានសំណងនាំគ្នាឡើងមកតវ៉ានៅនៅមុខទីស្តីការគណៈរដ្ឋមន្ត្រីនៅព្រឹកនេះ គឺដើម្បីទាមទារឲ្យរដ្ឋាភិបាលជួយអន្តរាគមន៍ទៅសាលារាជធានីភ្នំពេញផ្តល់សំណងជូនពួកគាត់ឲ្យបានឆាប់ ខណៈបច្ចុប្បន្ននេះពួកគាត់កំពុងមានជីវភាពខ្វះខាត។
តំណាងសហគមន៍បុរីកីឡា អ្នកស្រី ភោគ សុភីន
ចំណែក តំណាងសហគមន៍បឹងកក់ កញ្ញា អ៊ីម ស្រីទូច ឯណោះវិញ បានអះអាងថា ប្រជាពលរដ្ឋដែលទទួលបានសំណងខ្លះ និងមិនទទួលបានសំណងជាង១៦០គ្រួសារ ធ្លាប់ដាក់ញត្តិជាច្រើនដងទៅសាលាក្រុង ក្រសួងដែនដី ខុទ្ទកាល័យនាយករដ្ឋមន្ត្រី ជាច្រើនឆ្នាំមកហើយ ប៉ុន្តែរហូតមកដល់ពេលនេះមិនទាន់មានដំណោះស្រាយនៅឡើយ។ ករណីនេះ កញ្ញាព្រមានថា បើមិនមានដំណោះស្រាយទេ ពួកគេនៅតែបន្តតវ៉ារហូតមានដំណោះស្រាយ។
កញ្ញាអះអាងថា៖«បើសិនជាអត់មានដំណោះស្រាយ ពួកខ្ញុំទាំងអស់គ្នានឹងបន្តតវ៉ាទៀត ស្វែងរកដំណោះស្រាយ»។
អ្នកនាំពាក្យប្រតិកម្មរហ័សទីស្តីការគណៈរដ្ឋមន្រ្តីលោក ទិត សុធា សុំមិនធ្វើការបកស្រាយជុំវិញការស្នើសុំរបស់សហគមន៍បុរីកីឡា និងបឹងកក់ ដោយថាលោកមិនមានតួនាទីដោះស្រាយបញ្ហានេះទេ។
លោកមានប្រសាសន៍ថា៖«ខ្ញុំអត់អាច អត្ថាធិប្បាយដោយខ្ញុំមិនបានដឹងរឿងហ្នឹងទេ។ ធម្មតាគេមានគណៈកម្មការទទួលពាក្យបណ្តឹងរឿងដីធ្លី ក្នុងកិច្ចការរដ្ឋាភិបាល មានអ្នកធ្វើកិច្ចការហ្នឹងផ្សេង»។
រីឯអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានបញ្ជាក់ថា សាលារាជធានីភ្នំពេញកំពុងយកចិត្តទុកដាក់ដោះស្រាយបញ្ហាសេសសល់ជូនសហគមន៍ទាំងពីរនោះ ប៉ុន្តែលោកថា បើប្រជាសហគមន៍ទាំងនោះមានចម្ងល់អាចទំនាក់ទំនងទៅសាលារាជធានីផ្ទាល់។
លោកមានប្រសាសន៍ថា៖«ឲ្យគាត់ទាក់ទងខ្ញុំបន្ថែមទៀត។ សរុបមកបងប្អូនយើងទាំងបុរីកីឡា ទាំងបឹងកក់ យើងកំពុងធ្វើការដោះស្រាយហើយ»។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា រដ្ឋាភិបាលគួរតែរកវិធីពន្លឿនដោះស្រាយបញ្ហាដីធ្លីជូនប្រជាពលរដ្ឋបុរីកីឡា និងបឹងកក់ទាំងនោះឲ្យអស់ ដោយថាបើមិនធ្វើការដោះស្រាយឲ្យអស់ទេជំងឺរាំរ៉ៃក្នុងសង្គមនៅតែបន្តកើតមាន។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត
កាលពីឆ្នាំ២០០៣ ក្រុមហ៊ុន ផាន អ៊ីម៉ិច របស់អ្នកស្រី ស៊ុយ សុផាន ទទួលបានសិទ្ធិពីរដ្ឋាភិបាលធ្វើការអភិវឌ្ឍនៅសហគមន៍បុរីកីឡាដោយសន្យាសង់អគារចំនួន ១០ ជូនប្រជាពលរដ្ឋ ១ ៧៧៦គ្រួសារវិញ ប៉ុន្តែ ក្រុមហ៊ុនសង់បានតែ ៨អគារក៏ផ្អាក ដោយលើកហេតុផលថា ក្រុមហ៊ុនក្ស័យធន។
ដោយឡែក កាលពីឆ្នាំ២០១១ រដ្ឋាភិបាល បានចេញអនុក្រឹត្យមួយ ដោយបានកាត់ដីចំនួន ១២.៤៤ ហិចតា ឲ្យប្រជាពលរដ្ឋជាង៧០០គ្រួសារ នៅតំបន់បឹងកក់។ ប៉ុន្តែអ្នកបឹងកក់ថា ជិត ៧ឆ្នាំនៅតែមិនទាន់មានដំណោះស្រាយ។
ក្រោយមកនៅក្នុងវេទិកាជាតិលើកទី២ ស្តីពី «ការការពារ និងអភិរក្សធនធានធម្មជាតិ» នាថ្ងៃទី២២សីហា ឆ្នាំ២០១៧ លោកនាយករដ្ឋមន្រ្តី ហ៊ុន សែន បានបញ្ជាផ្ទាល់មាត់ឲ្យអភិបាលរាជធានីភ្នំពេញថ្មី គឺ លោក ឃួង ស្រេង ត្រូវដោះស្រាយបញ្ហាជម្លោះដីធ្លីនៅតំបន់បឹងកក់ឲ្យអស់ ខណៈបច្ចុប្បន្នតំណាងអ្នកមានជម្លោះដីធ្លីនៅតំបន់បឹងកក់ជាង១៦០គ្រួសារនៅតែអះអាងថា ពួកគេមិនទាន់ទទួលបានយុត្តិធម៌នៅឡើយ៕
