លោកនាយករដ្ឋមន្ត្រី ហ៊ុន សែន ថា តម្លៃស្រូវធ្លាក់ថ្លៃ ដោយសារកត្កាបញ្ហាទីផ្សារអន្តរជាតិមានការធ្លាក់ចុះ ហើយណាមួយឆ្នាំនេះផលិតផលស្រូវមានការកើនឡើងខ្ពស់ បើធៀបទៅនឹងតម្រូវការទីផ្សារបច្ចុប្បន្ន។
នៅក្នុងសេចក្ដីប្រកាសព័ត៌មានស្ដីពីលទ្ធផលនៃសម័យប្រជុំពេញអង្គគណៈរដ្ឋមន្ត្រីនៅថ្ងៃសុក្រនេះ ឲ្យដឹងថា បញ្ហាដែលជាផលប៉ះពាល់ នៃការស្រុតចុះតម្លៃស្រូវនេះ គឺមកពីកត្ដាទីផ្សារអន្តរជាតិ នឹងមកពីឆ្នាំនេះ ផលស្រូវមានការកើនឡើងខ្ពស់ បើធៀបទៅនឹងឆ្នាំកន្លងទៅ ។ សេចក្ដីប្រកាសព័ត៌មានបន្តថា ការកើនឡើងផលិតផលស្រូវមកពីការយកចិត្តទុកដាក់ ការកសាងប្រព័ន្ធធារាសាស្រ្ត សម្រាប់ស្រោចស្រប់ការដាំដុះ ទើបផលិតផលមានការកើនឡើង។
សេចក្ដីប្រកាសព័ត៌មានបញ្ជាក់ថា៖” សម្ដេចក៏បានលើកឡើងថា បញ្ហាដែលជាផលប៉ះពាល់នៃការស្រុតចុះ តម្លៃស្រូវ ក្រៅពីកត្កាទីផ្សារអន្តរជាតិ គឺកត្កាសន្តិភាពការកសាងប្រព័ន្ធធារាសាស្ត្រ និងការផ្ដល់ទឹកគ្រប់គ្រាន់ ស្រោកស្រពដាំដុះផលិត ដែលជាកិច្ចខិតខំប្រឹងប្រែងរបស់រដ្ឋាភិបាល បានធ្វើឲ្យផ្ទៃដីដាំដុះ និងផលិតផលកសិកម្មពិសេសផលិតផលស្រូវមានការកើនឡើងខ្ពស់ បើធៀបទៅតម្រូវការទីផ្សារ គឺការរីកឡើង ផ្ទៃក្រឡា នៃការដាំដុះស្រូវបន្ថែម ដែលបានបង្កើនទិន្នផលស្រូវ”។
អគ្គលេខាធិការសម្ព័ន្ធនៃសហគមន៍កសិករកម្ពុជា លោក ថេង សាវឿន មានប្រសាសន៍ថា ស្រូវឆ្នាំនេះមិនមានការកើនឡើងលើសពីឆ្នាំមុនទេ ហើយកត្កាបញ្ហាទីផ្សារ មិនមែនមានតែឆ្នាំនេះនោះដែរ ។ លោកថា ចំពោះការលើកឡើងរបស់រដ្ឋាភិបាល មិនបានឆ្លុះបញ្ចាំងថា ស្រូវមានឆ្នាំនេះមានការកើនឡើងនោះទេ ខណៈដែលការប្រមូលផលនឹងត្រូវធ្វើនៅក្នុងខែ១១ ។
លោកមានប្រសាសន៍ថា៖”បញ្ហាទីផ្សារដែលលោក នាយករដ្ឋមន្ត្រីថា ក្នុងន័យការពារខ្លួន ខណៈដែលរដ្ឋាភិបាលក៏ដូចជាក្រសួងកសិកម្ម មិនមានវិធានការជាក់លាក់មួយក្នុងការរកទីផ្សារ នៅពេលតម្លៃស្រូវចុះថោក ហើយមិនមានផែនការជាក់លាក់អន្តរាគមន៍ដោះស្រាយបញ្ហាហ្នឹង ។ ចឹងមានតែនិយាយថា ស្រូវកើនឡើងលើសតម្រូវការ ឆ្នាំនេះចលនាការតវ៉ារបស់កសិករវាមានសន្ទុះខ្លាំង ជាងឆ្នាំមុនៗ ដោយសារពួកគេគិតថា ឆ្នាំនេះស្រូវគឺមានតម្លៃថោក ជាងឆ្នាំមុនទៅទៀត ដែលយើងគិតហ្នឹងតាមពីស្ថានភាពនេះ”។
កាលពីថ្ងៃទី១៨ ខែកញ្ញា កសិករ ប្រមាណ១ពាន់នាក់ នៅស្រុកសង្កែ ខេត្តបាត់ដំបង បាននាំគ្នាចាក់ស្រូវប្រមាណ៣០០គីឡូក្រាមបិទផ្លូវជាតិលេខ៥ ដើម្បីតវ៉ាទាមទារឲ្យ រដ្ឋាភិបាល ជួយដោះស្រាយរកទីផ្សារ សម្រាប់លក់ស្រូវរបស់ពួកគេ។