បេក្ខជនប្រធានាធិបតីអាមេរិកមកពីគណបក្សសាធារណៈរដ្ឋបានវាយប្រហារបេក្ខជនមកពីគណបក្សប្រជាធិបតេយ្យថាជាមនុស្សពូកែកុហកលំដាប់ពិភពលោកមិនសាកសមជាអ្នកទទួលតំណែងប្រធានាធិបតី។
លោក ឌូណល ត្រាំ បានហៅលោកស្រី ហ៊ីលឡារី ក្លីនតុន កាលពីម្សិលមិញថាជាអ្នកកំពូលអ្នកកុហកលំដាប់ពិភពលោកមិនសមកាន់តំណែងប្រធានាធិបតីកាន់ការងារសេដ្ឋកិច្ច គោលនយោបាយអន្តរជាតិ និងបញ្ហាជនអន្តោប្រវេសន៍ទេ។
លោក ត្រាំ ក៏បានវាយប្រហារថាលោកស្រី គ្លីនតុន មានលុយចំនួន៤២លានដុល្លារជាលុយបានមកពីការបញ្ឆេះសង្គ្រាមឬហៅលុយប្រលាក់ឈាម។ នេះបើតាមទីភ្នាក់ងារសារព័ត៌មាន AFP។
លោក ត្រាំ ថ្លែងនៅក្នុងសណ្ឋាគារផ្កាយប្រាំនៅ Manhattan នៅចំពោះមុខអ្នកគាំទ្រថា លោកស្រី ហ៊ីលឡារីគ្លីនតុន នឹងក្លាយជាមនុស្សពុករលួយខ្លាំង ពេលក្លាយជាមេដឹកនាំ។
ការវាយប្រហាររបស់លោក ត្រាំ នេះធ្វើឡើងមួយថ្ងៃបន្ទាប់ពីលោកស្រី គ្លីនតុន បានវាយប្រហារលោក ត្រាំ ថាជាមនុស្សគ្រោះថ្នាក់ ជាអ្នកជំនួញខ្វះផែនការបង្កើតការងារ ហើយអាចនាំឲ្យអាមេរិកកើតមានវិបត្តិសេដ្ឋកិច្ចជាថ្មីទៀត៕