មេដឹកនាំបក្សកាន់អំណាច លោក ហ៊ុន សែន ហៅការអំពាវនាវ របស់អតីតមេដឹកនាំបក្សប្រឆាំង លោក សម រង្ស៊ី កុំឲ្យពលរដ្ឋចេញទៅបោះឆ្នោតនោះ ថានឹងបរាជ័យ ដោយថាខ្លួនមានសមាជិកជាង៦០ភាគរយនៅក្នុងដៃរួចទៅហើយ ក្នុងចំណោមអ្នកដែលមានឈ្មោះក្នុងបញ្ជីបោះឆ្នោត។
លោក សម រង្ស៊ី មួយរយៈចុងក្រោយនេះ បានអំពាវនាវតាមគេហទំព័រហ្វេសប៊ុក កុំឲ្យពលរដ្ឋទៅបោះឆ្នោតបើគ្មានវត្តមានបក្សប្រឆាំងចូលរួមដោយថាការចេញទៅបោះឆ្នោតទាំងគ្មានបក្សប្រឆាំង ប្រៀបបាននឹងគាំទ្ររបបផ្តាច់ការ ឲ្យបន្តដឹកនាំប្រទេសច។
ប៉ុន្តែលោក ហ៊ុន សែន ថា ការអំពាវនាវនេះ នឹងបរាជ័យ ព្រោះថា គណបក្សប្រជាជនកម្ពុជាមានសមាជិក ជាង៥លាននាក់ ក្នុងចំណោមនាក់ដែលបានចុះឈ្មោះ៨លាននាក់។
លោក ហ៊ុន សែន ថ្លែងទៀតថា អំឡុងឆ្នាំ២០១៣ លោកសម រង្ស៊ីប្រមូលមនុស្សមកធ្វើបាតុកម្ម បានតែប៉ុន្មានម៉ឺននាក់ប៉ុណ្ណោះ ក្នុងចំណោមពលរដ្ឋខ្មែរ១៥លាននាក់ ។ លោកបន្តថា ពេលនេះ លោកសម រង្ស៊ី និរទេសខ្លួន ហើយមធ្យោបាយអូសទាញមានតែហ្វេសប៊ុកមួយទេ។
លោក ហ៊ុន សែន នាយករដ្ឋមន្ត្រីកម្ពុជា
លោក ហ៊ុន សែន ធ្លាប់អះអាងម្តងហើយអំឡុងយុទ្ធនាការឃោសនារកសំឡេងឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០១៧ ថាគណបក្សប្រជាជនកម្ពុជាមានសមាជិកជាង៥លាននាក់ដែរ ប៉ុន្តែលទ្ធផលផ្លូវការ របស់គជប បង្ហាញថាអ្នកបោះឆ្នោតគាំទ្រគណបក្សប្រជាជនកម្ពុជាមានតែជាង៣លាន៥សែននាក់ប៉ុណ្ណោះ។
