ក្រសួងការបរទេសបានឲ្យដឹងថា ស្ថានទូតកម្ពុជាប្រចាំប្រទេសចំនួន៤ បានបញ្ជូនពលករខ្មែរចំណាកស្រុក៤៨នាក់ត្រឡប់មកប្រទេសកំណើតវិញ បន្ទាប់ពីពួកគេឆ្លងដែនខុសច្បាប់ទៅធ្វើការនៅក្រៅប្រទេស។
ក្នុងលិខិតរបស់ក្រសួងការបរទេសនិងសហប្រតិបត្តិការអន្តរជាតិ ចុះផ្សាយថ្ងៃនេះថា ស្ថានទូតតំណាងកម្ពុជាប្រចាំប្រទេសឥណ្ឌូនេស៊ី ម៉ាឡេស៊ី សឹង្ហបុរី និងប្រទេសឡាវ បានអន្តរាគមន៍ជួយពលករខ្មែរ៤៨នាក់ ដែលពួកគេលួចឆ្លងដែនខុសច្បាប់ចូលទឹកដីនៃប្រទេសទាំងនោះ ដើម្បីធ្វើការនៅលើទូកនេសាទរកប្រាក់ទ្រទ្រង់ជីវភាពគ្រួសារ។លិខិតដដែលបញ្ជាក់ថា ពលករខ្មែរទាំងត្រូវត្រូវបានបញ្ជូនត្រឡប់មកដល់កម្ពុជាចន្លោះថ្ងៃទី១០ ដល់ថ្ងៃទី២០ ខែមីនា ឆ្នាំ២០១៨នេះ។
កាលពីខែមិថុនាឆ្នាំ២០១៤ អាជ្ញាធរថៃចាប់បញ្ជូនពលករខ្មែរប្រមាណ២០ម៉ឺននាក់មកប្រទេសកម្ពុជាវិញ ក្រោយពីរកឃើញថាពួកគេចូលធ្វើការក្នុងប្រទេសថៃដោយខុសច្បាប់។ ក្រោយមកអាជ្ញាធរថៃបានទទួលយកពលករខ្មែរវិញ ដោយឲ្យបំពេញបែបបទតាមផ្លូវច្បាប់។
ប៉ុន្តែនៅពាក់កណ្តាលឆ្នាំ២០១៧នេះ រដ្ឋាភិបាលយោធាថៃ បានអនុវត្តវិធានការថ្មីមួយទៀត ដោយបានចាប់បញ្ជូនពលករបរទេសទៅប្រទេសកំណើតរបស់ពួកគេវិញ ដោយថា ជាផ្នែកមួយនៃការអនុវត្តច្បាប់គ្រប់គ្រងពលករបរទេសខុសច្បាប់នៅក្នុងប្រទេសមួយនេះ។
តាមរបាយការណ៍របស់ក្រសួងការបទេសកម្ពុជា រយៈពេល៦ខែដើមឆ្នាំ២០១៧ អាជ្ញាធរកម្ពុជាបានជួយសង្គ្រោះនិងធ្វើមាតុភូមិនិវត្តន៍ ពលករខ្មែរចំនួន ៤៥០នាក់។ ក្នុងនោះ បញ្ជូនមកពីប្រទេសថៃ មានចំនួន១៧៨នាក់ ម៉ាឡេស៊ី ចំនួន១៣៤នាក់ វៀតណាម ចំនួន៦៨នាក់ មកពីឡាវ ចំនួន២៤នាក់ និងចំនួន ២២នាក់ផ្សេងទៀត បញ្ជូនមកពីប្រទេសចិន៕
